ARYNews.tv | Urdu – Har Lamha Bakhabar

Tag: برفانی طوفان

  • ویڈیوز: برفانی طوفان نے نیو یارک کے کچھ حصوں کو مفلوج کر دیا

    ویڈیوز: برفانی طوفان نے نیو یارک کے کچھ حصوں کو مفلوج کر دیا

    نیویارک: امریکی ریاست نیویارک کے مغربی علاقوں میں برفانی طوفان نے نظام زندگی منجمد کر دیا۔

    تفصیلات کے مطابق ایک خطرناک ’’لَیک ایفکٹ‘ والے برفانی طوفان نے جمعہ کو مغربی اور شمالی نیو یارک کے کچھ حصوں کو مفلوج کر دیا۔

    کچھ مقامات پر 4 فٹ سے زیادہ برف باری ہوئی، ماہرین کا کہنا ہے کہ ہفتے کی رات تک مزید برف گرنے کا امکان ہے، طوفان کے دوران برف صاف کرتے ہوئے 2 افراد برف میں دب کر ہلاک ہو گئے۔

    رپورٹس کے مطابق شہر بفیلو میں چار فٹ برف باری نے لوگوں کا گھروں سے نکلنا مشکل کر دیا، لوگ گھروں میں محصور ہو چکے ہیں، شاہراہیں اور پارک برف سے ڈھک گئے۔

    شہر کے گورنر نے ایمرجنسی نافذ کر دی ہے، محکمہ موسمیات نے کہا ہے کہ آئندہ دو روز میں مزید برف باری کی پیش گوئی ہے، انتظامیہ نے لوگوں کو گھروں میں رہنے کی ہدایت جاری کر دی۔

    ماہرین کا کہنا ہے کہ لیک ایفکٹ والے طوفانوں کے اثرات بہت ہی متنوع ہوتے ہیں، جب گرم جھیلوں کے اوپر سے ٹھنڈی ہوائیں گزرتی ہیں تو، ہواؤں کی نچلی لہر جھیل سے بخارات اٹھا لیتی ہے جو اوپری لہر میں جا کر برف بن جاتے ہیں، برف والی یہ ہوائیں پھر آگے جا کر مختلف مقامات پر برف گرا دیتی ہیں۔

    یہی وجہ ہے کہ جمعہ کو بفیلو کے کچھ حصوں میں تو چار فٹ برف گری، جب کہ کچھ حصوں میں صرف چند انچ کی برف باری ہوئی۔

  • شدید سردی، امریکی ریاست میں پانی اور بجلی بھی غائب، خوفناک مناظر

    شدید سردی، امریکی ریاست میں پانی اور بجلی بھی غائب، خوفناک مناظر

    امریکی ریاست ٹیکسس میں تاریخ کے بدترین برفانی طوفان نے تباہی مچادی، لاکھوں لوگ 2 روز سے پانی اور بجلی کی فراہمی سے محروم ہیں، سخت موسم کے باعث اب تک 25 افراد ہلاک ہوچکے ہیں۔

    بین الاقوامی میڈیا کے مطابق امریکا کی کئی جنوبی ریاستیں اس وقت شدید برفانی طوفان کی لپیٹ میں ہیں تاہم ریاست ٹیکسس سب سے زیادہ متاثر ہوئی ہے۔

    ریاست میں درجہ حرارت منفی 18 ڈگری سینٹی گریڈ ہے اور ایسے سرد ترین موسم میں تقریباً 20 لاکھ کے قریب افراد 2 روز سے پانی و بجلی سے محروم ہیں۔

    لوگ لکڑیاں جلا کر خود کو گرم رکھنے کی کوشش کر رہے ہیں جس کے باعث لکڑیوں کی قلت پیدا ہوگئی ہے، علاوہ ازیں گروسری اسٹورز میں بھی اشیائے ضرورت کم پڑ گئی ہیں۔

