اسلام آباد : سابق وزیر خزانہ اسحاق ڈار کا کہنا ہے کہ بانی پی ٹی آئی کا آئی ایم ایف کوخط لکھنے کا اعلان قابل مذمت ہے، یہ ذاتی مفادات کے لیے ملکی سلامتی کو خطرے میں ڈال رہے ہیں۔
تفصیلات کے مطابق مسلم لیگ ن کے رہنما اور سابق وزیر خزانہ اسحاق ڈار نے پنجاب اسمبلی کے باہر میڈیا سے گفتگو کرتے ہوئے کہا کہ آئی ایم ایف کو خط لکھ کر ملک دشمنی کی ،بانی پی ٹی آئی کا آئی ایم ایف کو خط لکھنے کا اعلان افسوسناک اور قابل مذمت بھی ہے، آپ ذاتی مفادات کے لیے ملکی سلامتی کو خطرے میں ڈال رہے ہیں۔
اسحاق ڈار نے بتایا کہ آئی ایم ایف سے ڈیل ہو گی اتحادی جماعتوں کے ساتھ مشاورت ہو چکی ہے ، آئی ایم ایف کے پروگرام پر تحریک انصاف کے خط کا کوئی اثر نہیں ہو گا۔
وزیر خزانہ کے امیدوار کے حوالے سے سوال پر ن لیگی رہنما نے کہا کہ وزیر خزانہ کون ہوگا اس کا پارٹی لیڈر شپ فیصلہ کرے گی ، نگراں وزیر اعظم کا امیدوار نہیں تھا آئندہ وزیر خزانہ کا فیصلہ بھی پارٹی قائدین کریں گے،ہونا وہی ہے جو اللہ کو منظور ہوگا۔
پنجاب اسمبلی کے اجلاس سے متعلق ان کا کہنا تھا کہ اسپیکر کا کام کسی کو پروڈکشن آرڈر دینا نہیں پہلےدن حلف لینا ہے، اسپیکر کو چاہے تھا کہ قرآن کی تلاوت کے بعد ارکان کا حلف لیتے، حلف کے بعد جو ممبران ہیں وہ ایوان میں بات کرتے، اسپیکر پنجاب اسمبلی خود دو گھنٹے لیٹ آئے، ایوان کی تعداد پوری نا ہونا پہلی بار نہیں۔
اسحاق ڈار نے کہا کہ ماضی میں کئی دفعہ ایسا ہوا ممبران کے نوٹیفکیشن بعد میں ہوتے ہیں ، الیکشن کمیشن نے جو نشستوں کوروکا ہے اس کی کوئی قانونی وجہ ہو گی۔
نواز شریف کے حوالے سوال پر سابق وزیر نے بتایا کہ میاں نواز شریف گھر بیٹھ نہیں گئے اپنی پارٹی کو لیڈ کر رہے ہیں ، ن لیگ کے قائد نواز شریف صوبائی اور قومی اسمبلی کے معاملات کو ڈیل کر رہے ہیں ، اس وقت پورے پاکستان کے لیے چیلنج معاشی مسائل ہیں۔
اسحاق ڈار نے اپنے دور حکومت کا ذکر کرتے ہوئے کہا کہ اس ملک کی معیشت 2017 میں دنیا کی 24 ویں معیشت تھی، ہمارے دور میں چار فیصد مہنگائی تھی 6فیصد جی ڈی پی تھا، بیرون ملک زر مبادلہ ذخائر ریکارڈ سطح پر تھے جو آج تک نہیں ٹوٹا جبکہ اسٹاک مارکیٹ پوری دنیا میں 5ویں اور جنوبی ایشیا میں پہلے نمبر پر تھی لیکن ڈان لیکس اورپاناما ڈرامہ کی وجہ سےمعیشت 24 ویں سے27نمبرپرچلی گئی۔
