ARYNews.tv | Urdu – Har Lamha Bakhabar

Tag: بجلی کی بندش

  • کراچی میں بجلی کی بندش نے ماضی کے تمام ریکارڈ توڑ دیئے

    کراچی میں بجلی کی بندش نے ماضی کے تمام ریکارڈ توڑ دیئے

    کراچی : شہر کے مختلف علاقوں میں بجلی کی بندش نے ماضی کے تمام ریکارڈ توڑ دیے، بارش کےکئی دن بعد بھی مختلف علاقوں کی بجلی بحال نہ ہوسکی۔

    تفصیلات کے مطابق کراچی میں حالیہ بارش کے کئی دن گزرنے کے باوجود کے الیکٹرک کا ترسیلی نظام مکمل طور پر بحال نہ ہوسکا، شہر کے مختلف علاقوں میں گھنٹوں بجلی بند رہنے سے شہری شدید مشکلات میں مبتلا ہیں۔

    ذرائع نے کہا ہے کہ نیپرا کو دی جانے والی یقین دہانی کے باوجود صورتحال جوں کی توں ہے اور متعدد فیڈر، پی ایم ٹیز اور زیر زمین کیبل فالٹس کے باعث بجلی کی فراہمی معطل ہے۔

    شہر کے مختلف علاقوں میں بجلی کی بندش نے ماضی کے تمام ریکارڈ توڑ دیے، معین آباد، ماڈل کالونی، گلستان جوہر، گلشن اقبال، نارتھ ناظم آباد، سرجانی، اسکیم 33 اور گڈاپ سمیت کئی علاقوں میں گھنٹوں بجلی بند رہتی ہے۔

    مزید پڑھیں : بجلی کی طویل بندش : شہریوں کا کے الیکٹرک کے دفتر کے باہر ڈھول کی تھاپ پر رقص

    ماڈل کالونی، معین آباد، امیرآباد اور صدیق آباد میں پانچ روز بعد بحال ہونے والی بجلی ایک بار پھر بند ہوگئی، شہریوں کا کہنا ہے کہ گزشتہ رات بارہ بجے سے بجلی کی فراہمی معطل ہے جس سے معمولاتِ زندگی مفلوج ہوکر رہ گئے ہیں۔

    ادھر اسکیم 33 کے میرٹھ سوسائٹی اور شادمان 14-B میں بھی طویل لوڈشیڈنگ جاری ہے، شہریوں نے بجلی کی عدم فراہمی پر شدید احتجاج کرتے ہوئے کے الیکٹرک اور انتظامیہ سے فوری نوٹس لینے کا مطالبہ کیا ہے۔

  • میوزک فیسٹیول میں بجلی بند ہونے پر درجنوں افراد کے موبائل چوری

    میوزک فیسٹیول میں بجلی بند ہونے پر درجنوں افراد کے موبائل چوری

    بھارت میں ایک میوزک فیسٹیول کے دوران اچانک بجلی بند ہونے پر درجنوں لوگ اپنے موبائل فون سے محروم ہوگئے۔

    تفصیلا کے مطابق گروگرام میں ایک میوزک فیسٹیول میں جاری تھا کہ اسی دوران بجلی کی بندش کا واقعہ پیش آیا۔ اتنی سی دیر میں دو درجن سے زیادہ موبائل فون چوری کرلیے گئے۔ پولیس نے 12 مشتبہ افراد کو گرفتار کرتے ہوئے کچھ مسروقہ موبائل فون برآمد کر لیے۔

    پولیس نے بتایا کہ گروگرام کے بیک یارڈ اسپورٹس کلب میں منعقد ہونے والے میوزک فیسٹیول میں دو درجن سے زیادہ موبائل فون چوری ہونے کی اطلاع ملی تھی۔ اتوار کو سنبرن فیسٹیول میں پاور ٹرپ کے دوران مذکورہ واقعات پیش آئے۔

    پولیس کا کہنا تھا کہ جب پنڈال میں اچانک بجلی کا بریک ڈاؤن ہوا تو وہاں تقریباً 10 کے قریب لوگ موجود تھے۔ تاہم جیسے ہی بجلی بحال ہوئی تو کئی افراد اپنے فون سے محروم ہوچکے تھے۔

