لندن: اقوام متحدہ کے سابق سیکریٹری جنرل بان کی مون نے کرونا وائرس کے خاتمے کے لیے چین کی کوششوں پر اطمینان کا اظہار کیا ہے۔
اے آر وائی نیوز کے مطابق بان کی مون لندن میں گلوبل سافٹ پاور سمٹ سے خطاب کر رہے تھے، انھوں نے دنیا میں موجود تنازعات کا جنگوں کی بجائے سافٹ پاور سے حل ڈھونڈنے پر زور دیا۔
بان کی مون سے جب کرونا وائرس اور چینی حکومت کے کردار پر سوال کیا گیا تو انھوں نے چین کی کوششوں کی تعریف کی، اور کہا کہ چین کی حکومت نے تمام دستیاب وسائل کرونا وائرس کے خاتمے پر لگا رکھے ہیں، چین میں لوگوں کی بڑی تعداد اس سے متاثر ہوئی، ہمیں اس بحران سے سیکھنے کی ضرورت ہے۔
انھوں نے کہا مجھے امید ہے کہ چین کی حکومت اور مضبوط قوم اس بحران سے نکل آئے گی۔
کرونا وائرس سے ہلاکتوں کی تعداد 2715 ہو گئی
سمٹ میں موجود پاکستانی صحافیوں نے بان کی مون کی توجہ کشمیر میں موجود کرفیو اور انسانی حقوق کی خلاف ورزیوں کی طرف بھی دلائی، جس پر انھوں نے کہا کہ وہ مسئلہ کشمیر کے حل کے لیے ماضی میں بھی بیانات دے چکے ہیں اور چاہیں گے کہ فریقین اس مسئلے کا پر امن حل نکالیں۔
خیال رہے کہ نہایت مہلک وائرس کووِڈ 19 سے ہلاکتوں کی تعداد 2 ہزار 715 تک پہنچ گئی ہے، گزشتہ چوبیس گھنٹوں میں چین کے اندر مزید 52 افراد وائرس کا شکار ہو کر ہلاک ہو گئے۔