    ہیٹنگ سسٹم معطل ہوجانے کے باعث گھروں میں موجود اشیا برف بن چکی ہیں۔

    ایک خاتون نے سوشل میڈیا پر اپنے فش ٹینک کی تصویر شیئر کی جو مکمل طور پر جم چکا ہے اور اس کے اندر موجود مچھلی مرچکی ہے۔

    شہر ڈلاس سے ایک اور تصویر سامنے آئی جس میں ایک گاڑی لیک ہوتے پانی کے پائپ کے نیچے کھڑی تھی جو اب جم چکی ہے۔

    شدید موسمی حالات اور حادثات کے باعث اب تک 21 افراد ہلاک ہوچکے ہیں۔

    حکام کے مطابق یہ برفانی طوفان 30 سالہ تاریخ کا بدترین طوفان ہے، حکام نے حالات مزید بگڑنے کی وارننگ بھی جاری کی ہے۔

    نیشنل ویدر سروس کا کہنا ہے کہ ملک بھر میں مزید برفانی طوفانوں کا امکان ہے جس سے لگ بھگ 15 کروڑ شہری متاثر ہوں گے، اس وقت ملک کا 73 فیصد سے زائد حصہ مکمل طور پر برف سے ڈھکا ہوا ہے۔

  • اسپین کو شدید ترین برفانی طوفان نے گھیر لیا، 3 ہلاک، ہزاروں لوگ گاڑیوں میں پھنس گئے

    اسپین کو شدید ترین برفانی طوفان نے گھیر لیا، 3 ہلاک، ہزاروں لوگ گاڑیوں میں پھنس گئے

    میڈرڈ: اسپین کو پچاس برسوں کے شدید ترین برفانی طوفان نے گھیر لیا ہے، جس میں کم از کم 3 افراد ہلاک ہو گئے ہیں۔

    غیر ملکی میڈیا کے مطابق اسپین میں برفانی طوفان نے نظام زندگی مکمل مفلوج کر دیا ہے، طوفان کے باعث ٹرین، فضائی سروس بند ہو گئی ہے، جب کہ مزید برف باری کا بھی امکان ظاہر کیا گیا ہے۔

    برفانی طوفان فلومینا نے اسپین کے دارالحکومت میڈرڈ کی زندگی کو مکمل طور پر منجمد کر دیا ہے، بتایا جا رہا ہے کہ یہ 50 برسوں کا سب سے شدید برفانی طوفان ہے، عوام سے اپیل کی گئی ہے کہ وہ گھروں سے باہر بالکل نہ نکلیں۔

    ہسپانوی حکومت کا کہنا ہے کہ میڈرڈ اور قرب و جوار کے علاقے پوری طرح برف باری سے مفلوج ہو چکے ہیں، اور جگہ جگہ ہزاروں مسافر اپنی گاڑیوں میں پھنسے ہوئے ہیں۔

    برفانی طوفان فلومینا جمعے کو اسپین سے ٹکرایا تھا، ایسی برف باری 1971 کے بعد سے کبھی نہیں دیکھی گئی، موسمیاتی ادارے نے بتایا کہ رات بھر برف باری ہوتی رہی اور اگلے دن ہفتے کو میڈرڈ میں 50 سینٹی میٹر برف پڑ چکی تھی۔

    اسپین کی ایمرجنسی سروسز کے مطابق ہفتے کی صبح کو فوینخیرولا ٹاؤن میں ایک کار پھسل کر دریا میں گر گئی تھی جس میں ایک آدمی اور ایک عورت سوار ہلاک ہوئے، میڈرڈ کے گاؤں زار زلیجو میں ایک شخص برف میں دفن ہو کر جان سے ہاتھ دھو بیٹھا تھا۔ ایمرجنسی سروسز نے بتایا کہ ہفتے کو ایک بے گھر شخص کی کارابانخل میں بھی موت ہو گئی تھی تاہم وہ دل کے دورے سے مرا تھا، ٹھنڈ سے نہیں۔

