ARYNews.tv | Urdu – Har Lamha Bakhabar

Tag: برفباری

  • پی آئی اے کا طیارہ کوئٹہ کی برف باری میں پھنس گیا

    پی آئی اے کا طیارہ کوئٹہ کی برف باری میں پھنس گیا

    کوئٹہ: پی آئی اے کا طیارہ کوئٹہ میں ڈی آئسنگ کا ساز و سامان نہ ہونے کی وجہ سے پھنس گیا، طیارہ چوبیس گھنٹے سے زائد وقت سے پھنسا ہوا ہے۔

    تفصیلات کے مطابق کوئٹہ ایئر پورٹ پر برف ہٹانے کے آلات کی عدم دستیابی کے باعث پی آئی اے کے طیارے کو پھنسے 24 گھنٹے سے زائد ہو گئے ہیں، کوئٹہ ائیر پورٹ پر برف باری سے فضائی آپریشن بھی بری طرح متاثر ہے۔

    ذرایع کا کہنا ہے کہ سی اے اے کے پاس ائیر پورٹ پر جمی ہوئی برف ہٹانے کے آلات موجود نہیں ہیں، جدہ سے کوئٹہ آنے والی فلائٹ اتری تو برف باری شروع ہو گئی، ترجمان پی آئی اے کا کہنا ہے کہ ایسے موسم میں ڈی آئسنگ (جہاز اور انجن پر سے برف اتارنا) کی ضرورت پڑتی ہے جو کہ کوئٹہ ائیر پورٹ پر مہیا نہیں کی گئی، اسی وجہ سے پی آئی اے کی پرواز وں کا شیڈول بھی متاثر ہو چکا ہے۔

    ترجمان کا کہنا تھا کہ ائیر پورٹس پر یہ سہولت مہیا کرنا سول ایوی ایشن کا کام ہے، طیارہ پھنسنے سے نقصان علیحدہ اور مسافروں کو پریشانی علیحدہ ہوتی ہے، ساتھ ہی پی آئی اے کا دیگر شیڈول بھی شدید متاثر ہوتا ہے۔

    ترجمان عبد اللہ خان نے بتایا کہ پھنسے ہوئے طیارے کے مسافروں کو ہوٹل فراہم کر دیے گئے ہیں اور پی آئی اے ان کو صورت حال سے آگاہ کر رہی ہے، برف اور ضروری سامان اور کیمیکلز کی کوئٹہ ائیر پورٹ پر غیر موجودگی کے باعث پی آئی اے نے دیگر پروازیں بھی منسوخ کردی ہیں، موسم بہتر ہوتے ہی پروازیں بحال کر دی جائیں گی۔

    منسوخ ہونے والی پروازوں میں پی کے 325/326 اسلام آباد کوئٹہ اسلام آباد، پی کے 310/311 کراچی کوئٹہ کراچی اور پی کے 8363 کوئٹہ کراچی شامل ہیں۔

  • اسکردو سمیت دیگر علاقوں میں 24 گھنٹے کے دوران 9 انچ تک برف باری

    اسکردو سمیت دیگر علاقوں میں 24 گھنٹے کے دوران 9 انچ تک برف باری

    گلگت بلتستان: محکمہ موسمیات کا کہنا ہے کہ اسکردو سمیت دیگر علاقوں میں 24 گھنٹے کے دوران 9 انچ تک برف باری ہوئی ہے۔

    تفصیلات کے مطابق اسکردو میں گزشتہ چوبیس گھنٹوں سے برف باری جاری ہے، محکمہ موسمیات کا کہنا ہے کہ اگلی صبح تک برف باری جاری رہنے کا امکان ہے۔

    اسکردو شہر کا درجہ حرارت منفی 8، بالائی علاقوں میں منفی 18 ڈگری سینٹی گریڈ ریکارڈ کیا گیا، محکمہ موسمیات نے 24 گھنٹوں کے دوران شدید برف باری کی پیش گوئی کر دی ہے، گلگت بلتستان حکومت اور انتظامیہ کو بر وقت اقدامات کا خط بھی لکھ دیا گیا ہے۔

    رواں موسم سرما میں یہ اب تک کی شدید برف باری ہے، برف باری کے باعث لینڈ سلائیڈنگ کے خدشات بھی بڑھ گئے ہیں، بالائی علاقوں کے راستے بھی شدید برف باری سے بند ہو گئے ہیں، اسکردو گلگت روڈ بھی بند ہو چکا ہے۔

