منامہ : وزیرداخلہ محسن نقوی کی بحرینی ہم منصب سے ملاقات میں سیکیورٹی تعاون مزید بڑھانے پر اتفاق کرلیا گیا۔
تفصیلات کے مطابق وزیرداخلہ محسن نقوی ایک روزہ دورے پر بحرین کے دارالحکومت منامہ پہنچ گئے ، بحرین ائیرپورٹ پر بحرین کے وزیر داخلہ نےمحسن نقوی کا شاندار استقبال کیا۔
بحرینی وزارت داخلہ ہیڈ کوارٹر منامہ فورٹ آمد پر محسن نقوی کو گارڈ آف آنرپیش کیا گیا ، جس کے بعد وزیرداخلہ محسن نقوی نے بحرینی ہم منصب سے اہم ملاقات کی۔
ملاقات میں باہمی دلچسپی کے امور اور سیکیورٹی تعاون پر تبادلہ خیال کیا گیا اور سیکیورٹی تعاون مزید بڑھانے کی ضرورت پر زور دیا گیا۔
ملاقات میں انسداد دہشت گردی،انسدادانسانی اسمگلنگ اور انسداد منشیات سے متعلق اشتراک کار پر بات چیت ہوئی اور سیکیورٹی تعاون، علاقائی وعالمی چیلنجز سے نمٹنے کیلئے مشترکہ سیکیورٹی کمیٹی کے کام کو مزید موثر بنانے پر بھی گفتگو ہوئی۔
بحرین کے وزیر داخلہ نے پاکستان اور بحرین کے درمیان سیکیورٹی ودیگرشعبوں میں ہم آہنگی کو سراہتے ہوئے کہا کہ آپ کا دورہ مضبوط تعلقات پرمبنی سیکیورٹی روابط کو مستحکم کرنے کا موقع ہے۔
بحرینی وزیر داخلہ کا کہنا تھا کہ پاکستان وبحرین کے درمیان سیکیورٹی تعاون و کوآرڈینیشن کوقدر کی نگاہ سے دیکھتے ہیں۔
وزیرداخلہ محسن نقوی نے بحرینی ہم منصب کو پاکستان کے دورے کی دعوت دی اور وزارت داخلہ میں رکھی کتاب میں تاثرات درج کئے۔
اس موقع پر بحرینی نائب وزیر داخلہ،چیف آف پبلک سیکیورٹی، سینئر عسکری افسران اور پاکستانی سفیرودیگر موجود تھے۔