ARYNews.tv | Urdu – Har Lamha Bakhabar

Tag: برازیل

  • برازیل سے کیسے تعلقات ہیں؟ چینی صدر کا بڑا بیان

    برازیل سے کیسے تعلقات ہیں؟ چینی صدر کا بڑا بیان

    چینی صدر شی جن پنگ کا کہنا ہے کہ چین اور برازیل کے درمیان بہترین تعلقات قائم ہیں۔

    بین الاقوامی خبر رساں ادارے کی رپورٹ کے مطابق چینی اور برازیلین صدور کی ٹیلیفونک گفتگو ہوئی جس میں دونوں ممالک کی معیشت کے لیے نئے کاروباری مواقعوں پر تفصیلی بات چیت کی گئی۔

    رپورٹس کے مطابق دونوں رہنماؤں کے درمیان ٹیلیفونک گفتگو تقریباً ایک گھنٹے تک جاری رہی جس میں دو طرفہ تجارت پر تبادلہ خیال کیا گیا۔

    چینی صدر شی جن پنگ کا کہنا تھا کہ چین اور برازیل کو عالمی چیلنجز سے نمٹنے کے لیے مل کر کام جاری رکھنا چاہیے۔

    دوسری جانب امریکا نے چین کے ساتھ ٹیرف معاہدے میں مزید 3 ماہ کی توسیع کردی، صدر ڈونلڈ ٹرمپ نے حکم نامے پر دستخط کردیے۔

    میڈیا رپورٹ کے مطابق چین امریکا ٹیرف معاہدے کی مدت آج ختم ہو رہی تھی تاہم ٹرمپ نے صدارتی حکم پر دستخط کرتے ہوئے چین کے ساتھ ٹیرف معاہدے میں 3 ماہ کی توسیع کر دی۔

    اس موقع پر امریکی صدرڈونلڈ ٹرمپ نے کہا کہ چین کے ساتھ تجارتی مذاکرات میں پیش رفت متوقع ہے، چین اچھے برتاؤ کا مظاہرہ کررہا ہے۔

    انہوں نے بتایا کہ چین امریکا سے سویابین کی خریداری میں 4گنا اضافہ کرے گا، یاد رہے کہ نئے صدارتی حکم کے تحت موجودہ ٹیرف ریٹ اگلے 3 ماہ تک نافذ رہے گا۔

    غزہ پر مکمل قبضے کا منصوبہ، ٹرمپ اور نیتن یاہو میں کیا بات ہوئی؟

    واضح رہے کہ گزشتہ ماہ امریکا اور چین نے جنیوا میں تجارتی مذاکرات کے بعد 90 دنوں کے لیے ٹیرف میں کمی کا اعلان کیا تھا ساتھ ہی اقتصادی اور تجارتی تعلقات پر بات چیت جاری رکھنے پر اتفاق کیا گیا تھا۔

  • برازیل کے سابق صدر کے پاؤں میں الیکٹرانک بیڑی ڈال دی گئی

    برازیل کے سابق صدر کے پاؤں میں الیکٹرانک بیڑی ڈال دی گئی

    برازیلیا: برازیل کے سابق صدر جائر بولسونارو کے پاؤں میں الیکٹرانک بیڑی ڈال دی گئی۔

    غیر ملکی میڈیا رپورٹس کے مطابق برازیل کی سپریم کورٹ کے حکم پر سابق صدر بولسونارو کو الیکٹرانک اینکل ٹیگ لگا دیا گیا، عدالت نے ان پر انٹرویو دینے اور سوشل میڈیا پر آنے پر بھی پابندی لگا دی۔

    پولیس نے جمعہ کے روز جائر بولسونارو کے گھر اور سیاسی ہیڈ کوارٹر پر چھاپا مارا تھا، اور جائیدادوں کی تلاش کی اور سابق صدر کو ٹخنوں کا برقی ٹیگ پہننے کا حکم دیا۔ بولسونارو امریکی صدر ڈونلڈ ٹرمپ کے اتحادی ہیں، ان پر غیر ملکی عہدیداروں سے بات کرنے یا سفارت خانوں سے رجوع کرنے پر بھی پابندی عائد کی گئی ہے۔

