لندن: پرنس ہیری نے برطانوی عدالت سے اپیل کر دی ہے کہ برطانیہ آنے پر انھیں سیکیورٹی فراہم کی جائے۔
تفصیلات کے مطابق پرنس ہیری کے قانونی نمائندوں کا کہنا ہے کہ برطانوی شہزادہ ہیری حکومت کے اس فیصلے کو چیلنج کر رہے ہیں جس میں کہا گیا تھا کہ برطانوی سرزمین پر انھیں پولیس تحفظ نہیں ملنا چاہیے، چاہے وہ خود اخراجات برداشت کر لیں۔
پرنس ہیری کے وکیل کا کہنا ہے کہ برطانیہ ہیری کا گھر ہے، یہاں آنے پر ان کو بھرپور سیکیورٹی ملنی چاہیے، سیکیورٹی نہ ملنے پر ان کی اہل خانہ کو جان کا خطرہ ہو سکتا ہے۔
ملکہ الزبتھ کے پوتے ہیری اور ان کی امریکی بیوی میگھن مارکل نے لاس اینجلس میں زندگی نئے سرے سے شروع کرنے کے لیے 2020 میں شاہی فرائض چھوڑ دیے تھے، اس کے بعد سے وہ ایک نجی سیکیورٹی ٹیم پر انحصار کر رہے ہیں۔
تاہم، ان کے قانونی نمائندوں کا کہنا ہے کہ یہ سیکیورٹی شہزادے کو وہ تحفظ فراہم نہیں کر سکتی جس کی انھیں برطانیہ کے دورے کے دوران ضرورت ہے۔
قانونی نمائندوں کے مطابق اس طرح کے تحفظ کی عدم موجودگی میں شہزادہ ہیری اور ان کا خاندان اپنے گھر واپس نہیں جا سکتے، جولائی 2021 میں ایک واقعہ کا حوالہ دیتے ہوئے انھوں نے کہا پولیس تحفظ کی کمی کی وجہ سے چیریٹی ایونٹ چھوڑتے وقت ان کی سیکیورٹی پر سمجھوتا کیا گیا تھا۔