    واضح رہے کہ اسپین میں 5 صوبوں ویلنسیا، کاسٹیلن، ٹیراگونا، ٹیرئل اور زاراگوزا میں برفانی طوفان سے ریڈ الرٹ کیا گیا ہے۔

  • غم کی اس گھڑی میں ترک بھائیوں کے ساتھ ہیں: پاکستان

    غم کی اس گھڑی میں ترک بھائیوں کے ساتھ ہیں: پاکستان

    اسلام آباد: پاکستان نے مشرقی ترکی میں دو برفانی طوفانوں میں 38 قیمتی جانوں کی ہلاکت پر اظہار افسوس کرتے ہوئے کہا ہے وہ غم کی اس گھڑی میں ترک بھائیوں کے ساتھ ہے۔

    تفصیلات کے مطابق مشرقی ترکی میں برفانی طوفانوں کی زد میں آکر 38 افراد جان سے ہاتھ دھو بیٹھے تھے، برفانی تودوں کے نیچے دبے ہوئے افراد کو ریسکیو کرنے کے لیے تاحال آپریشن جاری ہے۔

    پاکستان نے اس سلسلے میں بیان جاری کرتے ہوئے کہا ہے کہ غم کی اس گھڑی میں ترک بھائیوں کے ساتھ ہیں، ہماری ہم دردی سانحہ متاثرین کے ساتھ ہے، لاپتا افراد کی جلد بازیابی کے لیے بھی دعا گو ہیں۔ ترجمان دفتر خارجہ کا کہنا تھا کہ ہم ترک بھائیوں کی ہر ممکن مدد کے لیے تیار ہیں۔

    ترکی میں برفانی تودہ گرنے سے 38 افراد جاں بحق

    خیال رہے کہ منگل کے روز مشرقی ترکی کے صوبے وان میں پہاڑی ضلع باچہ زرائے (فارسی باغچہ سرائے) میں برفانی طوفان آنے سے 5 افراد ہلاک ہو گئے تھے، ان افراد کے سلسلے میں 300 ایمرجنسی سروس ورکرز امدادی کارروائیوں میں مصروف تھے کہ گزشتہ روز بدھ کو دوسرا برفانی طوفان آیا، جس سے ہلاکتوں کی تعداد 38 تک پہنچ گئی۔

    غیر ملکی میڈیا کے مطابق زیادہ تر افراد دوسرے برفانی طوفان آنے سے تودوں کے نیچے دفن ہوئے، ریسکیو آپریشن تاحال جاری ہے تاہم اس بات کا بھی خدشہ ظاہر کیا گیا ہے کہ تیسرا ایوا لانچ بھی آ سکتا ہے، جس کے باعث آپریشن روک بھی دیا گیا تھا۔

  • کے 2 پر برفانی طوفان، کوہ پیماؤں کے خیمے اکھڑ گئے

    کے 2 پر برفانی طوفان، کوہ پیماؤں کے خیمے اکھڑ گئے

    اسکردو: دنیا کی دوسری بلند ترین چوٹی کے 2 کے بیس کیمپ پر موجود کوہ پیماؤں کو برفانی طوفان نے آلیا، 120 کلو میٹر فی گھنٹے کی رفتار سے چلنے والی برفانی ہواؤں نے کوہ پیماؤں کے خیمے زمین سے اکھاڑ دیے۔

    تفصیلات کے مطابق دنیا کی دوسری بلند ترین چوٹی کے 2 کے بیس کیمپ میں 120 کلو میٹر فی گھنٹے کی رفتار سے برفانی طوفان آگیا، ذرائع کے مطابق بلند پہاڑوں پر برفانی طوفان کی رفتار 240 کلو میٹر فی گھنٹہ تک تھی۔

    ذرائع کا کہنا ہے کہ برفانی طوفان کے بعد براوٹ پیک بیس کیمپ میں کوہ پیماؤں کے خیمے زمین سے اکھڑ گئے، طوفان سے انفرادی خیموں اور کچن ٹینٹ کو بھی نقصان پہنچا۔

