کراچی : بلدیہ میں بجلی کی عدم فراہمی کیخلاف عوامی احتجاج پر کے الیکٹرک ترجمان نے وضاحت دے دی۔
اس حوالے سے ترجمان کے الیکٹرک کا کہنا ہے کہ کراچی کے علاقے حب ریور روڈ پر سوات کالونی کے رہائشیوں نے بجلی منقطع کرنے پر احتجاجی مظاہرہ کیا۔
ترجمان کے الیکٹرک کا مؤقف ہے کہ بلدیہ میں کروڑوں روپے کی عدم ادائیگیوں کے باعث نادہندگان کی بجلی منقطع کی گئی۔
انہوں نے بتایا کہ علاقہ معززین کی جانب سے واجب الادا رقم کی ادائیگیوں کی یقین دہانیوں کے بعد بجلی کو بحال کردیا گیا تھا۔
ترجمان کے الیکٹرک کے مطابق منقطع کیے گئے نادہندگان پرواجب الادا رقم32کروڑ سے تجاوز کرچکی ہے، علاقہ مکین وقت پر بجلی کے بلوں کی ادائیگی کو یقینی بنائیں۔
ترجمان کا مزید کہنا تھا کہ وقت پر کی گئی ادائیگیاں علاقے کی لوڈ شیڈنگ میں کمی یا خاتمے کا اہم جز ہیں۔
کراچی : کے الیکٹرک نے واجبات کی عدم ادائیگی پر پاکستان ریلویز کی بجلی منقطع کرنے کا عمل شروع کردیا، ریلویز پر 43 کروڑ واجب الادا ہیں۔
تفصیلات کے مطابق کے الیکٹرک نے پاکستان ریلویز کی بجلی منقطع کرنے کا عمل شروع کردیا، ترجمان نے بتایا کہ پاکستان ریلویزکے 31 کنکشنز پر 43 کروڑ واجب الادا ہیں ، عدم ادائیگی پر ریلویز کو بجلی کی فراہمی جاری رکھنا ممکن نہیں۔
کے ای ترجمان کا کہنا تھا کہ پاکستان ریلویز بجلی کی بحالی کیلئے فوری واجبات ادا کرے۔
ترجمان نے بتایا کہ پاکستان ریلویز کو بجلی منقطع کرنے سے قبل متعدد نوٹسز جاری کیےگئے، ریلوے حکام نے متعدد مرتبہ یقین دہانی کرائی مگر تاحال ادائیگی نہیں ہوئی۔
یاد رہے سندھ ہائیکورٹ نے پاکستان ریلویز کے خلاف کے الیکٹرک کے حق میں حکم جاری کیا تھا۔
کے ای نے پاکستان ریلویز کے ڈیمانڈ نوٹس کے خلاف ہائیکورٹ سے رجوع کیا تھا، جس کا مؤقف تھا کہ پاکستان ریلویز بجلی کے بلوں کی ادائیگی سے بچنے کے لیے دیگر ہتھکنڈے استعمال کر رہا ہے۔
وکیل نے عدالت کو بتایا کہ پاکستان ریلویز کھمبوں اور تاروں کی مد میں مسلسل رقم کا تقاضا کر رہا ہے، قانون کے تحت پاکستان ریلویز کو پیسے مانگنے کا اختیار نہیں ہے، یہ انسٹالیشن کے الیکٹرک کی نجکاری سے پہلے کی ہیں۔
ورجینیا : امریکا میں ایک سانپ نے بجلی کے ٹرانسفارمر میں گھس کر تار کاٹ دیئے جس کے نتیجے میں ہزاروں گھر تاریکی میں ڈوب گئے۔
اپنی نوعیت کا یہ انوکھا واقعہ امریکی ریاست ورجینیا میں پیش آیا جہاں اچانک بجلی غائب ہوگئی اور فوری طور پر اس کی کوئی وجہ بھی سامنے نہیں آسکی کیونکہ تمام ہائی ٹینشن وائر درست حالت میں تھے اور کوئی گرڈ اسٹیشن بھی ٹرپ نہیں ہوا تھا۔
امریکی میڈیا کی رپورٹ کے مطابق بعد ازاں یوٹیلیٹی کمپنی کے حکام نے انکشاف کیا کہ ورجینیا میں بجلی کی فراہمی میں تعطل ایک سانپ کی وجہ سے ہوا جس سے تقریباً 11ہزار 700 صارفین کے گھروں میں اندھیرا چھایا رہا۔
عملے نے بتایا کہ بجلی بندش کی وجہ ایک سانپ تھا جو ہائی وولٹیج تاروں سے ہوتا ہوا پھسل کر ایک ٹرانسفارمر میں داخل ہوگیا۔
رپورٹ کے مطابق تقریباً ڈیڑھ گھنٹے بعد تمام صارفین کی بجلی بحال کر دی گئی، تاہم بندش کے ذمہ دار سانپ کی قسم کی شناخت نہیں ہو سکی۔
