شیرافضل مروت نے کہا ہے کہ پاکستان تحریک انصاف میں کوئی ٹوٹ پھوٹ نہیں، بانی فیصلے کرتے ہیں، 25، 26 اگست کو ان سے ملنے جاؤں گا۔
اے آر وائی کے پروگرام اعتراض ہے میں گفتگو کرتے ہوئے رہنما تحریک انصاف نے کہا کہ میری بانی پی ٹی آئی سے ڈھائی ماہ سے ملاقات نہیں ہوسکی، 25، 26 اگست کو بانی پی ٹی آئی سے ملاقات کےلیے جاؤں گا، بانی پی ٹی آئی ملاقات میں جو فیصلہ کریں گے وہ قبول ہوگا۔
رہنما پی ٹی آئی نے کہا کہ بانی پی ٹی آئی اگرفیصلہ کریں کہ میں پارٹی کا حصہ نہیں تو استعفیٰ دے دوں گا، میں نے جو پارٹی اور قوم کیلئے کیا کسی پر احسان نہیں رضاکارانہ طور پر کیا۔
شیرافضل مروت نے کہا کہ میں اپنا اندازبیان اور کارکردگی کو تبدیل نہیں کرسکتا، مجھ سے متعلق پارٹی کے جو فیصلے ہوئے بانی کی اجازت کے بغیر نہیں ہوسکتے تھے۔
بانی پی ٹی آئی کی رہائی اور ملکی معاملات درست کرنے کےلیے پاکستانی نکل سکتے ہیں، بنگلہ دیش میں 4 لاکھ لوگ نکل سکتے ہیں تو پاکستان کے لوگ بھی نکل سکتے ہیں، پاکستان کے جو حالات ہیں تحریک کےلیے ماحول سازگار ہے۔
انھوں نے کہا کہ میں اپنی پارٹی کے رہنماؤں کے خلاف بات نہیں کرنا چاہتا، کارکن میرے منہ سے بھی پارٹی رہنماؤں کے خلاف بات سننا پسند نہیں کریں گے، کارکن میرے خلاف بھی رہنماؤں کے منہ سے میرے خلاف بات سننا پسند نہیں کریں گے۔
میں ابھی بھی سیاست کو نہیں سمجھتا، سیاست میں اس طرح کی چیزیں ہوتی ہیں کبھی نہیں سنا، آخری بار بانی پی ٹی آئی سے ملاقات کیلئے گیا تو بتایا گیا کہ انھوں نے منع کیا ہے۔
شیر افضل نے کہا کہ مجھے بتایا گیا کہ بانی پی ٹی آئی نے مجھ سے ملاقات سے انکار کردیا ہے، میرے لیے مناسب نہیں تھا کا بانی کی مرضی کے بغیر ملاقات کروں۔
انھوں نے کہا کہ پاکستان تحریک انصاف میں 2 لوگ اہمیت رکھتے ہیں بانی اور کارکن، اللہ تعالیٰ نے ابھی تک مجھے کارکنوں کے دلوں میں رکھا ہوا ہے، پاکستان تحریک انصاف بانی پی ٹی آئی ہیں یا کارکن ہیں۔
