Tag: بانی پی ٹی آئی

اسلام آباد : حکومت اور اداروں کے خلاف بغاوت پر اکسانے کے الزام پر بانی پی ٹی آئی کیخلاف مقدمہ درج کرنے کا فیصلہ کرلیا گیا۔

تفصیلات کے مطابق سوشل میڈیا پر متنازع پوسٹ اور بانی پی ٹی آئی سے ایف آئی اے ٹیم کی تحقیقات کے معاملے پر حکومت اور اداروں کے خلاف بغاوت پراکسانے کے الزام پر بانی پی ٹی آئی کے خلاف مقدمہ درج کرنے کا فیصلہ کرلیا گیا۔

حکومتی ذرائع نے بتایا ہے ایف آئی اے نے بانی پی ٹی آئی کے خلاف کارروائی شروع کردی ہے۔

یاد رہے وفاقی تحقیقاتی ادارے (ایف آئی اے) نے بانی چیئرمین پاکستان تحریک انصاف (پی ٹی آئی) کے ایکس اکاؤنٹ سے کی گئی دھمکی آمیز پوسٹ کی تحقیقات کا فیصلہ کیا تھا۔

ذرائع کے مطابق ایف آئی اے نے بانی بانی پی ٹی آئی سے تحقیقات کیلیے سینئر افسران کی سربراہی میں 4 ارکان پر مشتمل ٹیم تشکیل دی ، جس میں ایف آئی اے، سائبر کرائم ونگ اور اسلام آباد کے افسران شامل ہیں۔

ایف آئی اے کے مطابق بانی پی ٹی آئی سے تحقیقات ان کے اکاؤنٹ سے دھمکی آمیز پوسٹ پر کی جا رہی ہے، انتہائی متنازع پوسٹ سابق وزیر اعظم کے آفیشل ایکس اکاؤنٹ سے شیئر کی گئی۔

خیال رہے کہ مئی میں بانی پی ٹی آئی کے ایکس اکاؤنٹ سے ایک پروپیگنڈا ویڈیو اپ لوڈ کی گئی تھی جس کی تحقیقات میں انہوں نے ایف آئی اے ٹیم کو کسی سوال کا جواب دینے انکار کر دیا تھا۔

بانی پی ٹی آئی نے ایف آئی اے ٹیم کے کسی بھی سوال کا جواب دینے سے انکار کرتے ہوئے کہا تھا کہ کسی بھی سوال کا جواب وکلا کی موجودگی میں دوں گا۔ ایف آئی اے ٹیم نے ملزم کا مؤقف تحریری طور پر حاصل کیا تھا۔

سابق وزیر اعظم کے اکاؤنٹ سے 26 مئی کو شیخ مجیب الرحمان پر ویڈیو ٹوئٹ کی گئی تھی۔

راولپنڈی: بانی پی ٹی آئی نے صحافیوں سے غیررسمی گفتگو کرتے ہوئے علی امین گنڈاپور کے حوالے سے صحافی کے سوال کا جواب دیدیا۔

وزیراعلیٰ خیبر پختونخوا علی امین گنڈاپور کی صحافیوں کیخلاف نامناسب زبان پر صحافیوں نے بانی پی ٹی آئی سے احتجاج کیا، صحافی نے بانی تحریک انصاف سے سوال کیا کہ علی امین گنڈاپور نے صحافیوں کو دھمکیاں دیں اور نامناسب زبان استعمال کی۔

بانی پی ٹی آئی نے صحافیوں سے گفتگو کرتے ہوئے کہا کہ مجھے نہیں معلوم علی امین گنڈاپور نے کیا کہا، مجھے نہیں معلوم میں جیل میں ہوں۔

بانی پی ٹی آئی نے کہا کہ میرے سارے کیسز جھوٹے ہیں کچھ بھی ثابت نہ کرسکے، نیب ترامیم اب ملک کا قانون بن چکا ہے، اس کو چھوڑیں یہ قانونی معاملہ ہے۔

دریں اثنا علی امین گنڈاپورکی صحافیوں سے متعلق گفتگو پر صحافیوں کی جانب سے قومی اسمبلی میڈیا گیلری سے واک آؤٹ کیا گیا۔