    سابق صدر پر پابندیاں اس لیے لگائی گئی ہیں کیوں کہ 2022 کے صدارتی انتخابات کے نتائج کو ختم کرنے کی مبینہ سازش پر ان کے خلاف کیس کی سماعت کے دوران ان کے ملک سے فرار ہونے کا خدشہ ظاہر کیا گیا ہے۔

    عباس عراقچی کا انٹرویو، ٹرمپ نے سی این این سے معافی کا مطالبہ کر دیا

    جمعہ کے روز پولیس اسٹیشن کے باہر حامیوں سے خطاب کرتے ہوئے بولسونارو نے ٹخنوں کے ٹیگ کو ’’اعلیٰ ذلت‘‘ قرار دیا اور کہا کہ انھوں نے ’’برازیل چھوڑنے کا کبھی سوچا بھی نہیں۔‘‘ انھوں نے کہا میرے ملک چھوڑنے کے شکوک شبہات دراصل مبالغہ آرائی ہے، حد ہو گئی ہے، میں ملک کا سابق صدر ہوں اور 70 سال کا ہوں۔‘‘

    سابق صدر نے اپنے خالف اقدامت کو بزدلی قرار دیا ہے، اور کہا کہ ایسا کچھ نہیں کیا جو اس طرح کا سلوک کیا جا رہا ہے۔ واضح رہے کہ سابق برازیلین صدر بولسونارو کے خلاف کرپشن اور بغاوت جیسے الزامات کی تحقیقات جاری ہے، عدالت نے بولسونارو کے بیٹے کے اثاثے بھی منجمد کر دیے ہیں۔

  • مودی کو بڑا دھچکا، برازیل نے آکاش میزائل کی خریداری سے عین وقت پر انکار کردیا

    مودی کو بڑا دھچکا، برازیل نے آکاش میزائل کی خریداری سے عین وقت پر انکار کردیا

    بھارتی وزیراعظم نریندر مودی کوبڑا دھچکا لگا ہے، برازیل نے آکاش میزائل کی خریداری کے حوالے سے مذاکرات ختم کردیے ہیں۔

    غیرملکی میڈیا رپورٹس کے مطابق آپریشن سندور میں عبرتناک شکست کے بعد بھارت کو عالمی سطح پر ہزیمت کا سامنا کرنا پڑرہا ہے، دکن ہیرالڈ نامی اخبار نے بتایا کہ برازیل نے بھارتی میزائل سسٹم کی خریداری کیلئے مذاکرات ختم کردیے۔

    یہ بھی پڑھیں: ڈیل کے بعد سے آج تک مودی سرکار ایک بھی آکاش میزائل ڈیلیور نہ کر سکی

    ڈیفنس ایکسپریس نے بتایا کہ سسٹم کا جدیدترین ورژن فراہم نہ کرنے پر مذاکرات ختم ہوئے، برازیلی فوج درمیانے سے طویل رینج کے فضائی دفاعی نظام کی تلاش میں ہے۔

    برازیلی افواج کی طلب کے برعکس بھارتی کمپنیوں نے صرف آکاش کا پرانا ورژن فراہم کرنے کی پیشکش کی تھی۔

    ڈیفنس ایکسپریس نے مزید بتایا کہ برازیل نے پرانے ورژن کو "فرسودہ” قرار دے کر مسترد کر دیا، معاہدے کی مجموعی مالیت تقریباً 5ارب بھارتی روپے ہے۔

    دکن ہیرالڈ نے بتایا کہ برازیل اطالوی ایئرڈیفنس سسٹم حاصل کرنے پرغور کررہا ہے، معرکہ حق میں شکست کے بعد بھارتی ہتھیاروں کی ساکھ بری طرح متاثر ہوئی ہے۔

    https://urdu.arynews.tv/indias-missile-program-become-an-embarrassment-to-modi-govt/

  • نیٹو چیف مارک روٹے نے برازیل، چین اور بھارت کو خبردار کردیا

    نیٹو چیف مارک روٹے نے برازیل، چین اور بھارت کو خبردار کردیا

    نیٹو چیف مارک روٹے نے خبردار کیا ہے کہ اگر برازیل، چین اور بھارت نے روس کے ساتھ تجارت جاری رکھی تو انہیں پابندیوں کا سامنا کرنا پڑ سکتا ہے، جو ان ممالک کی معیشت پر شدید منفی اثر ڈال سکتی ہیں۔

