اسلام آباد: وفاقی حکومت نے اقتصادی سروے رپورٹ میں بے روزگاری سے متعلق اعداد وشمار جاری کردئیے۔
تفصیلات کے مطابق وزیر خزانہ اسحاق ڈار نے وفاقی وزیر منصوبہ بندی و ترقی احسن اقبال اور اقتصادی ٹیم کے ہمراہ پریس کانفرنس میں اقتصادی سروے جاری کیا۔
اقتصادی سروے رپورٹ میں حکومت نے سال دو ہزار بیس اور اکیس میں بےروزگاری سے متعلق اعداد وشمار جاری کئے، جس کے مطابق دو ہزار بیس ـ اکیس میں بے روزگاری کی شرح کم ہوکر 6.3 فیصد پر آگئی۔
رپورٹ کے مطابق سال دوہزار اٹھارہ انیس میں ملک میں بے روزگاری کی شرح 6.9 فیصد جبکہ دو ہزار سترہ اٹھارہ میں 5.8 فیصد تھی۔
اقتصادی سروے رپورٹ کے مطابق ملک میں لیبر فورس کی تعداد 7 کروڑ17لاکھ60 ہزار ہے، لیبر فورس کے تحت 45لاکھ10 ہزار لوگ بے روزگار ہیں۔
اقتصادی سروے کے مطابق مالی سال 2023 میں معاشی ترقی کی شرح نمو 0.29 فیصد رہی۔ زراعت کے شعبے میں 1.55 فیصد صنعتی شعبے میں منفی 2.94 فیصد جبکہ خدمات کے شعبے میں شرح نمو 0.86 فیصد رہی۔
سیلاب کی تباہ کاریاں، بین الاقوامی کساد بازاری، اور سخت اقتصادی فیصلوں /پالیسیوں کی وجہ سے معاشی شرح نمو میں کمی واقع ہوئی۔ جولائی تا مئی 2023 اوسط افراط زر 29.2 فیصد ریکارڈ کی گئی۔
مہنگائی کی بڑی وجہ بین الاقوامی سطح پر تیل، دالیں اور اجناس کی قیمتوں میں اضافہ عالمی رسد میں خلل، سیلاب کی وجہ سے اہم فصلوں کا ضیاع، سیاسی عدم استحکام اور روپے کی قدر میں کمی ہے۔
