پشاور : وزیراعظم نواز شریف نے کہا ہے کہ اللہ تعالیٰ پاکستان کو مکمل پُرسکون بنائے اور رحم کرے تاکہ ملک ترقی کرسکے۔ان خیالات کا اظہار انہوں نے پشاور میں بشیر بلور کے بیٹے عثمان بلور کے انتقال پرتعزیت کے بعد میڈیا سے گفتگو کرتے ہوئے کیا۔
وزیر اعظم نے کہا کہ حکومت نےبجلی کی قیمت میں فی یونٹ دو روپے چونتیس پیسے کمی کی ہے،عوام کو ریلیف دینا حکومت کی اوّلین ترجیح ہے، برآمدات میں اضافہ بھی بجلی کی قیمت میں کمی سے ہوتا ہے۔
انہوں نے کہا کہ 1997 میں ملک میں اضافی بجلی تھی، موجودہ حالات میں بجلی کی چوری ایک بڑا مسئلہ ہے، ہم بہت جلد بدعنوانی کا خاتمہ کر دیں گے،ان کا کہنا تھا کہ ہم جب بھی آّئے ترقی لیکر آئے،نواز شریف نے ملک میں توانائی کے بحران کے حوالے سے ایک سوال کے جواب میں کہا کہ ایل این جی پر چلنے والے پاور پلانٹ لگائے جائیں گے۔
انہوں نے کہا کہ اگر دھرنوں کی سیاست نہ ہوتی تو ملک میں مزید کارخانے لگائے جاتے،جس سے بیروزگاری میں مزید کمی ہوتی، انہوں نے صحافیوں سے کہا کہ مجھ سے دھرنوں کا نہ پوچھیں مجھ سے صرف کارخانوں اور ترقیاتی کاموں کا پوچھیں۔
انہوں نے اعلان کیا کہ آنیوالے وقتوں میں پیٹرولیم مصنوعات کی قیمتوں میں مزید کمی کی جائے گی،میں خیبر پختونخواہ میں نیا پاکستان دیکھنا چاہتا ہوں، پشاور سے ایران تک دیس پائپ لائن بچھائی جائے گی۔