کراچی : کے الیکٹرک کی جانب سے گارڈن ویسٹ میں پانچ گھروں کی نادہندگی پر 120 گھرانوں بجلی سے محروم کردیا گیا، اہل علاقہ نے لیاری ایکسپریس وے پر دھرنے کی دھمکی دے دی۔
تفصیلات کے مطابق کراچی میں کے الیکٹرک نے عدالت لگالی، گارڈن ویسٹ میں پانچ گھروں کی نادہندگی پر ایک سوبیس گھرانے بجلی سے محروم کردیے گئے۔
اہل علاقہ کا کہنا ہے کہ گزشتہ روز صبح آٹھ بجے سے بجلی منقطع ہے، شکایات کے باوجود بجلی بحال نہیں کی گئی، بلوں کی بروقت ادائیگی کے باوجودچوبیس گھنٹے سے بجلی سے محروم ہیں۔
اہل علاقہ نے مزید کہا کہ گھروں میں بزرگ اور مریض اذیت کا شکار ہیں،پانی کی موٹریں نہ چلنے کے باعث قلت آب کا مسئلہ بھی پیداہوگیا، آج بجلی بحال نہ ہوئی تو لیاری ایکسپریس وے پر دھرنا دیں گے۔
کراچی/ حب : شہر قائد کے مختلف علاقوں میں گرد آلود تیز ہوائیں چلنے اور بارش کے بعد متعدد علاقوں میں بجلی کی فراہمی بند کردی گئی۔ ایئرپورٹ پر فلائٹ آپریشن بھی متاثر ہوگیا۔
تفصیلات کے مطابق کراچی کے مختلف علاقوں میں گرد آلود سرد ہوائیں چلنے لگیں، ٹھنڈی ہوائیں چلیں تو گرمی کا زور ٹوٹنے سے موسم خوشگوار ہوگیا شہیریوں میں خوشی کی لہر دوڑ گئی۔
نارتھ کراچی سیکٹر 14 بی، سیکٹر 9 ، سرجانی ٹاؤن، نارتھ ناظم آباد، ایف بی ایریا، سہراب گوٹھ ، گلشن اقبال، گلشن حدید میں گرد آلود تیز ہوائیں چلنے کی اطلاعات موصول ہوئی ہیں۔
اس کے علاوہ حب کے علاقوں بیلہ، اوتھل میں طوفانی بارش سے وایارو کے مقام پر ندی میں طغیانی آگئی، حب پولیس کا کہنا ہے کہ بارش کے باعث کراچی کوئٹہ شاہراہ پر ٹریفک کو روک دیا گیا ہے۔
ترجمان کے الیکٹرک کی وضاحت
دوسری جانب تیز ہواؤں کی وجہ سے کے الیکٹرک کی ایکسٹرا ہائی ٹینشن لائن ٹرپ کرگئی جس کے سبب مختلف علاقوں میں بجلی کی فراہمی بند ہوگئی۔
اس حوالے سے ترجمان کے الیکٹرک کا کہنا ہے کہ شہر کے محدود علاقوں سے بجلی فراہمی میں تعطل کی اطلاع موصول ہوئی ہے۔ کےالیکٹرک کا سسٹم مستحکم ہے اور تمام گرڈز پر بحالی کا کام شروع کردیا گیا ہے۔
ترجمان کا کہنا ہے کہ عارضی تعطل نیشنل گرڈ میں ٹرپنگ کے باعث پیش آیا، تاہم سسٹم مستحکم ہے، آنے والے عارضی تعطل کو فوری بحال کر دیا جائے گا، تیز ہواؤں اور بارش کی صورت میں شہری احتیاط برتیں۔
علاوہ ازیں کراچی ایئرپورٹ پر بجلی کی فراہمی بند ہونے سے فلائٹ آپریشن متاثر ہوا ہے، مسافروں کی بورڈنگ، چیکنگ ان اور امیگریشن کا سلسلہ رک گیا، انتظامیہ کا کہنا ہے کہ رن وے ایریاز کو جنریٹرکے ذریعے چلایا جارہا ہے۔
کوئٹہ: صوبہ بلوچستان کے دارالحکومت کوئٹہ میں ایوب اسپورٹس کمپلیکس کی بجلی منقطع کردی گئی، واجبات کی عدم ادائیگی بجلی منقطع کرنے کا سبب بنی۔
تفصیلات کے مطابق صوبائی محکمہ کھیل کی جانب سے واجبات کی عدم ادائیگی پر کوئٹہ کے ایوب اسپورٹس کمپلیکس کی بجلی منقطع کردی گئی۔
بجلی کی سپلائی معطل ہونے پر نیشنل گیمز کے کئی ایونٹس متاثر ہوگئے۔
ذرائع کا کہنا ہے کہ محکمہ کھیل کے ذمے کوئٹہ الیکٹرک سپلائی کمپنی (کیسکو) کے 39 لاکھ 14 ہزار 423 روپے کے واجبات ہیں۔
دوسری جانب ڈی جی اسپورٹس کا کہنا ہے کہ کیسکو کو ادائیگی کردی گئی ہے، 20 منٹ میں بجلی بحال ہوجائے گی، انہوں نے کہا کہ کیسکو حکام دوبارہ بجلی کا کنکشن لگا رہے ہیں۔