قومی اسمبلی میں رہنما تحریک انصاف عمر ایوب کا کہنا تھا کہ تحریک انصاف صحافی برادری سے غیرمشروط معافی مانگتی ہے، وزیراعلٰی کے پی صحافی برادری سے خود معذرت کریں گے۔

اپوزیشن لیڈرقومی اسمبلی عمر ایوب نے کہا کہ صحافی مشکل ترین حالات میں کوریج کرتےہیں، پی ٹی آئی صحافی برادری کی خدمات کو قدرکی نگاہ سےدیکھتی ہے۔

بعدازاں صحافیوں نے قومی اسمبلی اجلاس کا بائیکاٹ ختم کردیا، قومی اسمبلی اجلاس کا بائیکاٹ عمر ایوب کی معذرت کے بعد ختم کیا گیا۔

اسلام آباد : سینیٹر شیری رحمان کا کہنا ہے کہ بانی پی ٹی آئی کی تفتیشی افسرکو دھمکیاں دیناکیس پراثراندازہونےکی کوشش ہے، دھمکیاں کام نہ کریں تو یہ پاؤں پکڑتے ہیں۔

تفصیلات کے مطابق پیپلز پارٹی کی سینیئر رہنما شیری رحمان نے بانی پی ٹی آئی کی تفتیشی افسر کو دھمکی پر ردعمل دیتے ہوئے کہا کہ 2019میں نیب آفیسر صدر آصف زرداری کوگرفتارکرنےآئےتھے، آصف زرداری نیب افسران کےساتھ حسن سلوک سےپیش آئے، انھوں نے نیب افسران سے چائے کا پوچھا اور ہنستے ہنستے جیل چلےگئے.

شیری رحمان کا کہنا تھا کہ رپورٹس کےمطابق بانی پی ٹی آئی نےاڈیالہ میں نیب تفتیشی افسرکودھمکیاں دی ہیں، دھمکی دی گئی نیب افسرکی وجہ سےبشریٰ بی بی جیل میں ہیں،باہرآکرنہیں چھوڑوں گا۔

انھوں نے کہا کہ تفتیشی افسرکو دھمکیاں دیناکیس پراثراندازہونےکی کوشش ہے، ریلیف نہ ملے توگریبان پکڑناان کی عادت ہے، دھمکیاں کام نہ کریں تویہ پاؤں پکڑتے ہیں۔

پیپلز پارٹی کی سینیئر رہنما کا کہنا تھا کہ نیب قوانین میں ترامیم کی بحالی کےبعدبعدیہ ریلیف مانگ رہے ہیں۔

اسلام اباد : چیئرمین پی ٹی آئی بیرسٹر گوہر کا سپریم کورٹ کے نیب ترامیم کیس کے فیصلے سے بانی پی ٹی آئی کے کیسز ختم ہونے سے متعلق اہم بیان آگیا۔

تفصیلات کے مطابق چیئرمین پی ٹی آئی بیرسٹرگوہر نے میڈیا سے گفتگو کرتے ہوئے کہا کہ سپریم کورٹ نےآج نیب ترامیم سےمتعلق فیصلہ دیا، نیب ترامیم سےمتعلق فیصلےکےبعدتوشہ خانہ ٹوکیس ختم ہوگیا، توشہ خانہ ٹوکیس کیس نیب کےدائرہ اختیارسےنکل چکا ہے۔

بیرسٹر گوہر کا کہنا تھا کہ القادرٹرسٹ کیس بھی اس ترمیم کےتحت نکل جائےگا جبکہ 190ملین پاؤنڈ کے معاملے پر منظوری کابینہ نےدی تھی، کابینہ سے منظور شدہ فیصلے پر نیب کادائرہ اختیارنہیں بنتا۔

چیئرمین پی ٹی آئی نے کہا کہ نئے قانون میں لکھا ہے کابینہ فیصلے کو استثنیٰ ہے، پراسیکیویشن نے خود تسلیم کہ کیابانی پی ٹی آئی نے ذاتی فائدہ حاصل نہیں کیا۔

