اسلام آباد : ملک بھر کے بجلی صارفین کے لیے بجلی سستی ہونے کی دوہری خوشخبری آگئی ، اربوں روپے ریلیف کا امکان ہے۔

تفصیلات کے مطابق نیشنل الیکٹرک پاور ریگولیٹری اتھارٹی (نیپرا) کو دو مختلف درخواستیں موصول ہوئی ہیں، جن میں بجلی کی قیمتوں میں کمی کی سفارش کی گئی ہے۔ اگر دونوں درخواستیں منظور ہو جاتی ہیں تو صارفین کو اربوں روپے کا ریلیف مل سکتا ہے۔

سہ ماہی ایڈجسٹمنٹ کی مد میں فی یونٹ 1 روپے 75 پیسے کمی کی درخواست

سنٹرل پاور پرچیزنگ ایجنسی (CPPA) نے نیپرا کو مالی سال 2024-25 کی چوتھی سہ ماہی کے لیے بجلی کی قیمت میں 1 روپے 75 پیسے فی یونٹ کمی کی باقاعدہ درخواست جمع کرا دی ہے، نیپرا اس درخواست پر 4 اگست کو سماعت کرے گا۔

درخواست کی منظوری کی صورت میں صارفین کو 53 ارب 39 کروڑ روپے سے زائد کا مجموعی ریلیف ملنے کا امکان ہے۔

سہ ماہی ایڈجسٹمنٹ کا اطلاق کے الیکٹرک سمیت تمام سرکاری تقسیم کار کمپنیوں (DISCOs) پر ہوگا۔

مزید پڑھیں : 200 یونٹ بجلی استعمال کرنے والے صارفین کیلیے بڑی خبر، حکومت نے اہم فیصلہ کر لیا

ذرائع کا کہنا ہے کہ اگر ستمبر، اکتوبر اور نومبر کے لیے ایڈجسٹمنٹ بھی منظور ہوگئی تو فی یونٹ 2 روپے 10 پیسے تک کا مزید ریلیف ممکن ہے۔

فیول ایڈجسٹمنٹ کی مد میں 65 پیسے فی یونٹ کمی کی دوسری درخواست

نیپرا کو ایک اور درخواست جون 2024 کی ماہانہ فیول ایڈجسٹمنٹ کی مد میں دی گئی ہے، جس میں بجلی کی قیمت میں 65 پیسے فی یونٹ کمی کی سفارش کی گئی ہے، اس درخواست پر نیپرا کل سماعت کرے گا۔

درخواست کے مطابق جون میں بجلی کی فی یونٹ پیداواری لاگت 7 روپے 68 پیسے رہی، جب کہ ریفرنس لاگت 8 روپے 33 پیسے فی یونٹ مقرر تھی۔

درخواست میں بتایا گیا ہے کہ مجموعی طور پر جون میں 13 ارب 31 کروڑ یونٹس سے زائد بجلی پیدا کی گئی جبکہ پیداواری لاگت میں کمی کی وجہ پن بجلی کی پیداوار میں اضافہ ہے، جو جون کے مہینے میں 39 فیصد رہی۔

اس کے علاوہ مقامی و درآمدی کوئلے سے 20 فیصد اور درآمدی RLNG سے 16 فیصد بجلی حاصل کی گئی۔

تاہم نیپرا ان دونوں درخواستوں پر سماعت کے بعد بجلی کی قیمتوں میں کمی سے متعلق حتمی فیصلہ جاری کرے گا۔

اگر دونوں درخواستیں منظور ہو جاتی ہیں تو عوام کو ستمبر، اکتوبر اور نومبر کے مہینوں میں نمایاں مالی ریلیف ملے گا، جو مہنگائی کے اس دور میں ایک بڑی سہولت ہو گی۔

اسلام آباد : سینیٹ کی قائمہ کمیٹی نے بجلی کی قیمتوں میں کمی کے لئے کیپٹیو پاور پلانٹس لیوی بل 2025 متفقہ طور پر منظور کرلیا۔

تفصیلات کے مطابق سینیٹر انوشہ رحمان کی زیر صدارت سینیٹ کی قائمہ کمیٹی خزانہ کا اجلاس ہوا، کمیٹی نے کیپٹیو پاور پلانٹس لیوی بل 2025 متفقہ طور پر منظور کرلیا۔