    شمالی بلوچستان کے بیش تر علاقوں میں بارش اور برف باری رک گئی ہے، چمن میں منفی 3، کوژک ٹاپ میں منفی 7، دوبندی میں منفی 5 درجہ حرارت ریکارڈ کیا گیا، کوژک ٹاپ پر برف باری کے باعث کوئٹہ چمن شاہراہ بند ہو گئی ہے، برف باری اور بارشوں سے کچے مکانات اور دیواریں گر گئی ہیں، چمن میں مکانات کے گرنے سے 6 افراد جاں بحق جب کہ 7 زخمی ہو چکے ہیں، مواصلاتی نظام بھی متاثر ہے، بجلی متعدد علاقوں میں 3 روز سے غائب ہے۔

    مستونگ میں بھی برف باری کا سلسلہ تھم گیا ہے، رابطہ سڑکیں تاحال بند ہیں ، دشت، اسپلنجی اور دیگر علاقوں کا زمینی رابطہ منقطع ہے، کوئٹہ کراچی شاہراہ لکپاس کے مقام پر چھوٹی گاڑیوں کے لیے جزوی بحال کر دی گئی ہے، ضلعی انتظامیہ، پی ڈی ایم اے اور دیگر ادارے امدادی کاموں میں مصروف ہیں۔

    خیبر پختون خوا میں مالاکنڈ ڈویژن میں وقفے وقفے سے بارش اور برف باری کا سلسلہ جاری ہے، چترال میں شدید برف باری سے کئی سڑکیں بند ہو چکی ہیں، محکمہ ریلیف کا کہنا ہے کہ لواری کے مقام پر شدید برف باری کی وجہ سے ٹریفک معطل ہے، وادی کیلاش، دروش، گرم چشمہ روڈ اور چترال بونی روڈ شدید برف باری سے بند ہیں۔ شانگلہ میں بارش کے ساتھ برف باری کا سلسلہ جاری ہے۔

  • ملک بھر میں بارشیں، کراچی میں بھی امکان، بلتستان میں برف باری پھر شروع

    ملک بھر میں بارشیں، کراچی میں بھی امکان، بلتستان میں برف باری پھر شروع

    کراچی: پنجاب کے مختلف شہروں میں بارشیں شروع ہو گئی ہیں، کراچی میں بھی آج بارش کا امکان ہے، جب کہ بلتستان میں ایک بار پھر برف باری شروع ہو گئی ہے۔

    تفصیلات کے مطابق کراچی میں آیندہ 24 گھنٹوں میں ہلکی بارش کا امکان ہے، محکمہ موسمیات کا کہنا ہے کہ بارش سے سردی میں اضافہ ہوگا اور درجہ حرارت 9 ڈگری تک گر سکتا ہے، مطلع جزوی ابر آلود رہے گا۔ دن کے اوقات میں درجہ حرارت 24 ڈگری تک پہنچنے کا امکان ہے، ہوا کی رفتار 10 کلو میٹر، نمی کا تناسب 75 فی صد ریکارڈ کیا گیا، شہر میں سائبیریائی ہوا کا سسٹم بدھ سے ہفتے تک رہے گا۔

    راولپنڈی میں آسمان پر کالے بادل چھا گئے ہیں، بعض علاقوں میں ہلکی بارش ہوئی۔ لاہور شہر اور نواحی علاقوں میں بارش کے بعد موسم مزید سرد ہو گیا، آیندہ 24 گھنٹوں میں وقفے وقفے سے بارش کی پیش گوئی ہے، جھنگ شہر اور گرد و نواح میں بھی بارش کے بعد موسم مزید سرد ہو گیا ہے۔ ٹوبہ ٹیک سنگھ، جلالپور بھٹیاں، جڑانوالہ، گوجرانوالہ، کہروڑ پکا، چیچہ وطنی، فیروزوالا، پھول نگر، شیخوپورہ، فیصل آباد، کالا باغ اوکاڑہ، رینالہ خورد، شور کوٹ، گجرات، سکھیکی میں بارشیں ہوئیں جس سے موسم مزید سرد ہو گیا۔