    بین الاقوامی خبر رساں ادارے کی رپورٹ کے مطابق نیٹو چیف مارک روٹے نے کہا میری برازیل، بیجنگ اور نئی دہلی میں بیٹھے رہنماؤں سے اپیل ہے کہ وہ اس صورتحال کو سنجیدگی سے لیں، کیونکہ اگر روس کے ساتھ تجارتی تعلقات جاری رکھے گئے تو ان ممالک کو اس کا بھاری نقصان اٹھانا پڑ سکتا ہے۔

    نیٹو چیف مارک روٹے نے مزید کہا کہ یورپ یوکرین کو امن مذاکرات میں بہترین پوزیشن پر لانے کے لیے درکار مالی وسائل فراہم کرے گا۔

    دوسری جانب امریکی صدر ڈونلڈ ٹرمپ نے دعویٰ کیا ہے کہ انھوں نے پچھلے ہفتے نیٹو کا مسئلہ حل کر دیا ہے۔

    فاکس نیوز کی اینکر پرسن اور اپنی بہو لارا ٹرمپ کو انٹرویو میں امریکی صدر نے بتایا کہ نیٹو کے ہر رکن ملک سے اب 2 فی صد کے بجائے 5 فی صد تک رقم لی جا رہی ہے، پہلے وہ دو فی صد بھی نہیں دیتے تھے۔

    امریکی صدر ڈونلڈ ٹرمپ نے دعویٰ کیا کہ وہ ممالک جو امریکا کو استعمال کرتے تھے لیکن ناشکری کرتے تھے وہ اب امریکا کے شکر گزار ہیں، اور یہ کہ ”ٹیرف وار“ اور اتحادیوں سے دفاعی اخراجات میں اضافے کے مطالبات کے فوائد سامنے آ رہے ہیں۔

    انھوں نے کہا فاکس نیوز کے پہلے سے ریکارڈ شدہ انٹرویو میں ٹیرف کے سلسلے میں ممالک کے ساتھ جاری تجارتی مذاکرات کے بارے میں کہا ”ہر ملک شدت سے ہمارے ساتھ کاروبار کرنا چاہتا ہے، لیکن انھوں نے کبھی ہمارے ملک کا شکریہ ادا نہیں کیا، لیکن اب وہ کرتے ہیں۔ انھوں نے ہمارے ملک کو تجارت اور فوج کے حوالے سے استعمال کیا۔“

    نیٹو چیف نے ڈونلڈ ٹرمپ کو ڈیڈی کہنے کے بیان کی وضاحت کر دی

    ٹرمپ نے کہا ”میں نے نیٹو کا مسئلہ حل کر دیا ہے، اب یہ ممالک دفاع کے لیے زیادہ رقم ادا کر رہے ہیں، انھوں نے کبھی جی ڈی پی کا 2 فی صد بھی دفاع کے لیے خرچ نہیں کیا تھا، لیکن اب وہ 5 فی صد خرچ کر رہے ہیں۔“ ان کا اشارہ گزشتہ ماہ دی ہیگ میں منعقدہ نیٹو سربراہی اجلاس کی طرف تھا جس میں نیٹو نے دفاعی اخراجات کو 2035 تک GDP کے 5 فیصد تک بڑھانے پر اتفاق کیا تھا۔

    امریکی صدر نے کہا اس سے ہم سالانہ ایک کھرب ڈالر حاصل کر رہے ہیں، نیٹو میں اب ہماری آواز بہت مضبوط ہے، بائیڈن دور میں تو ہماری کوئی سنتا ہی نہیں تھا، اسے تو یہ بھی علم نہیں ہوتا تھا کہ وہ کہاں ہے۔

  • امریکی صدر کی برازیل کو دھمکی

    امریکی صدر کی برازیل کو دھمکی

    امریکی صدر ڈونلڈ ٹرمپ نے برازیل پر 50 فیصد ٹیرف نافذ کرنے کی دھمکی دے دی ہے۔

    بین الاقوامی خبر رساں ادارے کی رپورٹ کے مطابق امریکی صدر ڈونلڈ ٹرمپ نے برازیل کے سابق صدر بلسونارو کے خلاف کارروائی کو سیاسی انتقام قرار دیا ہے۔

