کراچی : قومی ائیرلائن (پی آئی اے) کے دفاتر میں اچانک بجلی بند ہونے سے طیاروں کی مینٹیننس کاکام رک گیا، جس کے باعث صورتحال مزید سنگین ہورہی ہے۔
کراچی: پی آئی اے کے مختلف دفاتر اور شعبہ جات میں اچانک بجلی بند ہوگئی، جس کے باعث طیاروں کی مینٹیننس کے کام میں مشکلات پیش آ رہی ہیں۔
ذرائع نے بتایا کہ اصفہانی ہینگر، پی آئی اے انجینئرنگ اور ایئرکرافٹ انجینئرز کے دفاتر سمیت کئی شعبہ جات کی بجلی معطل ہے، اچانک بجلی بند ہونے سے اصفہانی ہینگر میں موجود طیاروں کی مینٹیننس کا کام رک گیا۔
ذرائع کا کہنا تھا کہ پی آئی اے ایئرکرافٹ انجینئرزکے دفتر کی بھی بجلی بند ہوگئی جبکہ مختلف شعبہ جات کو کے الیکٹرک سےبجلی فراہمی 3دن سےمعطل ہے، جس کے باعث صورتحال مزید سنگین ہو رہی ہے۔
خیال رہے کراچی میں دو روز سے جاری طوفانی بارشوں کے بعد بجلی کا شدید بحران برقرار ہے، K-الیکٹرک کے 98 فیڈرز اب بھی غیر فعال ہیں جس کے باعث شہر کے بڑے علاقے بجلی سے محروم ہیں۔
ترجمان نے بتایا کہ زیرزمین کیبلز اور سب اسٹیشنز میں پانی داخل ہونے سے بجلی کی فراہمی متاثر ہوئی ہے۔ سرجانی ٹاؤن، یوسف گوٹھ، معین آباد، اسکیم 33، بلدیہ، گلستانِ جوہر، گلشنِ اقبال، بن قاسم، گلشنِ حدید، منگھوپیر اور رزاق آباد سمیت متعدد علاقوں میں بجلی بحال نہ ہوسکی۔
نارتھ کراچی سیکٹر فائیو آئی، اسکیم 33 کی الااشرف اور سائنٹسٹ سوسائٹی، بلدیہ اور ڈی ایچ اے میں بھی 48 گھنٹے سے بجلی غائب ہے، بجلی کی طویل بندش کے باعث گھروں میں پانی کی قلت پیدا ہوگئی ہے۔
شہریوں کا کہنا ہے کہ مونس علوی کے وعدے، نیپرا کو دی گئی یقین دہانیاں اور صوبائی وزیر توانائی ناصر شاہ کی مداخلت کے باوجود صورتحال میں بہتری نہیں آئی۔