    ذرائع کا کہنا ہے کہ باس وقت یس کیمپ میں اسپین، اٹلی، چین، کینیڈا، ہالینڈ، فن لینڈ، نیپال اور پاکستان سے تعلق رکھنے والے کوہ پیما موجود ہیں جن کی مہم جوئی شدید مشکلات کا شکار ہوگئی ہے۔

    یاد رہے کہ پاکستان میں واقع کے ٹو دنیا کی دوسری بلند ترین چوٹی ہے جس کی لمبائی 8 ہزار 6 سو 11 میٹر ہے۔

    اس سے قبل سنہ 2018 میں بھی نیپال میں گورجا ہمل پہاڑ سر کرنے کی کوشش کرنے والے 5 جنوبی کوریائی کوہ پیماؤں سمیت 7 افراد برفانی طوفان کی زد میں آکر ہلاک ہوگئے تھے۔

    برفانی طوفان کے نتیجے میں ہلاک ہونے والے کوہ پیماؤں میں جنوبی کوریا کے کوہ پیما کم چینگ ہو بھی شامل تھے جو بغیر آکسیجن سلنڈر کے 14 چوٹیاں عبور کرنے کا منفرد ریکارڈ اپنے نام کرچکے تھے۔

  • امریکا میں برفانی طوفان نے تباہی مچادی، سات افراد ہلاک

    امریکا میں برفانی طوفان نے تباہی مچادی، سات افراد ہلاک

    نیویارک : امریکا کی مختلف ریاستوں میں برفباری نے معمولات زندگی درہم برہم کردیا، امریکا کی وسط مغربی ریاستوں میں برفانی طوفان کے باعث مختلف حادثات میں سات افرادہلاک ہوگئے۔

    تفصیلات کے مطابق امریکا کی مختلف ریاستوں میں گزشتہ ایک ماہ سے مسلسل ہونے والے برفباری نے موسم مزید سرحد کردیا ہے، اب تک برفباری سے ہونے والے حادثات میں سات افراد جان کی بازی ہار چکے ہیں جبکہ نیویارک میں میں درجہ حرارت منفی ایک تک گرگیا۔

    شدید برفباری سے سڑکوں، گھروں اور درختوں نے برف کی چادر اوڑھ لی اور شہری گھروں میں محصور ہوگئے۔

    امریکی میڈیا کے مطابق دارالحکومت واشنگٹن، شکاگو اور نیویارک میں درجہ حرارت منفی ایک تک گر گیا ہے جبکہ میسوری، کنساس سمیت دیگر ریاستوں میں نظام زندگی مفلوج اور ٹریفک کا نظام درہم برہم ہوگیا ہے۔

    مقامی خبر رساں اداروں کا کہنا ہے کہ شکاگو میں شدید برفباری کے باعث متعدد پروازیں بھی منسوخ ہوگئی ہیں، جس کے باعث ہزاروں مسافروں کو پریشانی کا سامنا کرنا پڑرہا ہے۔

    یاد رہے کہ گذشتہ برس نومبر میں امریکا کے جنوب مشرقی علاقوں میں دس روز قبل شروع ہونے والی موسم کی پہلی برفباری نے موسم کی شدت میں اضافہ کردیا تھا، جس کے باعث رونما ہونے والے مختلف حادثات میں متعدد افراد جان کی بازی ہار گئے تھے۔

    خیال رہے کہ 2017 بھی امریکا کے لیے قدرتی آفات کے حوالے سے بدترین ثابت ہوا تھا، یکے بعد دیگرے 4 طوفانوں نے امریکی ریاستوں کو تباہی سے دو چار کیا جبکہ درجنوں ہلاکتیں بھی ہوئی تھیں۔

  • آسٹریا میں برفانی طوفان، عوام کو بلاضرورت باہر نہ نکلنے کی ہدایت

    آسٹریا میں برفانی طوفان، عوام کو بلاضرورت باہر نہ نکلنے کی ہدایت

    ویانا : یورپ ان دنوں شدید برفباری کی لپیٹ میں ہے لیکن آسٹریا میں برفباری طوفان کے باعث نظام زندگی مفلوج ہوکر رہ گیا ہے۔