    رپورٹس کے مطابق برازیل کے صدر لولاڈا سلوا کی جانب سے سابق صدر بلسونارو کے خلاف عدالتی کارروائی جاری ہے، بلسونارو کو صدارتی الیکشن ہارنے کے باوجود اقتدار پر قابض رہنے کی سازش کے الزام کا سامنا ہے۔

    برازیل کے صدر لولاڈا سلوا کے مطابق قانون سے بالاتر کوئی نہیں، کسی کی بھی مداخلت قبول نہیں کی جائے گی، برازیلی صدر اسرائیل کے ہاتھوں فلسطینیوں کے قتل کو نسل کشی بھی قرار دے چکے ہیں۔

    ٹرمپ کا تانبے پر ٹیکس عائد کرنے کا فیصلہ:

    امریکی صدر ڈونلڈ ٹرمپ نے کہا ہے کہ اب امریکہ میں دوسرے ممالک سے آنے والے تانبے (Copper)پر 50 فیصد ٹیکس لگے گا۔

    برطانوی نشریاتی ادارے بی بی سی کی رپورٹ کے مطابق اس اقدام کا مقصد اس اہم دھات کی ملکی پیداوار کو فروغ دینا ہے، یہ دھات الیکٹرک گاڑیوں، فوجی ساز و سامان، بجلی کے گرڈ اور متعدد اشیاء کی تیاری میں کلیدی حیثیت رکھتی ہے۔

    اس سے قبل صدر ٹرمپ نے کہا تھا کہ وہ دیکھیں گے کہ دوسرے ملکوں سے آنے والا تانبا امریکہ کی سکیورٹی کو کیسے متاثر کر رہا ہے۔

    امریکی صدر نے کابینہ کے اجلاس میں کہا کہ آج ہم تانبے پر کام کر رہے ہیں، جو دھات کی درآمدات پر جاری تحقیق میں پیش رفت کی علامت ہے۔

    صدر ڈونلڈ ٹرمپ نے یہ بھی کہا کہ اس کے علاوہ جلد ہی فارماسیوٹیکل (ادویات) سے متعلق اعلان کیا جائے گا جو جنوری سے ان کی انتظامیہ کی جانب سے مختلف شعبہ جات پر عائد کیے گئے لیویز کی فہرست کو مزید وسعت دے گا۔

    رپورٹ کے مطابق اس نئے ٹیکس کی وجہ سے امریکہ میں تانبا مہنگا ہو گیا ہے، اس حوالے سے امریکی وزیرِ تجارت ہاورڈ لٹنک نے بتایا ہے کہ یہ نیا ٹیکس اس مہینے کے آخر تک لاگو ہو جائے گا۔ صدر ٹرمپ جلد ہی اس حکم نامے پر دستخط کردیں گے۔

    ادویات اور تانبا : ٹرمپ ٹیرف کے بھارتی معیشت پر کیا اثرات مرتب ہوں گے؟

    واضح رہے کہ امریکہ ہر سال تقریباً 8 لاکھ 10 ہزار میٹرک ٹن تانبا باہر سے منگواتا ہے، جو اس کی ضرورت کا تقریباً آدھا حصہ ہے۔ سب سے زیادہ تانبا چلّی یا پھر کینیڈا سے آتا ہے۔ تانبا بڑی تعداد میں فوجی آلات، بجلی کی گاڑیوں اور تعمیرات میں استعمال ہوتا ہے۔

  • لوگوں سے بھرے اڑتے گرم ہوا کے غبارے میں آگ لگ گئی، دل دہلا دینے والی ویڈیو

    لوگوں سے بھرے اڑتے گرم ہوا کے غبارے میں آگ لگ گئی، دل دہلا دینے والی ویڈیو

    جنوبی برازیل میں ایک انتہائی دل دہلا دینے والا واقعہ پیش آیا ہے، جس میں تفریح کرنے والوں سے بھرے گرم ہوا کے غبارے میں اچانک اڑتے ہوئے آگ لگی، اور اس واقعے میں 8 افراد ہلاک ہو گئے۔

    سانتا کیٹرینا ریاست کے گورنر جوجینہو میلو نے X پر ایک پوسٹ میں بتایا کہ ہفتہ کی صبح پرایا گرانڈے شہر میں ہاٹ ایئر بلون پر 21 افراد سوار تھے، جب اس میں فضا میں آگ لگ گئی اور اس میں آٹھ افراد ہلاک ہوئے۔

