اسلام آباد : ملک بھر میں بجلی کی غیر اعلانیہ لوڈ شیڈنگ پہلے کی طرح بدستورجاری ہے، بجلی کا مجموعی شارٹ فال 7 ہزار میگا واٹ سے تجاوز کرگیا، لوگوں نے جگہ جگہ احتجاج شروع کردیا، وزارت پانی و بجلی کی نااہلی پر وزیراعظم بھی ناراض ہوگئے۔
تفصیلات کے مطابق نواز لیگ کی حکومت کو چار سال ہو گئے لیکن اقتدار سے قبل حکمرانوں کی جانب سے کیے گئے بڑے بڑے وعدے اور دعوے آج بھی عوام کو منہ چڑ ارہے ہیں۔
ملک بھر کی سیاسی و مذہبی جماعتیں اگلے عام انتخابات کی تیاریوں کا آغاز بھی کرنے والی ہیں لیکن بجلی کا بحران مبینہ طور پر آج بھی وہیں کھڑا ہے جہاں آج سے پانچ سال پہلے تھا، ذرائع کے مطاق ملک بھرمیں بجلی کا مجموعی شارٹ فال7ہزار میگا واٹ سے تجاوز کرگیا ہے، بجلی کی طلب 20ہزار میگا واٹ ہے جبکہ اس کی پیداوار12 ہزار900 میگا واٹ تک ہے۔
ملک کے بڑے شہروں میں 10 گھنٹے جبکہ چھوٹے شہروں اوردیہات میں 16،16 گھنٹے کی غیر اعلانیہ لوڈ شیڈنگ کی جا رہی ہے جبکہ پنجاب میں اوورلوڈنگ کےباعث گرڈ اسٹیشن بند کئےجارہےہیں۔
ذرائع کا کہنا ہے کہ حکومت بجلی کی بڑھتی ہوئی لوڈشیڈنگ سے متعلق وضاحت دینے کو بھی تیار نہیں ہے۔ بجلی کی حالیہ صورتحال پر وزیراعظم نواز شریف پانی و بجلی کے وزراء کی کارکردگی پر برہم ہوگئے۔ غصہ اہلکاروں پر نکالنے کیلئے کارروائی کا حکم دے دیا۔
بجلی کا بحران : وزیراعظم کا وزراء پر اظہار برہمی
ملک بھر میں بدترین لوڈشیڈنگ اور پانی کی کمی کے معاملے پر میٹنگ ہوئی تو وزیراعظم کی نظریں وزارت پانی و بجلی کے وزرا پر رہیں۔ متعلقہ محکموں کی کی جانب سے کوتاہی برتنے پر عدم اطمینان کا اظہار بھی کردیا، مخالفین پر برق بن کر گرنے والے وزراء عوام کو بجلی فراہم کرنے میں ناکام نظر آتے ہیں۔
اجلاس کے دوران ہر بات پر اپوزیشن کو لتاڑنے کیلئے تیار رہنے والے وزراء نواز لیگ پر تنقید کی وجہ بننے والے لوڈ شیڈنگ کے مسئلے پرتسلی بخش جواب نہ دے سکے، میٹنگ کے دوران گرمی کو لوڈ شیڈنگ کی وجہ قرار دینے پر وزیراعظم نے ناراضگی کا اظہار کیا۔
انہوں نے بجلی کی لوڈ شیڈنگ پر وزارت پانی و بجلی کے اہلکاروں کے خلاف کارروائی کی ہدایت کردی کہ بروقت منصوبہ بندی نہ ہونے پراہلکاروں پرذمہ داری عائد کی جائے، اگرچہ وزیراعظم نے وزارت پانی و بجلی کے اہلکاروں کے خلاف کارروائی کی ہدایت کی لیکن یقیناً وزیراعظم اپنے وزرا سے یہی کہہ رہے ہوں گے کہ کوئی شرم ہوتی ہے کوئی حیا ہوتی ہے۔
ملک بھر کے شہروں میں مشتعل عوام سڑکوں پر