    خیبر پختون خوا کے شہر بٹگرام کے مختلف علاقوں اور مالاکنڈ میں بھی بارش ہوئی ہے جب کہ بالائی علاقوں میں برف باری شروع ہو گئی ہے، جہاں 3 سے 4 فٹ تک برف باری ریکارڈ کی گئی، بلوچستان کے شہر ڈیرہ مراد جمالی میں بھی بارش سے سردی کی شدت میں اضافہ ہو گیا ہے۔

    شمالی بلوچستان کے بیش تر علاقوں میں بارش اور برف باری دوسرے روز بھی جاری ہے، قلعہ عبداللہ، پشین، مسلم باغ، قلعہ سیف اللہ، گلستان اور چمن میں بارش ہو رہی ہے، وادیٔ زیارت، کان مہترزئی اور توبہ اچکزئی میں درجہ حرارت منفی 7 تک گر گیا، گلستان، قلعہ عبداللہ، خانوزئی، کوژک ٹاپ پر درجہ حرارت منفی 3 ریکارڈ کیا گیا، دوسری طرف چمن میں بجلی کے طویل بریک ڈاؤن کے باعث شہریوں کو شدید مشکلات کا سامنا ہے۔

    بلتستان بھر میں ایک بار پھر برف باری شروع ہو گئی ہے، اسکردو میں آج کم سے کم درجہ حرارت منفی 13 ریکارڈ کیا گیا، بالائی علاقوں میں درجہ حرارت منفی 24 برقرار ہے، بلتستان بھر میں برف باری آیندہ 24 گھنٹے جاری رہنے کی پیش گوئی ہے، میدانی علاقوں میں 2 انچ، بالائی علاقوں میں 5 انچ برف باری ریکارڈ کی گئی ہے۔

    لاہور میں قومی شاہراہوں پر اکثر مقامات پر بارش کے باعث پھسلن پیدا ہو گئی ہے، موٹر وے پولیس کا کہنا ہے کہ قومی شاہراہ پر ٹھوکر نیازبیگ، مانگا منڈی، پتوکی، اوکاڑہ، ساہیوال، بہاولپور، احمد پورشرقیہ، موسیٰ وال، میاں چنوں، خانیوال، ملتان، بستی ملوک اور لودھراں میں بارش سے سڑکوں پر پھسلن ہے۔

  • بالائی علاقوں میں درجہ حرارت منفی 25 ریکارڈ، دریائے شیوک منجمد

    بالائی علاقوں میں درجہ حرارت منفی 25 ریکارڈ، دریائے شیوک منجمد

    اسکردو: گلگت بلتستان کے شہر اسکردو میں درجہ حرارت منفی 20، جب کہ بالائی علاقوں میں منفی 25 ریکارڈ کیا گیا ہے، جس کے باعث دریائے شیوک منجمد ہو گیا۔

    تفصیلات کے مطابق اسکردو سمیت بالائی علاقوں میں برف باری کے بعد خشک سردی نے لوگوں کی مشکلات میں اضافہ کر دیا ہے، شدید سردی کے سبب دریائے شیوک اور ندی نالے بھی جم گئے ہیں۔

    بالائی علاقوں میں پائپ لائنوں میں پانی جمنے سے مختلف مقامات پر پانی کی فراہمی معطل ہو گئی ہے، جب کہ شیلا، شغرتھنگ اور گلتری میں دواؤں اور غذائی قلت کا سامنا ہے۔ اسکردو، شغرتھنگ، گلتری اور شیلا کا زمینی رابطہ بھی بحال نہیں ہو سکا ہے۔

    کوئٹہ میں درجہ حرارت منفی 3 ڈگری سینٹی گریڈ ریکارڈ کیا گیا ہے، محکمہ موسمیات کا کہنا ہے کہ زیارت اور قلات میں درجہ حرارت منفی 5 ریکارڈ کیا گیا، 24 گھنٹے کے دوران بالائی علاقوں میں شدید سردی کا امکان ہے۔

    کراچی میں محکمہ موسمیات کے مطابق آج موسم خشک اور سرد رہے گا، موجودہ درجہ حرارت 12 ڈگری سینٹی گریڈ ہے، آج درجہ حرارت 26 ڈگری سینٹی گریڈ تک بڑھنے کا امکان ہے، جب کہ کراچی میں سردی کی لہر آیندہ چند روز تک برقرار رہے گی۔