انھوں نے بتایا کہ سپریم کورٹ فیصلے کے مطابق اب دونوں کیسز ختم ہیں، القادر میرٹ پر ختم ہونا چاہیے اور توشہ خانہ ٹو چل ہی نہیں سکتا، بشریٰ بی بی کا نام تو توشہ خانہ فہرست میں تھا ہی نہیں، بانی پی ٹی آئی پر دباؤ ڈالنے کیلئےبشریٰ بی بی کا نام شامل کیا گیا۔

ان کا مزید کہنا تھا کہ سپریم کورٹ کے فیصلے میں اب قانون بالکل واضح ہو گیا ہے، کابینہ فیصلے کا کیس نیب میں نہیں چل سکتا، ہم پارلیمنٹ میں موجود ہیں بے شک وہاں پر مشکوک لوگ بیٹھے ہیں۔

راولپنڈی: تحریک انصاف کے وکیل رہنما انتظار پنجوتھہ نے کہا ہے کہ بانی پی ٹی آئی کو خدشہ ہے انھیں ملٹری کورٹس لےجایا جائے گا۔

بانی پی ٹی آئی سے وکلا رہنماؤں کی ملاقات ختم ہونے کے بعد وکیل انتظار پنجوتھہ نے علی اعجاز بٹر کے ہمراہ میڈیا سے گفتگو کرتے ہوئے بتایا کہ بانی نے کہا ہے کس طرح ایک مقبول جماعت کے سربراہ کو ملٹری کورٹ لے جایا جاسکتا ہے، بانی پی ٹی آئی نے کہا ہے نیب ترامیم کا فیصلہ بھی جلد سنایا جانا چاہیے۔

انتظار پنجوتھہ نے کہا کہ آج بانی پی ٹی آئی سے مختلف کیسز سے متعلق گفتگو ہوئی، ملٹری کورٹس سے متعلق ہائیکورٹ درخواست پر بات کی گئی۔

انھوں نے کہا کہ ہم نے درخواست کی کہ کل ہی سماعت ہونی چاہے، اسلام آباد ہائیکورٹ نے درخواست پر اعتراضات لگائے، بانی پی ٹی آئی سے القادر ٹرسٹ کیس سےمتعلق بھی گفتگو ہوئی ہے۔

انتظار پنجوتھہ نے کہا کہ مخصوص نشستوں کے کیس سے متعلق بھی گفتگو ہوئی ہے، بانی پی ٹی آئی نے کہا ہے مخصوص نشستوں کا فیصلہ جلد آنا چاہیے۔

اسلام آباد : اسلام آباد ہائیکورٹ رجسٹرار آفس نے بانی پی ٹی آئی کی ممکنہ ملٹری ٹرائل روکنےکی درخواست پراعتراضات عائد کردیے۔

تفصیلات کے مطابق بانی پی ٹی آئی کی ممکنہ ملٹری ٹرائل روکنےکی درخواست پراعتراضات عائد کردیے گئے ، اسلام آباد ہائیکورٹ رجسٹرار آفس نے درخواست پر اعتراضات عائد کئے۔

اعتراض میں کہا گیا ہے کہ کسی مخصوص ایف آئی آرکا حوالہ دیئےبغیرعمومی ریلیف کیسےمانگاجا سکتا ہے؟ درخواست کیساتھ کوئی آرڈر یا دستاویز نہیں لگائی گئی۔

رجسٹرار آفس کا کہنا ہے کہ ملٹری کورٹس کامعاملہ سپریم کورٹ میں زیرالتواہے ،پنجاب کے مقدمات پراسلام آبادہائیکورٹ میں درخواست کیسےدائرہو سکتی ہے۔

یاد رہے 9 مئی کے مقدمات میں بانی پی ٹی آئی کو فوجی تحویل میں نہ دینے کی درخواست دائر کی گئی تھی۔

اسلام آبادہائیکورٹ میں بانی پی ٹی آئی کی درخواست وکیل عزیر بھنڈاری نے دائر کی، جس میں 9مئی مقدمات میں ملٹری کورٹ ٹرائل کیلئے فوجی تحویل میں نہ دینے کی استدعا کی گئی ہے۔

درخواست میں سیکریٹری قانون،سیکریٹری داخلہ اور وفاق سمیت آئی جی اسلام آباد،آئی جی پنجاب،آئی جی جیل خانہ جات،ڈی جی ایف آئی اے کو فریق بنایا گیا ہے۔