Tag: بجلی

کراچی: نیشنل ٹرانسمیشن اینڈ ڈسپیچ کمپنی لمیٹڈ کے ترجمان نے کہا ہے کہ کراچی الیکٹرک کے ساتھ 150 میگا واٹ بجلی کی سپلائی کا معاہدہ طے ہو گیا ہے۔

تفصیلات کے مطابق ترجمان این ٹی ڈی سی کا کہنا ہے کہ کے الیکٹرک کو پاور ڈویژن نے 150 میگا واٹ بجلی مہیا کر دی ہے، کے ای کو بجلی معاہدہ طے ہونے کے بعد مہیا کی گئی۔

ترجمان نے بتایا کہ کے الیکٹرک کو 150 میگا واٹ بجلی کی سپلائی کا معاہدہ طے ہوا ہے، جب کہ قومی گرڈ سے پہلے ہی 650 میگا واٹ بجلی کے الیکٹرک کو دی جا رہی ہے۔

واضح رہے کہ کراچی الیکٹرک کا بجلی کی تقسیم کار کمپنی سے 22 سالہ معاہدہ ختم ہونے کے بعد شہر قائد کی نصف آبادی کو بجلی کی فراہمی بند ہونے کا خدشہ پیدا ہو گیا تھا۔

یہ بھی پڑھیں:  کراچی کی نصف آبادی کی بجلی معطل ہونے کا خدشہ

کے الیکٹرک کا گزشتہ روز 19 جون 2019 کو تقسیم کار کمپنی سے 22 سالہ معاہدہ ختم ہو گیا ہے، معاہدہ ختم ہونے کے بعد شہر میں 123 میگا واٹ بجلی کی فراہمی معطل ہو جانی تھی۔

ذرایع کا کہنا تھا کہ کے الیکٹرک بالکل مفت بجلی حاصل کر کے شہر قائد کے عوام سے ماہانہ کروڑوں روپے وصول کرتی ہے۔

کے الیکٹرک نے تا حال فرنس آئل سے بجلی کی پیداوار شروع نہیں کی ہے، مقامی کمپنی سے معاہدہ ختم ہونے سے متعلق نیپرا نے پاور ڈویژن کو خط ارسال کر کے صورت حال سے آگاہ کیا تھا۔

کراچی: چائنا پاور حب جنریشن کے کوئلے سے چلنے والے 2 یونٹس فعال ہو گئے، یونٹس سے بجلی کی پیداوار شروع ہو گئی ہے۔

تفصیلات کے مطابق بجلی کی پیداوار کے ایک اور منصوبے نے کام شروع کر دیا ہے، چائنا پاور حب جنریشن کے کوئلے سے چلنے والے 2 یونٹس فعال ہو گئے۔

دونوں پاور پلانٹس سے 660 میگا واٹ بجلی حاصل ہوتی ہے، گزشتہ روز دونوں یونٹس کو نیشنل گریڈ سے منسلک کر دیا گیا تھا۔

دونوں یونٹس سے بجلی نیشنل گرڈ میں شامل کی جا رہی ہے، چائنا پاور حب جنریشن سی پیک کے تحت ترجیحی منصوبوں میں شامل ہے۔

اس منصوبے کی مالیت 2 ارب ڈالر ہے، دو بلین ڈالر کے اس منصوبے میں دو پاور پلانٹ اور ایک کوئلے کی جیٹی شامل ہیں۔

دونوں یونٹس سے حاصل ہونے والی بجلی سے 40 لاکھ گھروں کی بجلی کی ضرورت پوری کی جا سکے گی، خیال رہے کہ جنوری میں چائنا پاور حب جنریشن کمپنی نے اپنے 1320 میگا واٹ کے کول پاور پراجیکٹ کی 660 میگا واٹ کے پہلے یونٹ کو کام یابی کے ساتھ نیشنل گرڈ کے ساتھ منسلک کیا تھا۔

چائنا پاور حب جنریشن کمپنی پرائیوٹ لمیٹڈ (ایس پی آئی سی) چائنا کی جانب سے پہلا غیر ملکی تھر مل پاور پراجیکٹ ہے جو کہ بیلٹ اینڈ روڈ منصوبے کا حصہ ہے۔

کراچی: شہرقائد کے مختلف علاقوں میں رمضان المبارک کے پہلے روز بجلی غائب رہی جس کے باعث شہریوں نے اندھیرے میں سحری کی۔

تفصیلات کے مطابق ملک کے سب سے بڑے شہر کراچی میں سحری کے اوقات میں بجلی غائب رہی، جس کے باعث شہریوں کو شدید مشکلات کا سامنا کرنا پڑا۔

نارتھ ناظم آباد، لیاقت آباد، حسن اسکوائر، موسیٰ کالونی، شاہ فیصل کالونی، شادمان، بفرزون، نارتھ کراچی، نصرت بھٹو کالونی، کاٹھور اور گڈاپ ناگوری سوسائٹی سمیت شہر کے مختلف علاقے بجلی نہ ہونے کے باعث اندھیرے میں ڈوبے رہے جہاں شہریوں نے اندھیرے میں رمضان المبارک کی پہلی سحری کی۔

دوسری جانب محکمہ موسمیات نے رمضان المبارک کے آغاز پر کراچی میں گرمی کی شدت میں کمی کا امکان ظاہر کیا ہے۔

چیف میٹرولوجسٹ عبدالرشید کے مطابق آج شہر قائد کے درجہ حرارت میں مزید 2 ڈگری کمی کی توقع ہے، درجہ حرارت زیادہ سے زیادہ 32 سے 34 ڈگری کے درمیان رہنے کا امکان ہے۔

واضح رہے کہ محکمہ موسمیات کے مطابق کراچی میں یکم مئی 2019 سال کا گرم ترین دن تھا اور درجہ حرارت 42 ڈگری تک ریکارڈ کیا گیا تھا۔