  • ملک کے بالائی علاقوں میں برفباری

    ملک کے بالائی علاقوں میں برفباری

    اسلام آباد: محکمہ موسمیات کا کہنا ہے کہ ملک کے بالائی علاقوں میں برفباری اور مختلف شہروں میں بارش کا سلسلہ جاری ہے جس کے باعث سردی کی شدت میں اضافہ ہوگیا ہے۔

    تفصیلات کے مطابق ملک کے بالائی علاقوں میں برفباری، مالم جبہ، سوات، مانسہرہ، شانگلہ میں پہاڑوں پرسفید چادر بچھ گئی، بونیر، لکی مروت،موسیٰ خیل اور ڈیرہ اسماعیل خان سمیت خیبر پختونخوا کے مختلف اضلاع میں بارش نے جل تھل ایک کردیا۔

    محکمہ موسمیات کے مطابق بلوچستان کے جنوبی اضلاع میں اکثر مقامات پر جبکہ شمالی بلوچستان، بالائی پنجاب، گلگت بلتستان، کشمیر کے اضلاع اور اسلام آباد میں بارش کا امکان ہے۔

    محکمہ موسمیات کا کہنا ہے کہ کراچی میں نومبر کے آخری ہفتے میں سردی کی لہر میں اضافے کا امکان ہے۔

    محکمہ موسمیات کا کہنا ہے کہ گزشتہ روز ملک کے بیشتر علاقوں میں موسم ابر آلود اور سرد رہا تاہم شمالی بلوچستان، بالائی خیبرپختونخواہ، بالائی پنجاب، گلگت بلتستان، اسلام آباد اور کشمیر کے اضلاع میں چند مقامات پر گرج چمک کے ساتھ بارش ہوئی۔

    محکمہ موسمیات کے مطابق سب سے زیادہ بارش جیوانی، 15، نوکنڈی، 8، گودار، 1، پارا چنار 10، مالم جبہ 2، بالاکوٹ 2، چترال 2 ملی میٹر بارش ریکارڈ کی گئی۔

  • بارشوں سے بالائی علاقوں میں جانی و مالی نقصان، لینڈ سلائیڈنگ، شاہراہیں بند

    بارشوں سے بالائی علاقوں میں جانی و مالی نقصان، لینڈ سلائیڈنگ، شاہراہیں بند

    پشاور: حالیہ بارشوں اور برف باری سے شانگلہ، کوہستان اور سوات سمیت متعدد علاقوں میں شدید نقصانات ہوئے ہیں، کئی مقامات پر لینڈ سلائیڈنگ اور برف باری سے شاہراہیں بھی بند ہو گئی ہیں۔

    تفصیلات کے مطابق حکام نے شانگلہ اور کوہستان میں بارش کے متاثرین سے نقصانات کی تفصیل طلب کر لی ہے، عوام کو ہدایت کی گئی ہے کہ وہ جانی اور مالی نقصان سے متعلق انتظامیہ کو آگاہ کریں۔

    محکمہ ریلیف کا کہنا ہے کہ سوات اور اپر دیر میں بارشوں سے 4 گھروں کو نقصان پہنچا، ہری پور میں ایک شخص جاں بحق اور ایک زخمی ہوا، اپر دیر میں متاثرین میں ٹینٹ، کمبل اور غذائی اشیا تقسیم کردی گئیں، دیر بالا میں بارشوں سے 3 گھروں کو جزوی نقصان پہنچا۔

    یہ بھی پڑھیں:  مختلف شہروں میں بارشیں اور برفباری، معمولات زندگی معطل

    کولئی پالس کوہستان میں بارشوں سے لینڈ سلائیڈنگ ہوئی ہے جس سے متعدد مقامات پر شاہراہ بند ہو گئی ہے، تیمرگرہ کے مقام پر بھی بارش کی وجہ سے لینڈ سلائینڈگ ہوئی ہے، ادھر شدید برف باری کی وجہ سے کاغان اور بالائی علاقوں تک شاہراہ بند ہو گئی ہے۔

    ضلعی انتظامیہ نے مالاکنڈ اور ہزارہ میں بند شاہراہوں کو جلد بحال کرنے کی ہدایت جاری کر دی ہے، ہیوی مشینری کے ذریعے شاہراہوں سے ملبہ ہٹانے کا کام شروع کر دیا گیا ہے۔