    اس واقعے کی ایک ویڈیو بھی سامنے آئی ہے جس میں جلتے غبارے کو تیزی سے زمین کی طرف آتے دیکھا جا سکتا ہے، ریاستی حکومت کے پریس دفتر نے اطلاع دی کہ پائلٹ سمیت 13 افراد زندہ بچ گئے اور کوئی لاپتا نہیں ہے۔

    برازیل کی نیشنل سول ایوی ایشن ایجنسی (این اے سی) نے کہا کہ وہ طیارے اور عملے کی حالت کی تحقیقات کے لیے تمام ضروری اقدامات کر رہی ہے۔

    ویڈیو: 12 سالہ بچی زپ لائن ٹوٹنے سے 30 فٹ نیچے آگری

    پائلٹ کا کہنا تھا کہ ٹوکری کے اندر اچانک آگ شروع ہوئی تو اس نے غبارے کو نیچے کرنا شروع کر دیا، جب غبارہ زمین کے بالکل قریب تھا تو اس نے لوگوں کو چھلانگ لگانے کو کہا، لوگوں نے چھلانگیں لگانا شروع کیں، لیکن کچھ لوگ سنبھل نہیں پائے۔

    مرنے والوں میں ماں بیٹی بھی شامل تھی، اور ایک ماہر امراض چشم بھی بچ نہیں سکا، جب کہ بچ جانے والے زخمیوں کو قریبی اسپتالوں میں پہنچایا گیا۔ بلون ٹور کمپنی حادثے کے بعد اپنی سرگرمیاں غیر معینہ مدت کے لیے معطل کر دی ہیں۔

  • تمہارے بغیر میں بھی نہیں رہوں گا، میاں نے بیوی سے کیا وعدہ کیسے پورا کیا؟

    تمہارے بغیر میں بھی نہیں رہوں گا، میاں نے بیوی سے کیا وعدہ کیسے پورا کیا؟

    محبت میں ساتھ جینے اور ساتھ مرنے کی قسمیں کھانے والے زیادہ تر لوگ اپنے اس وعدے کا پاس یا قول پر عمل نہیں کرپاتے لیکن کچھ ایسے بھی ہیں جو کہتے ہیں وہ کرکے دکھاتے ہیں جن میں برازیل کے میاں بیوی بھی شامل ہیں۔

    برازیل سے تعلق رکھنے والے ایسے میاں بیوی بھی تھے کہ جہاں بیوی کی وفات کے چند گھنٹوں بعد ہی شوہر بھی اس دار فانی سے کوچ کرگیا۔

    ایک رپورٹ کے مطابق برازیل میں 92 سالہ اوڈیلیتا پنزانی دی ہارو اور ان کے 94 سال کے شوہر بچوال دی ہارو اپنی شادی کی 74ویں سالگرہ منانے کے صرف دو دن بعد دس گھنٹے کے فرق سے انتقال کرگئے۔

    اس واقعے نے برازیل کے معاشرے کو ہلا کر رکھ دیا، جوڑے کی ملاقات نوعمری میں ہوئی اور 1951 میں ان کی شادی ہوئی۔ ان کے چھ بچے ہیں۔ شوہر بچوال کپڑے کی دکان میں کام کرتے تھے اور اوڈیلیتا نے اپنے بچوں کی پرورش کی تھی۔

    تاہم اپنے بعد کے سالوں میں اوڈیلیتا کو الزائمر کا مرض لاحق ہوا اور بچوال نے اپنی زندگی اس کی دیکھ بھال کے لیے وقف کر دی پھر اسے 2023 میں ٹرمینل کولون کینسر کی تشخیص ہوگئی۔

    تب سے اس کی خواہش تھی کہ وہ اپنی بیوی کے مرنے کے بعد کبھی زندہ نہ رہے اور اس کی خواہش پوری ہوئی۔ اس کی بیوی پہلے مر گئی اور اس نے دس گھنٹے بعد اس کی پیروی کرتے ہوئے جان دے دی۔

    یاد رہے اس واقعے نے برازیل کے حلقوں میں بڑے پیمانے پر ہنگامہ برپا کر دیا ہے اور زیادہ تر مقامی اخبارات نے اسے رپورٹ کیا تھا۔