سیکرٹری پیٹرولیم ڈویژن نے بتایا کہ بل لانے کا مقصد کیپسٹی یوٹیلائزیشن کا بوجھ کم کرنا ہے، عام عوام کیلئے بجلی کی قیمتوں میں کمی کیلئے یہ بل لایا جارہا ہے۔

ان کا کہنا تھا کہ آرڈیننس کے جاری ہونے کے بعد فوری طور پر 5فیصد لیوی عائد ہوئی، جولائی 2025 سے کیپٹیو پاور پلانٹس پر لیوی کی شرح 10 فیصد ہوگی جبکہ فروری 2026 میں لیوی 15 فیصد اور اگست میں 20 فیصد عائد ہوگی۔

ایڈیشنل سیکرٹری خزانہ نے کہا کہ کیپٹیو پاور پلانٹس کو بند کرنے کا کہا گیا تھا اور پھر کمپنیاں عدالت میں چلی گئیں، اسی لئے حکومت نے فیصلہ کیا کہ اس کو بند کئے بغیر لیوی عائد کی جائے۔

کراچی : ملک بھر کی برنس کمیونٹی نے بجلی کی قیمتوں میں کمی کو ٹھنڈی ہوا کا جھونکا قراردے دیا اور کہا عوام اور تاجر برادری میں امید کی کرن جاگی ہے۔

تفصیلات کے مطابق بجلی کی قیمتوں میں کمی پر وزیراعظم شہباز شریف کے حالیہ اعلان کے بعد تاجر برادری کے تاثرات سامنے آئے۔

ملک بھر کی بزنس کمیونٹی نے وزیراعظم کی طرف سے بجلی کی قیمتوں میں کمی کا خیر مقدم کرتے ہوئے کہا کہ بجلی کی قیمتوں میں کمی سے معاشی سرگرمیوں میں اضافہ ہوگا۔

بزنس کمیونٹی کا کہنا تھا کہ بجلی قیمتوں میں کمی سے پیداواری لاگت میں کمی، برآمدات میں اضافہ ہوگا، بجلی سستی کرنے کا اقدام معیشت کیلئے ٹھنڈی ہوا کا جھونکا ہے۔

تاجر برادری نے کہا کہ بجلی کی قیمتوں میں کمی سے بہت اچھے رزلٹ آئیں گے، وزیراعظم نے کہا بجلی کی مزید قیمتیں کم ہونگیں، وہ وقت آنے والا ہے ، جب انڈسٹری ٹریک پر آجائے گی۔

تاجر برادری کا مزید کہنا تھا کہ مہنگائی کی وجہ سے ایکسپورٹ نہیں ہو پارہی تھی، بجلی کی قیمتوں میں کمی سے بہت فرق پڑےگا، وزیراعظم اوران کی ٹیم نے بڑی محنت کیساتھ دن رات کام کیا، ہم وزیراعظم اور ان کی ٹیم کا تہہ دل سے شکریہ ادا کرتے ہیں۔

تاجروں نے کہا کہ 7 روپے 59 پیسے صنعتوں کیلئے بجلی کے یونٹ میں کمی کی ہے، ہم آپ کو جلد 25 سے 30 بلین ڈالر کی ایکسپورٹ کر کے دکھائیں گے،بزنس کمیونٹی

تاجر کمیونٹی کا بتانا تھا کہ حکومت کافی عرصے سے بجلی کی قیمتوں پر کام کررہی تھی لیکن کل جو اعلان ہوا وہ انڈسٹری اورعام لوگوں کیلئے بڑی خوشخبری ہے، پوری امید ہے اس ٹیرف میں کمی سے ترقی کا پہیہ مزید تیز ہوگا۔

تاجر رہنما نے کہا کہ وزیراعظم نے جو فیصلہ کیا کھلے دل سے سراہتا ہوں، ایس ایم ایز کیلئے بہت بڑافیصلہ ہے، بجلی کی قیمت کم ہونےسےمثبت اثرات آئیں گے، بجلی کی قیمت کم ہونے سے ٹرانسپورٹ سستی ہوگی اور غریب گھرانوں میں ریلیف آئے گا۔

اسلام آباد: وزیراعظم شہباز شریف کا کہنا ہے کہ بجلی کی قیمتوں میں کمی کیلئے ہمیں آئی ایم ایف کے پاس جانا پڑے گا۔