    حکام کا کہنا ہے کہ انھوں نے موقع سے 12 مشتبہ افراد کو گرفتار کیا اور ان سے چوری شدہ دو موبائل فون بھی برآمد کر لیے ہیں۔

    سیکٹر 65 پولیس اسٹیشن کے ڈی سی پی سدھانت جین نے بتایا کہ پولیس کو صرف سات لوگوں کی جانب سے شکایات موصول ہوئی ہیں۔ ہم نے فوری کارروائی کرتے ہوئے 12 مشتبہ افراد کو گرفتار کیا اور دو چوری شدہ موبائل برآمد کیے

    اتر پردیش کے رہائشی ہمانشو وجے سنگھ نے بتایا کہ میوزک فیسٹول میں بجلی جانے کے بعد وہ اور ان کی بیوی اونتیکا پودار دونوں ہی اپنے موبائل فون سے محروم ہو گئے۔

  • ملک بھر میں بجلی کے بریک ڈاؤن کے خلاف لاہور ہائی کورٹ میں درخواست دائر

    ملک بھر میں بجلی کے بریک ڈاؤن کے خلاف لاہور ہائی کورٹ میں درخواست دائر

    لاہور: ملک بھر میں بجلی کے بریک ڈاؤن کے خلاف لاہور ہائی کورٹ میں درخواست دائر کردی گئی، جس میں ذمہ داروں کے خلاف کاروائی کی استدعا کی ہے۔

    تفصیلات کے مطابق لاہورہائیکورٹ میں بجلی کی بندش کے خلاف درخواست دائرکر دی گئی ، درخواست اظہر صدیق ایڈووکیٹ کی جانب سےدائر کی گئی۔

    درخواست میں مؤقف اختیار کیا گیا کہ گزشتہ روز بجلی کاجانا نیشنل انٹرسٹ کےخلاف ہے، بجلی کی بندش کے باعث کوئی بھی اپنے مذموم مقاصدپورےکر سکتا ہے۔

    درخواست میں کہا گیا کہ موجودہ حکومت اور وفاقی وزیربجلی و پیدوار بری طرح ناکام ہوچکے ہیں۔

    درخواست گزار کا کہنا تھا کہ حکومت عوام کو سہولیات فراہم کرنےمیں مکمل طورپرناکام ہو چکی ہے، ملک پہلےہی بحران کا شکار ہےانڈسٹریاں بند ہورہی ہیں۔

    درخواست میں استدعا کی گئی کہ بجلی بندش کے ذمہ داروں کے خلاف کاروائی کی جائے۔

  • ایران سے بجلی کی فراہمی بند، مکران میں 2 دن سے بجلی غائب

    ایران سے بجلی کی فراہمی بند، مکران میں 2 دن سے بجلی غائب

    گوادر: صوبہ بلوچستان کے علاقے مکران میں ایران سے آنے والی بجلی کی فراہمی ایک بار پھر بند کردی گئی، نیشنل گرڈ سے منسلک نہ ہونے پر مکران کی بجلی کا دار و مدار ایران پر ہے۔

    تفصیلات کے مطابق صوبہ بلوچستان کے علاقے مکران میں بجلی کی فراہمی گزشتہ روز سے بند ہے جس کے باعث مکران کے تینوں اضلاع متاثر ہیں۔

    مقامی افراد کا کہنا ہے کہ 24 گھنٹےمیں بجلی صرف رات میں 4 گھنٹے دستیاب ہوتی ہے۔

    واپڈا ذرائع کے مطابق کم پاور کی وجہ سے ایران نے مکران کی بجلی بند کردی ہے، نیشنل گرڈ سے منسلک نہ ہونے پر مکران کی بجلی کا دار و مدار ایران پر ہے۔

    مقامی افراد کا کہنا ہے کہ گزشتہ دنوں بھی 2 ہفتے تک مکران کی بجلی منقطع رہی تھی۔

  • کراچی: مینٹیننس کے نام پر 15 گھنٹے سے زائد بجلی بند

    کراچی: مینٹیننس کے نام پر 15 گھنٹے سے زائد بجلی بند

    کراچی: صوبہ سندھ کے دارالحکومت کراچی میں اتوار کے روز کے الیکٹرک نے بجلی کی مینٹیننس کے نام پر 15 گھنٹے سے زائد بجلی بند کیے رکھی، وزیر اعلیٰ سندھ نے کے الیکٹرک کو لاک ڈاؤن میں بجلی بند نہ کرنے کی ہدایت کی تھی جس کی حسب معمول دھجیاں اڑا دی گئیں۔