  • مصروف شاہراہ پر طیارے کی حیران کن ہنگامی لینڈنگ، لوگوں کی چیخیں نکل گئیں، ویڈیو وائرل

    مصروف شاہراہ پر طیارے کی حیران کن ہنگامی لینڈنگ، لوگوں کی چیخیں نکل گئیں، ویڈیو وائرل

    برازیل میں ایک چھوٹے طیارے کو اچانک مصروف ہائی وے پر رونگٹے کھڑے کر دینے والی ہنگامی لینڈنگ کرنی پڑی، جسے دیکھ کر سڑک پر گاڑیوں میں محو سفر لوگوں کی چیخیں نکل گئیں۔

    ڈیلی میل کے مطابق برازیل کی ایک موٹر وے پر ایک طیارے کو مصروف شاہراہ پر کاروں اور لاریوں کے درمیان دل دہلا دینے والی ہنگامی لینڈنگ کرنی پڑی، معلوم ہوا کہ طیارے کا انجن ناکارہ ہو گیا تھا، جس کی وجہ سے پائلٹ کو یہ خطرناک فیصلہ کرنا پڑا۔

    پائلٹ نے حاضر دماغی کا مظاہرہ کرتے ہوئے مصروف شاہراہ پر ہنگامی لینڈنگ تو کی، لیکن لینڈنگ کے وقت ہلکے ہوائی جہاز کے پیچھے سفر کرنے والے کار سواروں کو یہ خوف لاحق رہا کہ طیارہ اترتے ہوئے گاڑیوں سے ٹکرا جائے گا اور بس کسی بھی لمحے سڑک پر قیامت خیز منظر نظر آئے گا۔

    سوشل میڈیا پر وائرل ویڈیو میں دیکھا جا سکتا ہے کہ طیارہ کس خطرناک طریقے سے شاہراہ پر دوڑتی کاروں کے درمیان لینڈنگ کر رہا ہے، اور طیارے نے ایک بڑے ٹینکر کے عین آگے لینڈنگ کی، حتیٰ کہ ٹینکر کو بھی خود کو بچانا پڑا۔

    کوے کی انسانوں کی طرح بات کرنے کی ویڈیو وائرل

    رپورٹس کے مطابق اس واقعے میں کسی قسم کا نقصان نہیں ہوا ہے، پولیس کے مطابق طیارے میں 2 افراد سوار تھے، پائلٹ کا نام 29 سالہ میٹیوس رینان کالڈو اور مسافر کا نام ہوائی جہاز کا مالک، 71 سالہ تاجر والڈیمیرو جوز مینیلا تھا۔ یہ واقعہ اس وقت پیش آیا جب طیارہ کل دوپہر سے کچھ دیر قبل برازیل کی جنوبی ریاست سانتا کیٹرینا میں گورامیرم میں ایک ایروڈوم سے نکلا تھا۔

  • برازیل، خوفناک ٹریفک حادثے میں درجنوں گاڑیاں جل کر راکھ

    برازیل، خوفناک ٹریفک حادثے میں درجنوں گاڑیاں جل کر راکھ

    برازیل میں خوفناک ٹریفک حادثے کے نتیجے میں کئی گاڑیاں ایک دوسرے سے ٹکرا گئیں۔

    غیر ملکی ذرائع ابلاغ کے مطابق خوفناک حادثے کے باعث گاڑیوں میں آگ لگ گئی، جس سے 21 گاڑیاں اور 4 ٹرک جل کر راکھ کا ڈھیر بن گئے۔

    رپورٹس کے مطابق ریسکیو حکام کا کہنا ہے کہ حادثے کے نتیجے میں 6 افراد جھلس کر زخمی ہوئے، معاملے کی تحقیقات کا آغاز کردیا گیا ہے۔

    اس سے قبل بھی برازیل میں خوفناک ٹریفک حادثے کے نتیجے میں کم از کم 40 افراد ہلاک ہوگئے تھے، تیز رفتار ٹرک چلتی کار کے اوپر جاگرا تھا، تاہم اس میں موجود افراد معجزانہ طور پر بچ گئے تھے۔