تفصیلات کے مطابق وزیراعظم شہباز شریف نے وفاقی کابینہ کے اجلاس سے خطاب کرتے ہوئے کہا کہ بجلی کی قیمت کم نہیں ہوگی تو انڈسٹری ، زراعت اور ایکسپورٹ ترقی نہیں کرے گی، گزشتہ ہفتے بجلی کی قیمتوں پر میٹنگ کی تھی، بجلی کی قیمتوں میں کمی کیلئے ہمیں آئی ایم ایف کے پاس جانا پڑے گا۔

وزیراعظم کا کہنا تھا کہ پاکستان کی ترقی اورخوشحالی میں سمیڈا ریڑھ کی ہڈی کی حیثیت رکھتا ہے، ٹیکسٹائل کی ایکسپورٹ میں اضافہ خوش آئند بات ہے، ایکسپورٹ ہوگی تو گروتھ بھی ہوگی۔

انھوں نے بتایا کہ میں نےسمیڈاکےحوالےسےمیٹنگ کی ہےاور اس کابورڈمکمل کیا وفاق اورصوبے ملکر اسے کامیاب بنائیں گے، 15 جنوری کو سمیڈا کے حوالے سے ایک اور میٹنگ کریں گے۔

لوئر کرم واقعے کے حوالے سے وزیراعظم نے کہا کہ لوئر کرم میں امن معاہدے کے بعد پھر ایک واقعہ ہوا، لوئرکرم میں قافلے پر حملہ ہوا جس میں ڈپٹی کمشنر زخمی ہوئے ، لوئر کرم میں امن معاہدے کو سبوتاژ کرنے کی مذموم حرکت کی گئی تاہم ڈپٹی کمشنر کا پشاور میں علاج جاری ہے ان کیلئے دعاگو ہیں ، کرم میں حملے سے امن معاہدے کو سبوتاژ نہیں ہونے دیں گے۔

انھوں نے مزید کہا کہ انسانی اسمگلنگ کا مکروہ دھندا کئی سالوں سے جاری ہے ، انسانی اسمگلنگ میں سیکڑوں پاکستانی 3 سالوں میں جان سے ہاتھ دھو بیٹھے ہیں اور ملک کی بے پناہ بدنامی ہوئی تاہم انسانی اسمگلنگ کی روک تھام کیلئے روزانہ کی بنیاد پر نگرانی کررہے ہیں۔

وزیراعظم کا کہنا تھا کہ آپ سب کی محنت اورکاوشوں سے معیشت میں استحکام آرہا ہے وہ دن دور نہیں جب ہم اللہ کے فضل سے خوشحال قوم ہوں گے۔

اسلام آباد : وفاقی وزیر اویس لغاری نے بجلی کے بھاری بلوں سے پریشان صارفین کو قیمتوں کے حوالے سے بری خبر سنا دی۔

تفصیلات کے مطابق وفاقی وزیر بجلی اویس لغاری نے تقریب سے خطاب کرتے ہوئے کہا کہ موجودہ صورتحال برقراررہی تو اگلے 10 سال تک بجلی کی قیمتیں بڑھتی رہیں گی، آئندہ 10 سال میں بجلی کی قیمت مزید ناقابل برداشت ہوجائیں گی۔

وفاقی وزیر بجلی کا کہنا تھا کہ طلب سالانہ 2.8 فیصد بڑھنے کے باوجود ٹیرف میں اضافے کا رجحان رہے گا، دعا کریں افغانستان میں کاسا کا انفرا اسٹرکچر نہ لگ سکے، ورنہ کاسا منصوبے کی مہنگی بجلی کی قیمت کون ادا کرے گا۔

انھوں نے کہا کہ ہم آئی پی پیزمعاہدوں میں کچھ نہیں کرسکتے تھے، آئی پی پیزمالکان کی مہربانی ہے انہوں نے اپنا منافع قربان کیا، کیپٹو پاور پلانٹس کو مرحلہ وار گیس کم کی جائیں گی۔

وفاقی وزیر نے مزید کہا کہ آئی ایم ایف شرط کو ذمہ داری سے پورا کیا جائے گا، سولر نیٹ میٹرنگ کیلئے ریگولیشنز،پرائسنگ میکانزم تبدیل کرنا پڑے گا، عوام نیٹ میٹرنگ اور آف گرڈ پر جا رہے ہیں، ریگولیشنز اور پرائسنگ کو ریشنالائز کئے بغیر سولر سے عوام کو روک نہیں سکتے۔

انھوں نے بتایا کہ مئی اور جون میں 3 بجلی تقسیم کارکمپنیوں کی نجکاری کیلئےدرخواستیں آئیں گی۔