    تفصیلات کے مطابق شہر قائد میں لاک ڈاؤن کے باوجود کراچی میں بجلی کی لوڈ شیڈنگ جاری ہے، اتوار کے روز مینٹیننس کے نام پر شہر کے مختلف علاقوں میں 15 گھنٹے سے زائد بجلی بند رکھی گئی۔

    کے الیکٹرک سے جاری شدہ مسیج کے مطابق صبح 8 سے رات 9 بجے تک بجلی بند رہے گی تاہم شہریوں کے مطابق صبح 8 بجے سے بند بجلی رات 11 بجے تک بھی بحال نہ ہوسکی۔

    کراچی کے مختلف علاقوں کورنگی، اورنگی، سرجانی ٹاؤن، لیاقت آباد، اسکیم 33، گلشن معمار، کیماڑی، نارتھ ناظم آباد، قائد آباد اور ملیر میں بھی تاحال بجلی کی آنکھ مچولی کا سلسلہ جاری ہے۔

    یاد رہے کہ وزیر اعلیٰ سندھ سید مراد علی شاہ نے کے الیکٹرک کو لاک ڈاؤن میں بجلی بند نہ کرنے کی ہدایت کی تھی۔

    دوسری جانب ترجمان کے الیکٹرک کا کہنا ہے کہ بجلی کی بہتر فراہمی کے لیے مینٹیننس شٹ ڈاؤن ضروری ہے، بجلی چوری اور نقصانات والے علاقوں میں قواعد و ضوابط کے مطابق لوڈ شیڈنگ کی جاتی ہے۔

    ترجمان کے مطابق کورنگی، اورنگی، سرجانی ٹاؤن، لیاقت آباد اور لیاری میں بجلی کی فراہمی جاری ہے، شہری علاقائی فالٹس کی درستگی کے لیے 118 یا کے الیکٹرک کے سوشل میڈیا پلیٹ فارمز پر رابطہ کریں۔

  • فیصل آباد میں گزشتہ 40 گھنٹے سے بجلی بند

    فیصل آباد میں گزشتہ 40 گھنٹے سے بجلی بند

    لاہور: صوبہ پنجاب کے شہر فیصل آباد میں گزشتہ 20 سے 40 گھنٹے سے بجلی بند رہی جس پر وفاقی وزیر برائے توانائی حماد اظہر نے فیسکو کے متعدد افسران کو معطل کردیا۔

    تفصیلات کے مطابق صوبہ پنجاب کے شہر فیصل آباد میں 20 سے 40 گھنٹے کی بجلی بندش پر وفاقی وزیر برائے توانائی حماد اظہر نے نوٹس لے لیا۔

    وزیر توانائی حماد اظہر نے چیف ایگزیکٹو فیسکو ارشد منیر پر سخت برہمی کا اظہار کیا، انہوں نے ایس ڈی او مدینہ ٹاؤن فرخ پرویز، ایکسین آپریشن عبد اللہ پور امجد اور ایس ای فرسٹ مبشر حسین کو معطل کر دیا۔

    سماجی رابطے کی ویب سائٹ ٹویٹر پر ٹویٹ کرتے ہوئے حماد اظہر نے کہا کہ عید پر فیسکو افسران کی کارکردگی مایوس کن رہی، سستی کا مظاہرہ کرنے والے افسران کی معطلی کی ہدایات کردی ہے۔

    انہوں نے کہا کہ فیسکو بورڈ آف گورنرز کو بھی انکوائری کی ہدایات کی ہیں۔

  • کراچی میں بجلی کی بندش جاری، رمضان میں بھی ریلیف نہ ملنے کا امکان

    کراچی میں بجلی کی بندش جاری، رمضان میں بھی ریلیف نہ ملنے کا امکان

    کراچی : ماہ رمضان کی آمد آمد اور گرمی کی شدت بھی اپنے عروج پر ہے لیکن شہریوں کو بجلی فراہم کرنے کے ذمہ دار ادارے کے الیکٹرک کی من مانیاں پہلے کی طرح جاری ہیں۔

