Tag: برطانوی ہائی کمشنر

اسلام آباد: پاکستان میں تعینات برطانوی ہائی کمشنر کرسچن ٹرنر نے پشاور دھماکے کی مذمت کی ہے۔

اے آر وائی نیوز کے مطابق برطانوی ہائی کمشنر نے پشاور کی ایک مسجد میں بم دھماکے پر رد عمل میں کہا ہے کہ بچوں کے مدرسے پر بزدلانہ حملہ بے حسی ہے۔

کرسچن ٹرنر نے اپنے ٹویٹر اکاؤنٹ کے ذریعے دیے گئے پیغام میں بچوں پر بم حملے کو بزدلانہ قرار دیا، انھوں نے اپنے پیغام میں دہشت گردی کے خلاف پاکستان کے عزم کا ذکر کیا اور متاثرین سے تعزیت بھی کی۔

Cowardly attacks on children in schools is senseless. Pakistan’s resolve against terrorism remains strong. Condolences to all those affected by the #PeshawarBlast cc @GovtofPakistan @tariqahmadbt @ukinpakistan

— Christian Turner (@CTurnerFCDO) October 27, 2020

انھوں نے کہا پاکستان کا دہشت گردی کے خلاف عزم مستحکم رہے گا، میں حملے میں متاثر ہونے والوں سے تعزیت کرتا ہوں۔

پشاور: مدرسہ میں دھماکا ،7 بچے شہید ، 96 زخمی

واضح رہے کہ آج صبح خیبر پختون خوا کے شہر پشاور کے علاقے دیر کالونی میں ایک مدرسے میں دھماکے کے نتیجے میں 7 بچے شہید اور 96 زخمی ہوئے، پولیس کا کہنا تھا کہ مدرسے میں آئی ای ڈی دھماکا ہوا، دھماکے کے زخمیوں میں زیادہ ترتعداد بچوں کی تھی۔

رپورٹس کے مطابق دھماکے کے وقت بچے تعلیم حاصل کرنے میں مصروف تھے، اور معلم نے مائیک پر درس قرآن کا آغاز کیا ہی تھا کہ اچانک زور دار دھماکا ہوا، اور ہر طرف ہول ناک آگ لگ گئی اور زخمیوں کی چیخ و پکار سے در و دیوار ہل گئے۔

کراچی: چیئرمین پیپلزپارٹی بلاول بھٹو زرداری اور برطانوی ہائی کمشنر کرسچن ٹرنر کے درمیان ٹیلی فونک رابطہ ہوا ہے۔

تفصیلات کے مطابق پیپلزپارٹی کے سربراہ بلاول بھٹو زرداری اور برطانوی ہائی کمشنر کے درمیان ٹیلی فونک رابطہ ہوا جس میں کرونا وائرس سے متعلق صورت حال پر بات چیت کی گئی۔

اس موقع پر بلاول بھڑو زرداری نے کہا کہ کرونا کے باعث سندھ حکومت نے فوری تعلیمی اداروں کو بند کیا،وائرس کا پھیلاؤ روکنے کے لیے فوری لاک ڈاؤن کا فیصلہ کیا۔

چیئرمین پیپلزپارٹی نے ڈیپارٹمنٹ فار انٹرنیشنل ڈویلپمنٹ کے تعاون پر اظہار تشکر کیا۔بلاول بھٹو اور برطانوی ہائی کمشنر میں موجودہ حالات میں رابطے کی ضرورت پر بھی اتفاق کیا گیا۔

برطانیہ کا پاکستان کے لیے امداد کا اعلان

اس سے قبل برطانوی ہائی کمشنر کرسچن ٹرنر نے سماجی رابطے کی ویب سائٹ ٹویٹر پر اپنے پیغام میں کہا تھا کہ پاکستان کو کرونا سے نمٹنے کے لیے 26 لاکھ 70 ہزار پاؤنڈ امداد دیں گے۔

برطانوی ہائی کمشنر کا کہنا تھا کہ دوست ہی مشکل وقت میں کام آتا ہے،ہمیں اپنے رویوں اور برتاؤ میں تبدیلی لانا ہوگی۔کرسچن ٹرنر نے اپنے پیغام میں مزید کہا تھا کہ دنیا بھر میں عوام کروناکی وجہ سے متاثر ہو رہے ہیں،پاکستان کرونا کے نقصانات سے باہر آنے کی صلاحیت رکھتا ہے۔

