Tag: بحران

پاکستان تحریک انصاف کے مرکزی سیکریٹری اطلاعات شیخ وقاص اکرم کا کہنا ہے کہ ملک میں بہت بڑا بحران آنے والا ہے۔

اے آر وائی نیوز کے مطابق پاکستان تحریک انصاف کے مرکزی سیکریٹری اطلاعات شیخ وقاص اکرم نے پشاور میں پریس کانفرنس کرتے ہوئے کہا ہے کہ حکومت نے اب تک گندم کی سپورٹ پرائس کا اعلان نہیں کیا۔ گزشتہ سال بھی اعلان کے باوجود گندم نہیں خریدی گئی تھی۔ ملک میں بہت بڑا بحران آنے والا ہے۔ مطالبہ ہے حکومت گندم کی سپورٹنگ پرائس مقرر کرے اور امدادی قیمت پانچ ہزار روپے رکھی جائے۔ اگر حکومت نے اعلان نہ کیا تو کسان بڑی تعداد میں باہر نکلیں گے۔

پی ٹی آئی رہنما کا کہنا تھا کہ حکومت کا کسان پالیسی سے متعلق فیصلہ کسان دشمنی ہے جو ملک دشمنی کے برابر ہے۔ ایک صنعتکار پنجاب کی وزیر اعلیٰ بن گئی اس لیے اب سب کچھ صنعت کو دیا جا رہا ہے۔ کسان کو تو بیج تک ادھار لینے پڑتے ہیں جب کہ گندم خریدنے والا کوئی نہیں۔ یہ لوگ کسان کو پاکستانی سمجھتے بھی ہیں یا نہیں؟

انہوں نے مزید کہا کہ حکمران آئی ایم ایف سے ڈیل کرتے اور اس کا بوجھ کسان پر ڈالتے ہیں۔ گندم کی امدادی قیمت کی پالیسی آئی ایم ایف کی شرط پر ختم کر دی۔ پنجاب اسمبلی میں 5 سے 45 فیصد زرعی ٹیکس عائد کیا گیا۔ اب 60 لاکھ کی آمدنی پر کسان کو 45 فیصد ٹیکس دینا پڑے گا۔ چیئرمین پی اے سی سے درخواست ہے گندم اسکینڈل کا معاملہ اٹھائے۔

شیخ وقاص اکرم کا کہنا تھا کہ بانی پی ٹی آئی عمران خان کو بنیادی حقوق نہیں دیے جا رہے ہیں۔ جیل میں فیملی سے ملاقات کرنا قیدی کا بنیادی حق ہے، لیکن بانی  کے وکیل تک کو ان سے ملنے نہیں دیا جا رہا، عدالت کے احکامات کو جیل انتظامیہ نے ہوا میں اڑا دیا ہے۔ عمران خان کی ان کے بچوں سے بات کرانے اور کتابوں کی فراہمی سے متعلق درخواست دائر کر دی ہے۔

پی ٹی آئی کے مرکزی سیکریٹری اطلاعات نے یہ بھی کہا کہ سوشل میڈیا کے بچوں کو ابھی تک عدالت میں پیش نہیں کیا گیا۔ ان بچوں کے اکاؤنٹس کو فیک اکاؤنٹس کے ساتھ منسلک کر دیا گیا۔ ان کا کوئی جرم نہیں، اگر کوئی جرم ہے تو انہیں عدالت میں پیش کریں اور ایف آئی آر دیں۔

انہوں نے کہا کہ دریائے سندھ سے نہریں نکالے جانے والے معاملےکے خلاف تمام جماعتیں احتجاج کر رہی ہیں۔ اس مسئلے پر بانی پی ٹی آئی کا کہنا ہے کہ وہ لوگوں کے ساتھ کھڑے ہیں۔

قومی ایئر لائن پی ائی اے کو ایندھن کی فراہمی کا معاملہ حل نہیں ہو سکا، فیول کی محدود پیمانے پر فراہمی کی وجہ سے قومی ایئر لائن کی مزید 27 پروازیں منسوخ کر دی گئیں۔

تفصیلات کے مطابق قومی ائیر لائن پی آئی اے کا انتظامی بحران سنگین ہو گیا ہے جس کی وجہ سے کئی روز سے اندرون ملک اور بین الاقوامی  پروازیں منسوخ کر دی گئی ہیں جبکہ متعدد قومی پروازوں کا شیڈول متاثر ہوا ہے۔

رپورٹ کے مطابق کراچی سے لاہور، رحیم یار خان اور پشاور کی دو طرفہ 7 پروازیں اور  کراچی سے ملتان، دبئی اور اسلام آباد کی 6 پروازیں منسوخ کی گئی ہیں۔

جبکہ ملتان سے جدہ اور القسیم سے ملتان کی 2 پروازیں بھی منسوخ کی گئی ہیں اس کے علاوہ لاہور سے شارجہ، دبئی اور جدہ سے لاہور کی 4 پروازیں بھی منسوخ ہوئی ہیں۔

اسلام آباد سے دبئی، ابوظہبی، دمام، مدینہ، جدہ اور کوئٹہ کی 7 پروازیں منسوخ کی گئی ہیں جبکہ دبئی سے پشاور کی پرواز بھی منسوخ کر دی گئی ہے۔