  • مختلف شہروں میں بارشیں اور برفباری، معمولات زندگی معطل

    مختلف شہروں میں بارشیں اور برفباری، معمولات زندگی معطل

    اسلام آباد: ملک کے مختلف علاقوں میں بارشوں اور برفباری کا سلسلہ جاری ہے جس سے موسم مزید سرد اور معمولات زندگی معطل ہوگئے ہیں، محکمہ موسمیات کا کہنا ہے کہ کراچی میں بارش کا کوئی امکان نہیں۔

    تفصیلات کے مطابق صوبہ خیبر پختونخوا کے بالائی اور میدانی علاقوں میں بارشوں کا سلسلہ جاری ہے جس سے سردی کی شدت میں اضافہ ہوگیا۔ مردان، نوشہرہ، سوات، مالا کنڈ، لکی مروت اور ڈیر اسمعٰیل خان میں موسلا دھار بارش ہوئی۔

    مالا کنڈ میں موسلا دھار بارش سے ندی نالوں میں طغیانی آگئی جبکہ کوہاٹ اور گرد و نواح میں ہلکی بارش کا سلسلہ جاری ہے۔ مسلسل بارشوں سے معمولات زندگی سخت متاثر ہیں جبکہ بجلی کا نظام بھی معطل ہوگیا ہے۔

    دوسری جانب بٹو گاہ ٹاپ، بابوسر ٹاپ اور دیگر علاقوں میں برفباری جاری ہے، 2 فٹ سے زائد برفباری کے باعث رابطہ سڑکیں بند ہوگئیں جبکہ لوگ گھروں میں محصور ہیں۔

    پاک افغان سرحدی علاقے دیر بالا میں 30 انچ تک برف باری ہوئی، بٹگرام میں تین دن سے بارش اور برفباری جاری ہے۔

    صوبائی ڈیزاسٹر مینجمنٹ اتھارٹی (پی ڈی ایم اے) کا کہنا ہے کہ ندی اور نالوں میں پانی کی سطح 24 گھنٹے مانیٹر کی جائے۔ برفباری والے علاقوں میں ذرائع آمد و رفت کی بحالی کے لیے ہر ممکن اقدامات کرنے کی ہدایت بھی کی گئی ہے۔

    ادھر بلوچستان کے دارالحکومت کوئٹہ میں بارش کا سلسلہ ختم ہوگیا تاہم بارش کے بعد یخ بستہ ہوائیں چل پڑیں، کوئٹہ میں درجہ حرارت 4 سینٹی گریڈ تک جا پہنچا۔

    محکمہ موسمیات کا کہنا ہے کہ آئندہ 24 گھنٹے کے دوران شہر میں موسم خشک اور سرد رہے گا۔ صوبے کے شمال مشرقی کچھ اضلاع میں بارش کا امکان بھی ہے۔

    فی الوقت زیارت میں درجہ حرارت 0، قلات میں 5 اور دالبندین میں 3 ڈگری سینٹی گریڈ ریکارڈ کیا گیا۔

    صوبہ پنجاب کے شہروں راولپنڈی اور گرد و نواح میں وقفے وقفے سے بارش اور اوکاڑہ، عارف والا اور پتوکی میں بوندا باندی ہوئی جس سے موسم مزید سرد ہوگیا۔

    صوبہ سندھ کے دارالحکومت کراچی میں آج موسم جزوی طور پر ابر آلود رہے گا۔ محکمہ موسمیات کے مطابق موجودہ درجہ حرارت 18 ڈگری سینٹی گریڈ ہے اور زیادہ سے زیادہ درجہ حرارت 28 سے 29 ڈگری سینٹی گریڈ تک ہوسکتا ہے۔

    شہر میں ہوا کی رفتار 14 کلو میٹر فی گھنٹہ اور نمی کا تناسب 66 فیصد ریکارڈ کیا گیا۔ محکمہ موسمیات کا کہنا ہے کہ شہر میں بارش کا فی الحال کوئی امکان نہیں۔

  • ملک کے بیشترعلاقوں میں موسم خشک رہے گا، محکمہ موسمیات

    ملک کے بیشترعلاقوں میں موسم خشک رہے گا، محکمہ موسمیات

    کراچی: محکمہ موسمیات کا کہنا ہے کہ آئندہ 24 گھنٹوں کے دوران ملک کے بیشتر علاقوں میں موسم خشک جبکہ بعض مقامات میں ہلکی بارش اور برفباری کا امکان ہے۔