    ہر سال کی اس سال بھی شہر قائد کے باسیوں کو ماہ رمضان میں بجلی کی لوڈ شیڈنگ کا سامنا کرنا پڑے گا، اور سحری بھی اندھیرے میں کرنی پڑے گی، کراچی کی عوام کو ماہ رمضان میں کسی ریلیف کی امید نہیں ہے۔

    شہر کے مختلف علاقوں گلستان جوہر، کورنگی میں میں دس گھنٹے کی بجلی کی لوڈشیڈنگ کا سلسلہ جاری ہے۔ لانڈھی چراغ ہوٹل، زمان آباد، لانڈھی نمبر2اور 3، ناصر کالونی، کورنگی ایک، ڈھائی،تین،4نمبر، کورنگی نمبر5ایریا36سی میں بجلی کی آنکھ مچولی سے پریشان شہری بلبلا اٹھے۔

    مزید پڑھیں: کراچی میں لوڈ شیڈنگ کا جن بے قابو، شہریوں کی زندگی اجیرن بن گئی

    مختلف علاقوں میں چار چار بار غیراعلانیہ لوڈشیڈنگ معمول بن گیا ہے جبکہ لوڈشیڈنگ سے مستثنیٰ علاقوں میں بھی بجلی بند ہے، دن تو دن رات کو بھی بجلی گھنٹوں غائب رہتی ہے، بجلی کی بندش سے پانی کی قلت بھی بحرانی صورت اختیار کر گئی۔ عوام دہرے عذاب کا شکار ہیں۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔ 

  • شہر قائد میں 10 گھنٹے تک بجلی کی بندش، عوام بے حال

    شہر قائد میں 10 گھنٹے تک بجلی کی بندش، عوام بے حال

    کراچی: شہر قائد میں اعلانیہ کے ساتھ ساتھ غیر اعلانیہ لوڈ شیڈنگ کا سلسلہ بھی شروع ہوگیا۔

    اے آر وائی نیوز کے نمائندہ کراچی رضوان عامر کے مطابق گرمی میں اضافہ ہوتے ہی غیر اعلانیہ لوڈ شیڈنگ میں بھی اضافہ ہوگیا ہے، شہر میں 8 تا 10 گھنٹے لوڈ شیڈنگ کی جارہی ہے اور بعض علاقوں میں رات بھر بجلی فیل رہتی ہے۔


    دوسری جانب کے الیکٹرک کا موقف ہے کہ شہر میں صرف چار تا چھ گھنٹے کی اعلانیہ لوڈ شیڈنگ کی جارہی ہے۔
    بجلی کی بندش کے سبب شہر میں پانی کا بحران بھی پیدا ہوگیا ہے، مختلف علاقوں میں لوگ پانی بھرنے پر مجبور ہوگئے ہیں، بجلی فیل ہونے سے عوام کی مشکلات بڑھ گئی ہیں۔
    اطلاعات ہیں کہ سرجانی، اورنگی، لیاری کورنگی اور لانڈھی میں آٹھ تا 10 گھنٹے جب کہ ناظم آباد، نارتھ ناظم آباد،نارتھ کراچی ، شاہ فیصل اور ملیر میں 4 سے 6 گھنٹے کی لوڈ شیڈنگ کی جارہی ہے۔

    لوڈشیڈنگ 2018 میں بھی ختم نہیں ہوگی، حکومت کا اعتراف

    دوسری جانب وزارت پانی و بجلی نے اعتراف کیا ہے کہ سال 2018ء تک بجلی کی لوڈ شیڈنگ کا خاتمہ نہیں ہوسکے گا۔

  • حیدر آباد میں بجلی کی بندش،خواجہ سرا بھی سڑک پر نکل آئے

    حیدر آباد میں بجلی کی بندش،خواجہ سرا بھی سڑک پر نکل آئے

    حیدر آباد: بجلی کی بندش کے خلاف عام شہریوں کی طرح اب خواجہ سرا بھی سڑک پر نکلآئے اور شہریوں کے شانہ بشانہ احتجاج میں حصہ لیتے ہوئے حکومت اور بجلی فراہم کرنے والے ادارے کے خلاف اپنے مخصوص انداز میں نعرے بازی کی۔

