Tag: برطانوی وزیرخارجہ ڈیوڈ لیمی

برطانوی وزیرخارجہ ڈیوڈ لیمی نے بانی پی ٹی آئی اور پاکستان کی صورتحال پر ممبران پارلیمنٹ کے خط کا جواب دیدیا ہے۔

اے آر وائی نیوز کے مطابق برطانوی وزیرخارجہ ڈیوڈ لیمی نے خط کا جواب دیتے ہوئے لکھا کہ پاکستان میں آزادی اظہار اور سیاسی مخالفین پر پابندیوں سے متعلق تشویش ہے، بانی پی ٹی آئی سمیت پاکستانیوں کیلئے شفاف عدالتی عمل ضروری ہے۔

انھوں نے کہا کہ باقاعدگی سے اہم معاملات پر سینئر سطح پر بات چیت کرتے ہیں، پاکستانی عدالتی معاملات داخلی ہیں لیکن عالمی قوانین کی پاسداری چاہتے ہیں، پاکستان بنیادی آزادیوں اور شفاف ٹرائل کے حق کا احترام کرے۔

خط میں سویلین کے فوجی عدالتوں میں ٹرائل کی شفافیت اور آزادانہ جانچ پر بھی تحفظات کا اظہار کیا گیا، ڈیوڈ نے کہا کہ معلومات کےمطابق حکومت کا بانی پی ٹی آئی کا فوجی عدالتون میں ٹرائل کا ارادہ نہیں۔

برطانوی وزیرخارجہ کا مزید کہنا تھا کہ آزادی اظہار رائے اور بغیر خوف کے اجتماع کا حق جمہوریت کی بنیاد ہے، متعلقہ وزیر نے پاکستانی وزیر انسانی حقوق کیساتھ سول اور سیاسی حقوق پربات کی۔

انھوں نے کہا کہ پاکستان میں آئینی ترامیم کی منظوری پارلیمنٹ کا معاملہ ہے، برطانوی وزیرخارجہ دیوڈ لیمی نے ممبران پارلیمنٹ کے خط کے جواب میں آزادعدلیہ کی اہمیت پر زوردیا۔

برطانوی وزیرخارجہ نے کہا کہ متعلقہ وزیرفالکنر دورہ پاکستان سے واپس آکر ممبران پارلیمنٹ سے ملاقات کرینگے، زلفی بخاری نے وزیرخارجہ کو خط لکھنے والے ممبر پارلیمنٹ کم جونسن اور دیگر کا شکریہ ادا کیا۔