ملک کے مختلف شہروں میں غیر اعلانیہ لوڈ شیڈنگ کا سلسلہ تاحال جاری ہے، لوڈ شیڈنگ کے خاتمے کے دعویدار وزیر اعلیٰ پنجاب شہباز شریف کے حلقے میں بدترین لوڈشیڈنگ کے باعث مشتعل عوام سڑکوں پر آگئے۔ لاہور، گوجرانوالہ، راولپنڈی، ملتان سرگودھا، پشاور اور دیگر شہروں و مضافات میں لوگوں کا سخت گرمی میں بجلی کی عدم فراہمی سے برا حال ہے۔
لاہور میں لوڈ شیڈنگ کے خاتمے کے دعویدار شہباز شریف کے حلقے میں بدترین لوڈشیڈنگ ہو رہی ہے، حکمرانوں کے شہر میں لوڈشیڈنگ کے باعث لاہور کے شہری شدید پریشان ہیں، لوڈشیڈنگ سے ستائے لاہوریوں نے ٹائر نذر آتش کیے۔ ان کا کہنا ہے کہ بجلی کئی کئی گھنٹے نہیں آتی، اگر آبھی جائے تو ہرگھنٹے بعد چلی جاتی ہے۔
فیصل آباد میں عابد شیر علی کےحلقے میں بھی شہریوں کا پارہ ہائی ہوگیا، عابد شیر علی کا اپنا حلقہ بھی بدترین لوڈ شیڈنگ کی زد میں ہے۔
سرگودھا میں بھی بجلی کی غیر اعلانیہ بندش نے شہریوں کا پارہ ہائی کر رکھا ہے، چارسدہ میں لوڈشیڈنگ کے ستائے عوام سڑکوں پر نکل آئے، مظاہرین نے واپڈا کا علامتی جنازہ نکالااور سڑکوں پرمارچ کیا۔
گوجرانوالہ میں غیراعلانیہ لوڈشیڈنگ کادورانیہ 12گھنٹے سےتجاوز کرگیا، شدید گرمی میں بجلی کی بندش سےشہریوں کو مشکلات کا سامنا کرنا پڑ رہاہے۔
راولپنڈی میں گرمی کی شدت اورشارٹ فال بڑھنے سے لوڈشیڈنگ میں اضافہ ہوگیا، راولپنڈی شہر اور ملحقہ علاقوں میں10سے12گھنٹے بجلی کی لوڈشیڈنگ کی جارہی ہے، صادق آباد، اقبال ٹاؤن، ڈھوک رتہ، گلستان کالونی، چکلالہ اسکیم3، ولایت ہومز، پشاور روڈ لائن نمبر4 میں بھی لوڈشیڈنگ کا سلسلہ جاری ہے۔
ملتان میں بجلی کی لوڈشیڈنگ کیخلاف نواں شہرچوک پرتحریک انصاف کے کارکنان نے احتجاجی مظاہرہ کیا، مظاہرین حکومت کیخلاف شدید نعرے بازی کرتے رہے، ان کا کہنا تھا کہ چھ ماہ میں لوڈشیڈنگ ختم کرنے کا دعویٰ کرنے والوں نے شارٹ فال مزید بڑھا دیا، لوڈشیڈنگ کا خاتمہ نہ ہو نے پر شہبازشریف اپنا نام تبدیل کریں۔
سکھرمیں لوڈشیڈنگ کی وجہ سے شہر ی رل گئے۔ سول اسپتال کے ہیٹ اسٹروک سینٹر میں مریض ہاتھ سے پنکھا جھلنے پر مجبور ہیں کوئی پرسان حال نہیں، ملک بھر میں بڑھتی لوڈشیڈنگ کیخلاف ملک کی دوسری بڑی جماعت پیپلز پارٹی نے بھی سڑکوں پر نکلنے کا اعلان کر رکھا ہے۔
کراچی میں کےالیکٹرک کےخلاف جماعت اسلامی کا دھرنا آج ہوگا، یہ دھرنا شفیق موڑ پر کےالیکٹرک کے دفترکے باہردیا جائے گا، دھرنےسےجماعت اسلامی کراچی کےامیرحافظ نعیم الرحمان خطاب کرینگے۔