    اطلاعات کے مطابق بجلی کی طویل بندش کے خلاف سبزی منڈی چوک پر احتجاجی مظاہرہ کیا گیا جس میں خواجہ سرا بھی شریک ہوئے اور حکومت کے خلاف نعرے بازی کی۔خواجہ سرائوں نے اپنے مخصوص انداز میں بجلی کی بندش کے ذمہ داروں کو آڑے ہاتھوں لیا۔

    خواجہ سراؤں کا کہنا تھا کہ شدید گرمی اور رمضان المبارک کے مقدس ماہ کے باوجود بجلی کی طویل بندش نے زندگی اجیرن کردی ہے،چار دن سے بجلی کا ٹرانسفر خراب پڑا ہے کئی بار شہریوں نے درخواستیں دیں لیکن اسے کوئی ٹھیک کرنے نہیں آیا اس لیے مجبور ہوکر سڑکوں پر آنا پڑا۔

    خواجہ سرائوں نے اپنے مخصوص انداز میں احتجاج کرتے ہوئے کہا کہ گرمی سے لوگ بیمار ہورہے ہیں اور دو خواجہ سرا انتقال کرگئے، حکومت ضعیف العمر شہریوں کا تو خیال کرے اور بجلی کی مسلسل بحالی کے لیے لازمی اقدامات کرے۔

    خواجہ سراؤں اور شہریوں نے اس موقع پر بجلی فراہم کرنے والے ادارے کے خلاف شدید نعرے بازی کی اور حکومت سے اس ادارے کے خلاف اور بالخصوص ماہ رمضان میں بجلی کی مسلسل فراہمی کا پرزورمطالبہ کیا۔

    پولیس کا لاٹھی چارج،کئی مظاہرین کو حراست میں لے لیا

    حیدر آباد فرید آباد کے علاقے میں ہونے والے احتجاج پر پولیس نے دھاوا بول دیا، لاٹھی چارج کرتے ہوئے کئی شہریوں کو گرفتار کرلیا۔

    اے آر وائی نیوز کے نماندے آفتاب زئی کے مطابق احتجاجی مظاہرے کے دوران پولیس نے لاٹھی چارج کرتے ہوئے متعدد مظاہرین کو گرفتار کرلیا، قبل ازیں مظاہرین نے ٹائر جلائے اور کافی دیر تک سڑک کو ٹریفک کے لیے بند رکھا جس پر پولیس وہاں پہنچ گئی۔

    دوسری جانب مظاہرین نے الزام عائد کیا کہ پولیس نے ہوائی فائرنگ کی اور لاٹھی چارج کیا ہم بجلی کی بحالی کے لیے پرامن احتجاج کررہے تھے۔

  • کراچی: پانی اور بجلی کی بندش، شہری سڑکوں پر نکل آئے

    کراچی: پانی اور بجلی کی بندش، شہری سڑکوں پر نکل آئے

    کراچی : پاک کالونی کے رہائشیوں نے پانی وبجلی کی عدم فراہمی کے خلاف احتجاج کرتے ہوئے حبیب بینک چورنگی روڈ کو ٹریفک کے لئے بند کردیا ہے۔

    پاک کالونی کے مکین علاقہ میں پانی کی عدم فراہمی اور بجلی کی طویل لوڈشیڈنگ کیخلاف بھپر گئے، مشتعل مظاہرین نے احتجاجا ٹائر نذرآتش کئے اور سڑک بلاک کردی ۔

     احتجاج کے باعث ناظم آباد سے سائٹ ایریا کو جانے والی ٹریفک معطل ہوکر رہ گئی،جس سے ارد گرد کے علاقوں میں شدید ٹریفک جام ہوگیا۔

    ٹریفک جام کے باعث کئی گاڑیوں کا ایندھن ختم ہوگیا، آفس جانے اوردفاتر سے واپس آنے والوں کو شدید مشکلات کا سامنا کرنا پڑا ہے۔

       آٹھ گھنٹے بعد حکومتی نمائندوں نے مظاہرین سے با چیت کر کے انہیں سڑکیں کھولنے پررضا مند کر لیا جس کے بعد دھرنا ختم اور ٹریفک بحال ہوگیا ۔