    تفصیلات کے مطابق یورپ بھر میں برف کی تباہ کاریوں سے نظام زندگی متاثر ہورہا ہے، آسٹرین حکام کی جانب سے مختلف علاقوں میں برفباری کے بعد برفانی تودے گردنے کا الرٹ جاری کردیا ہے۔

    غیر ملکی خبر رساں ادارے کا کہنا تھا کہ آسٹریا میں گھروں اور سڑکوں پر برف کی تہہ جم گئی ہے جسے ہٹانے کا کام جاری ہے۔

    غیر ملکی میڈیا کے مطابق برفباری سے متاثرہ علاقوں میں بجلی اور مواصلاتی نظام بھی درہم برہم ہوگیا ہے، حکام کی جان سے عوام کو گھروں سے غیر ضرورت باہر نہ نکلنے اور احتیاط برتنے کی ہدایات جاری کر دی ہیں۔

    آسٹریان حکومت کی جانب سے شہریوں کو ہدایت دی گئی ہے کہ اپنے گھروں کی چھت سے برف صاف کرتے رہیں، کیوں برف جمنے کے باعث ایک گھر کی چھت گر چکی ہے جس کے نتیجے میں 78 سالہ زخص زخمی ہوگیا تھا.

    مزید پڑھیں : یورپ میں شدید برف باری، سات ہلاک

    یاد رہے کہ ایک روز قبل آسٹریا میں دو جرمن اسکیئرز کوہ ِ وورارل برگ پر مارے ہلاک ہوگئے تھے جبکہ تیسرا اسکیئر پونگو نامی قصبے میں ہلاک ہوا تھا۔

    غیر ملکی خبر رساں ادارے کا کہنا ہے کہ اسکیئرز کو وارننگ جاری کردی گئی ہے کہ وہ اس موسم میں اسکینگ کرنے سے گریز کریں، متعلقہ حکام نے پہاڑوں کو جانے والی متعدد سڑکیں بھی بند کردی ہیں۔

    یورپ بھر میں سب سے زیادہ آسٹریا اس برفباری سے متاثر ہے جہاں برف باری کے سبب متعدد درس گاہیں بھی بند کردی گئیں ہیں جبکہ ٹرین سروس بھی متاثر ہوئی ہے۔

    آسٹریا کے محکمہ موسمیات کی جانب سے پیش گوئی کی گئی تھی کہ جمعرات تک مزید ۴ فیٹ برف باری ہوگی۔

  • امریکہ اوربرطانیہ میں برفانی طوفان، نظام زندگی مفلوج

    امریکہ اوربرطانیہ میں برفانی طوفان، نظام زندگی مفلوج

    لندن / واشنگٹن : امریکا اور برطانیہ کے مختلف علاقوں میں برفانی طوفان نے نظام زندگی کو مفلوج کردیا، بیشتر علاقے برف سے ڈھک گئے، سڑکوں پر برف جمنے سے ٹریفک کا نظام درہم برہم ہوگیا، پروازیں منسوخ کردی گئیں۔

    تفصیلات کے مطابق امریکا اور برطانیہ میں موسمی آفات کا نہ رکنے والا سلسلہ جاری ہے، امریکی ریاستوں نیویارک، آرکیناس، اوکلوہوما، ٹیکساس اور الامابا میں تیز ہواؤں اور برفانی طوفان سے زندگی مفلوج ہو کر رہ گئی ہے۔

    لندن میں بھی شدید برفباری کے باعث ویلز، اسکاٹ لینڈ ، شمالی آئیرلینڈ اور مغربی انگلینڈ طوفان کی لپیٹ میں ہیں، نظام زندگی مفلوج ہوکر رہ گیا، برمنگھم اور لندن برفباری کی لپیٹ میں ہیں، برفباری کے باعث مواصلاتی نظام درہم برہم ہوگیا۔