لاہور: پاکستان میں تعینات برطانوی ہائی کمشنر کرسچین ٹرنر نے کہا ہے کہ پاکستان آیا تو پتا چلا کہ یہاں کے بارے میں جو تاثر پھیلا ہوا ہے وہ حقیقت کے برعکس ہے، پاکستان میں اپنا وقت بہت انجوائے کر رہا ہوں۔

ان خیالات کا اظہار انھوں نے اے آر وائی نیوز سے خصوصی گفتگو کرتے ہوئے کیا، برطانوی ہائی کمشنر کرسچین ٹرنر کا کہنا تھا کہ انھوں نے پاکستان کے حالات پر ٹریول ایڈوائزری میں نظر ثانی کی تجویز دی تھی، 2015 کے بعد پہلی بار پاکستان کے لیے ٹریول ایڈوائزری میں نرمی کی، حالات کا جائزہ لے کر برطانیہ نے نئی ٹریول ایڈائزری جاری کی۔

انھوں نے اس بات پر افسوس کا اظہار کیا کہ بعض ملکوں کے لیے انتہائی سخت ایڈوائزری جاری کی جاتی ہے، سیکورٹی کا مسئلہ دنیا کے کسی بھی شہر میں ہو سکتا ہے، لندن برج سے برطانیہ میں کئی بڑے حملے ہوئے، 2014 کے بعد پاکستان میں دہشت گردی کے خلاف زبردست کام ہوا، بڑی قربانیوں کے بعد پاکستان میں امن قائم ہوا، برطانوی شہری پاکستان کی حسین وادیوں کی سیر کر سکتے ہیں۔

پروگرام پاور پلے میں گفتگو کرتے ہوئے ان کا کہنا تھا کہ وہ پروگرام میں اپنی خراب اردو آزما رہے ہیں، پاکستانی کھانے بہت مزے دار ہیں، آپ مجھے دال، ساگ کچھ بھی کھلائیں بہت پسند ہے، دو بار لاہور اور کراچی آیا، ابھی اسلام آباد میں ہوں۔ انھوں نے کہا کہ جمیا نئیں لاہور کی بات سے برطانوی کہاوت یاد آتی ہے، کہاوت ہے جو لندن میں تھک گیا وہ زندگی سے تھک گیا، لاہور اور لندن سے سمجھیں میں دو بار پیدا ہوا ہوں۔ کرسچین ٹرنر نے بتایا کہ انھیں لاہور میں بے تحاشا کھانے کھلائے گئے، انھوں نے اتنے کھانے کھائے کہ اس کے بعد ڈائٹنگ کرنا پڑی۔

برطانوی ہائی کمشنر نے کرکٹ کے حوالے سے کہا کرکٹ ہمارے خون میں شامل ہماری ذات کا حصہ ہے، کرکٹ انوکھے طریقے سے دو ملکوں کو ملاتی ہے، ٹاپ انگلش کھلاڑی پی ایس ایل کے لیے پاکستان آ رہے ہیں، ایم سی سی پریذیڈنٹ الیون آیندہ ماہ پاکستان آ رہی ہے، ایم سی سی پاکستان میں کھیلے گی تو انگلش ٹیم کی راہ ہم وار ہوگی، ٹیم کو پاکستان میں کھیلتا دیکھ کر خوشی ہوگی۔ انھوں نے کہا کہ پاکستان برطانیہ میں 3 میچوں کی سیریز کھیلے گا، کس ٹیم کو سپورٹ کروں قانون کیا کہتا ہے، اس بارے میں الجھا ہوا ہوں۔

کرسچین ٹرنر نے دیگر موضوعات پر بھی گفتگو کی، انھوں نے کہا پاکستان اور برطانوی لوگوں کے تعلقات پرانے اور گہرے ہیں، برطانیہ کے 15 لاکھ شہری پاکستانی نژاد ہیں، برطانیہ میں اس وقت بریگزٹ کا ایشو ہے، جس کے بارے میں جمعے کو فیصلہ ہوگا، بریگزٹ کے بعد برطانیہ کو دو طرفہ تجارتی معاہدوں کی ضرورت ہے، پاکستان اور برطانیہ میں تحویل مجرمان کا معاہدہ جلد ہونے کی امید ہے، برطانوی عدالتوں کو مطلوب 2 مجرم پاکستان بدر کیے جا چکے ہیں، ایک ملزم خاتون پولیس اہل کار کے قتل میں ملوث تھا، دوسرا کیس پیچیدہ ہے، تاہم برطانوی ہائی کمیشن اور پاکستانی اداروں نے اچھا کام کیا۔

اسلام آباد: وزیرداخلہ اعجاز شاہ نے کہا کہ انگلش کرکٹ ٹیم کو پاکستان لانے پر غور کیا جائے، انگلش ٹیم پاکستان آنے پر مکمل تعاون کریں گے۔