کے الیکٹرک کے حوالے سے ان کا کہنا تھا کہ کے الیکٹرک کی نجکاری کے باوجود 170 ارب کی سبسڈی دینا پڑ رہی ہے، اسی طرح ہی ڈسکوز کی نجکاری کرنی ہے تو کوئی فائدہ نہیں ، کے الیکٹرک کی طرح ہی نجکاری کرنی ہے تو پھر 500 ارب مزید سبسڈی دینا پڑے گی۔

اسلام آباد : بجلی 7 روپے 13 پیسے فی یونٹ تک مہنگی کرنے کا فیصلہ آج کیا جائے گا ، اضافہ جنوری کی فیول پرائس ایڈجسٹمنٹ کی مد میں مانگا گیا ہے۔

تفصیلات کے مطابق بجلی 7 روپے 13 پیسے مہنگی کرنے کی سی پی پی اے کی درخواست پر سماعت ہوئی، چیئر مین نیپرا کی سربراہی میں نیپرا اتھارٹی میں سماعت کا آغاز کیا۔

سی پی پی اے حکام نے بتایا کہ جنوری2024ریفرنس لاگت 7روپے48پیسےمقررتھی، ہائیڈرو سےگزشتہ ماہ پیداوارمعمول کےمطابق رہی تاہم ہائی اسپیڈ ڈیزل سے 1 ملین یونٹ پیداوار کی گئی۔

حکام کا کہنا تھا کہ چائنہ حب پاورجنریشن سے بجلی کی پیداوار زیرو رہی، پیداوار زیروہونےکی وجہ بجلی کی طلب کم ہونا ہے جبکہ ساہیوال کول سے پیداوار معمول کے مطابق لی گئی۔

سی پی پی اے حکام نے کہا کہ دسمبر کا فیول پرائس 4روپے 57 پیسے تھا، جنوری کا فیول پرائس 7 روپے 13 پیسے بنتا ہے جبکہ دسمبر کی نسبت جنوری میں ایف سی اے2روپے 56 پیسے اضافی ہوگا۔

سی پی پی اے کی جانب سے اضافہ جنوری کی فیول پرائس ایڈجسٹمنٹ کی مد میں مانگا گیا ہے ، منظوری کی صورت میں بجلی صارفین پر 66 ارب سے زائد کا بوجھ پڑے گا۔

کراچی : پاکستانی عوام نے حکومت کی جانب سے بجلی کی قیمتوں میں اضافے پر ردعمل دیتے ہوئے کہا کہ ہے کہ یہ حکومت بائیس کروڑ عوام کو ختم کرکے ہی چھوڑے گی۔

تفصیلات کے مطابق بجلی کی قیمتوں میں اضافے نے عوام کو مشتعل کردیا، شہریوں کا کہنا ہے کہ حکومت کے بائیس دن رہ گئے، بائیس کروڑ عوام کو ختم کرکے ہی چھوڑے گی۔

شہریوں نے کہا امیر اور غریب کے یونٹ کی قیمت میں کوئی فرق نہیں، مشکل فیصلے کس کیلئے کرنے تھے، حکومت عوام کو پل صراط سے گزارنے کی کوشش کررہی ہے، حکومت سےگزارش ہے ہمیں موت کے کنویں سےبچالے۔

یاد رہے وفاقی حکومت نے بجلی 7 روپے 50 پیسے فی یونٹ تک مہنگی کر دی ہے، بجلی کے بنیادی ٹیرف میں 3 روپے سے ساڑھے 7 روپے فی یونٹ تک اضافہ کیا گیا ہے۔

100 یونٹ والے گھریلو صارفین کے لیے بجلی 3 روپے فی یونٹ مہنگی کرنے کی، 101 سے 200 یونٹ والے صارفین کے لیے 4 روپے فی یونٹ اضافے، 201 سے 300 یونٹ تک والے صارفین کے لئے 5 روپے فی یونٹ، 301 یونٹ سے 400 یونٹ تک 6 روپے 50 پیسے فی یونٹ، جب کہ 400 سے 700 یونٹ والے صارفین کے لیے 7 روپے 50 پیسے فی یونٹ اضافے کی تجویز دی گئی ہے۔

اضافے سے اوسط فی یونٹ ٹیرف 35 روپے 42 پیسے سے بڑھ کر 42 روپے 72 پیسے فی یونٹ ہو جائے گا جبکہ سیلز ٹیکس کے نفاذ کے بعد فی یونٹ قیمت 50 روپے تک پہنچ جائے گی۔