    ویلز ،اسکاٹ لینڈ ، شمالی آئیرلینڈ اور مغربی انگلینڈ میں شدید برفباری کے باعث زرد وارننگ جاری کردی گئی ہے، اسکاٹ لینڈ میں درجہ حرارت منفی نو ڈگری تک گر گیا۔

    رات بھر برف باری کے بعد ماہرین موسمیات نے سڑک، ریل اور فضائی سفر کے دوران تعطل کی وارننگ جاری کردی، جنوب مشرقی امریکہ برفانی طوفان کی زد میں ہے، متعدد پروازیں منسوخ ہونے کی وجہ سے اٹلانٹا ائرپورٹ پر مسافر پھنسے ہوئے ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • امریکا میں برفانی طوفان، زندگی مفلوج

    امریکا میں برفانی طوفان، زندگی مفلوج

    نیویارک :امریکا کی مختلف ریاستیں بدستوربرفانی طوفان کی لپیٹ میں ہیں، نیویارک سمیت متعدد ریاستوں میں نظامِ زندگی مفلوج ہوگیا اور لوگ گھروں میں محصور ہوگئے ہیں۔

    امریکا کی شمالی اوروسطی ریاستوں میں برفباری کا سلسلہ جاری ہے، مسلسل گرتی برف نے معمولاتِ زندگی درہم برہم کر دئیے اور لوگوں کو گھروں میں محصور کردیا ہے۔

    شکاگو میں برفانی طوفان کے باعث چودہ سوسے زائد پروازیں منسوخ کردی گئیں ہیں، برفباری سے ٹریفک کی روانی بھی متاثرہوئی، متعدد علاقوں کو بجلی کی فراہمی بھی معطل ہوگئی ہے۔

    برفباری کی وجہ سے گھروں اور سڑکوں سے برف ہٹانے میں مشکلات کا سامنا ہے۔

    محکمہ موسمیات کی جانب سے شہریوں کو سفر نہ کرنے اور گھروں میں رہنے کی ہدایات جاری کر دی گئی ہیں، برفانی طوفان آئندہ چند روز جاری رہنے کی پیش گوئی کی گئی ہے۔

  • امریکا میں برفانی طوفان سے زندگی مفلوج

    امریکا میں برفانی طوفان سے زندگی مفلوج

    نیویارک: امریکا کی شمال مشرقی ریاستوں میں برفانی طوفان نے معمولاتِ زندگی مفلوج کردئیے ہیں، سات ہزار سے زائد پروازیں منسوخ ہوگئیں  جبکہ مختلف علاقوں میں ریل سروس اورٹریفک معطل ہے۔

    مسلسل پڑتی برف اور خون جما دینے والی سردی نے امریکا کی مختلف ریاستوں میں زندگی مفلوج کردی اور لوگوں کو گھروں میں محصور کردیا لیکن کچھ لوگوں نے برفباری سے لطف اٹھانے کے لئے برف سے ڈھکی گلیوں میں اسکیٹنگ کرکے سرد موسم کا مزہ لیا۔

    شدید سردی نے جہاں انسانوں کو پریشان کیا ہے وہیں چڑیا گھرمیں موجود پینڈا پنجروں سے نکل کربرف سے کھیلنے باہرنکل آئے۔

    برفباری سے متاثرہ نیویارک ، میسا چوسٹس سمیت دیگرعلاقوں میں ایمرجنسی نافذ کرکے تعلیمی ادارے بند کردئیے گئے ہیں۔ برفباری کے باعث ہزاروں صارفین کوبجلی کی فراہمی معطل ہے۔

    سات ہزار سے زائد پروازیں مسنوخ جبکہ ریل سروس اور ٹریفک متاثر ہوئی، سڑکوں سے برف ہٹانے کا کام جاری ہے تاہم مسلسل برفباری سے امدادی کارکن مشکلات کا شکار ہیں۔

    محکمہ موسمیات نے مزید برفباری کی پیش گوئی کی ہے۔