تفصیلات کے مطابق وفاقی دارالحکومت اسلام آباد میں وزیر داخلہ اعجاز شاہ اور برطانیہ کے نئے ہائی کمشنر ڈاکٹر کرسچین ٹرنر کے درمیان ملاقات ہوئی۔

برطانوی ہائی کمشنر نے کہا کہ برطانیہ کے لیے پاکستان سے دوطرفہ تعلقات کی بہتری اہمیت کی حامل ہے، کرکٹ سے وابستگی دونوں ملکوں کو قریب لاتی ہے، پاکستان میں بین الاقوامی کرکٹ کی واپسی خوش آئند ہے۔

وزیرداخلہ اعجاز شاہ نے کہا کہ انگلش کرکٹ ٹیم کو پاکستان لانے پر غور کیا جائے، انگلش ٹیم پاکستان آنے پر مکمل تعاون کریں گے۔ انہوں نے کہا کہ کرکٹ کا کھیل پاکستانی لوگوں کے دلوں کے بے حد قریب ہے

ڈاکٹر کرسچین ٹرنر نے کہا کہ انگلشن کرکٹ ٹیم کو پاکستان لاسکا تو میرے لیے اعزاز کی بات ہوگی، اس سلسلے میں ضروری اقدامات کو فوراً زیر غور لاؤں گا۔

یاد رہے کہ گزشتہ ہفتے لاہورمیں گورنر پنجاب چوہدری محمد سرور سے برطانوی ہائی کمشنر نے ملاقات کے دوران افغان امن، امریکا، ایران صورت حال اور بریگزٹ پر بھی بات چیت کی تھی۔ گورنر پنجاب نے برطانوی ہائی کمشنر کو مقبوضہ کشمیرسے متعلق پاکستانی تحفظات سے آگاہ کیا تھا۔

اسلام آباد: برطانوی ہائی کمشنر تھامس ڈریو نے قبائلی اضلاع کے اوّلین اور تاریخ ساز انتخابات پر تبصرہ کرتے ہوئے کہا کہ آج قبائلی عوام کے لیے تاریخی دن ہے۔

تفصیلات کے مطابق سماجی رابطوں کی ویب سائٹ ٹویٹر پر برطانوی ہائی کمشنر نے اپنے پیغام میں خیبر پختون خوا میں نئے ضم شدہ اضلاع کے عوام کے لیے نیک تمناؤں کا اظہار کیا۔

تھامس ڈریو نے ٹویٹ کیا کہ سابق فاٹا کے لیے یہ ایک تاریخی دن ہے، کیوں کہ وہ پہلی بار کے پی اسمبلی کے لیے اپنے ممبرز کا انتخاب کر رہے ہیں۔

Best wishes to the people of Khyber Pakhtunkhwa’s Newly Merged Districts. A historic day for the former #FATA as they elect members of the KP Assembly for the first time. May they do so safely and freely.

— Thomas Drew (@TomDrewUK) July 20, 2019

برطانوی ہائی کمشنر نے عوام کے لیے نیک خواہشات کے اظہار کے ساتھ ساتھ دعا بھی کی کہ قبائلی عوام الیکشن کے اس عمل کو آزادانہ اور محفوظ طریقے سے پورا کریں۔

خیال رہے کہ صوبہ خیبر پختون خواہ میں ضم کیے گئے قبائلی علاقوں میں منعقدہ تاریخ ساز انتخابات میں گنتی کا عمل جاری ہے، غیر حتمی نتایج کی آمد کا سلسلہ بھی شروع ہو چکا ہے، پولنگ کا عمل بغیر کسی وقفے کے شام 5 بجے تک جاری رہا، یہاں 16 صوبائی نشستوں پر مقابلہ ہوا۔

یہ بھی پڑھیں:  قبائلی اضلاع میں الیکشن: غیر سرکاری نتائج کا سلسلہ جاری

اٹھائیس لاکھ سے زاید ووٹرز نے حقِ رائے دہی استعمال کیا، دو خواتین سمیت دو سو پچاسی امیدوار میدان سیاست میں‌ مد مقابل تھے۔

الیکشن کا عمل پُر امن تھا، عوام کی بڑی تعداد نے شرکت کی، بزرگوں کے علاوہ خواتین نے بھی بڑھ چڑھ کر ووٹ ڈالے، 1 ہزار 897 پولنگ اسٹیشنز قایم کیے گئے تھے، جس میں 554 کو انتہائی حساس اور 461 کو حساس قرار دیا گیا تھا۔