    فائر ڈیپارٹمنٹ نے تصدیق کی تھی کہ مسافروں کی بس اور ٹرک کا تصادم جنوب مشرقی ریاست میناس گیرائس کے قصبے لاژینہ کے قریب پیش آیا تھا۔

    جنوب مشرقی برازیل کی ایک شاہراہ پر ایک مسافر بس اور ٹرک کے تصادم میں کم از کم 40 افراد جان سے گئے۔

    خبر رساں ادارے ’رائٹرز‘ نے رپورٹ کیا تھا کہ ابتدائی طور پر فائر فائٹرز نے بتایا کہ 45 مسافروں کو لے جانے والی بس کا ٹائر پھٹ گیا تھا، جس کی وجہ سے ڈرائیور کنٹرول کھو بیٹھا اور فیڈرل ہائی وے پر آنے والے ٹرک سے تصادم ہو گیا۔

    13زخمی افراد کو تھیوفیلو اوتونی کے قریبی اسپتالوں میں منتقل کیا گیا۔ بد قسمت بس ساؤ پالو سے روانہ ہوئی تھی اور اس میں 45 مسافر سوار تھے۔

    مذکورہ بس ٹرک سے ٹکرا گئی۔ اس کے ساتھ ساتھ ایک کار بھی بس سے ٹکرا گئی، لیکن اس کار کے تینوں مسافر زندہ بچ گئے۔

    تمام زخمیوں کو نکال لیا گیا ہے، فائر فائٹرز کا کہنا ہے کہ حادثہ 32 سے 35 جانیں لے گیا۔

    برازیلی میڈیا آؤٹ لیٹ گلوبو کے مطابق، حادثے کے بعد ٹرک ڈرائیور موقع سے فرار ہو گیا، اور پولیس اسے تلاش کر رہی ہے۔

    برازیل میں شدید بارشوں کے باعث لینڈ سلائیڈنگ، متعدد ہلاک

    گلوبو نے فیڈرل ہائی وے پولیس کا حوالہ دیتے ہوئے رپورٹ کیا کہ جس ہائی وے پر حادثہ پیش آیا وہ 2023 میں ملک کی سب سے مہلک ترین سڑک تھی۔

  • پاکستان اور برازیل کے درمیان دفاعی تعاون کا معاہدے طے پاگیا

    پاکستان اور برازیل کے درمیان دفاعی تعاون کا معاہدے طے پاگیا

    اسلام آباد : پاکستان اور برازیل کے درمیان دفاعی تعاون کا معاہدے طے پاگیا، جبکہ پاکستان نے برازیلی فضائیہ کو JF-17 تھنڈر لڑاکا طیارہ فراہم کرنے کی بھی پیشکش کی۔

    تفصیلات کے مطابق پاکستان اور برازیل کے درمیان دفاعی تعاون کے معاہدے پر دستخط کردیے گئے ، معاہدہ لاطینی امریکہ کی سب سے بڑی دفاعی نمائش LAAD-2025 کے موقع پر طے پایا۔

    معاہدہ پاکستان کے سیکرٹری دفاعی پیداوار لیفٹیننٹ جنرل (ر) محمد چراغ حیدر اور برازیل کے وزیر دفاع جوزے موسیو مونٹیریو فِلہو کے درمیان ایک اعلیٰ سطحی ملاقات کے دوران طے پایا۔

    برازیلی وزیر دفاع نے LAAD-2025 میں پاکستان کی بھرپور شرکت کو سراہا۔

    سیکرٹری دفاعی پیداوار نے پاکستان کی مقامی اور کم لاگت دفاعی صنعت میں مہارت کو اجاگر کیا اور برازیلی فوج کے لیے M-113 آرمرڈ پرسنل کیریئرز کی تجدید میں پاکستان کی خدمات کی پیشکش کی۔

    پاکستان نے برازیلی فضائیہ کو JF-17 تھنڈر لڑاکا طیارہ فراہم کرنے کی بھی پیشکش کی۔

    برازیلی وزیر دفاع نے پاکستانی وفد کو برازیل کے دفاعی شعبے کو درپیش چیلنجز اور ترجیحات سے آگاہ کیا ، جن میں جدیدکاری کے منصوبے، سرحد پار جرائم کے خلاف حکمت عملی اور ایمیزون کے جنگلات کے تحفظ جیسے امور شامل ہیں.