    تفصیلات کے مطابق محکمہ موسمیات کا کہنا ہے کہ آج ملک کے بیشتر علاقوں میں موسم خشک جبکہ کوئٹہ، ژوب، کوئٹہ اور چاغی میں ہلکی بارش، برفباری کا امکان ہے۔ محکمہ موسمیات کے مطابق کوئٹہ میں درجہ حرارت منفی ایک ،قلات میں منفی 2 اور زیارت میں منفی 3 ڈگری ریکارڈ کیا گیا۔

    محکمہ موسمیات کے مطابق اسلام آباد میں آج صبح مطلع صاف رہا تاہم خنکی میں اضافہ ریکارڈ کیا گیا۔ وفاقی دارالحکومت میں صبح کے وقت 12 ڈگری سینٹی گریڈ ریکارڈ کیا گیا۔

    محکمہ موسمیات کا کہنا ہے کہ کراچی میں آج موسم جزوی ابرآلود رہے گا، شہر میں کم سے کم درجہ حرارت 18 ڈگری جبکہ زیادہ سے زیادہ 31 ڈگری سینٹی گریڈ تک جانے کا امکان ہے۔

    محکمہ موسمیات کے مطابق گزشتہ روز ملک کے زیادہ تر علاقوں میں موسم خشک جبکہ شمالی علاقوں میں سرد رہا۔

    کراچی میں سردی ، محکمہ موسمیات نے خطرے کی گھنٹی بجادی

    یاد رہے کہ گزشتہ ماہ محمکہ موسمیات نے پیش گوئی کی تھی کہ کراچی میں اس سال کڑاکے کی سردی پڑے گی اورنومبر کے وسط تک موسم سرد ہونے کا امکان ہے۔

  • دیامر کے بالائی پہاڑوں پر برف باری، سردی کی شدت میں اضافہ

    دیامر کے بالائی پہاڑوں پر برف باری، سردی کی شدت میں اضافہ

    چلاس: شمالی علاقوں میں جاڑے نے رنگ جمانا شروع کر دیا، روئی جیسے برف کے گالوں نے ہر منظر حسین کر دیا، مانسہرہ نے بھی سفید برفیلی چادر اوڑھ لی۔

    تفصیلات کے مطابق گلگت بلتستان کے ضلع دیامر کے بالائی پہاڑوں پر برفباری جاری ہے جس سے سردی کی شدت میں اضافہ ہو گیا ہے، بالائی علاقوں بابو سرٹاپ، بھٹو گاہ ٹاپ، نانگا پربت اور دیامر کے سیاحتی مقام فیئری میڈو میں بھی برف باری زوروں پر ہے، جس سے بابوسر ٹاپ اور فیئری میڈو میں درجہ حرارت منفی 6 سینٹی گریڈ تک گر گیا ہے۔

    ضلع دیامر کے مضافات میں بھی برف باری کے ساتھ ساتھ بارش نے لوگوں کو گھروں میں محصور کر دیا ہے۔

    ادھر اسلام آباد میں آندھی کے بعد بارش شروع ہو گئی ہے، جس سے مارچ کے لیے سجے پنڈال میں لگے خیمے اکھڑ گئے ہیں، دھرنے کے شرکا کو شدید مشکلات کا سامنا ہے، شرکا نے رات آسمان تلے گزاری، کچھ نے میٹرو اسٹیشن میں پناہ لی۔

    واضح رہے کہ گزشتہ ماہ 19 اکتوبر سے بالائی علاقوں میں موسم سرما کی پہلی برف باری شروع ہوتے ہی دیامر کے ڈی سی نے لوگوں کو نقل مکانی کی ہدایت جاری کر دی تھی۔

    مانسہرہ میں برف باری کی وجہ سے بابو سرٹاپ ٹریفک کے لیے بند کرنا پڑ گیا تھا، نیشنل ہائی وے اتھارٹی (این ایچ اے ) نے بتایا تھا کہ بابوسر ٹاپ پر 8 انچ تک برف پڑی۔

    محمکہ موسمیات یہ پیش گوئی بھی کر چکا ہے کہ کراچی میں اس سال کڑاکے کی سردی پڑے گی اور نومبر کے وسط تک موسم سرد ہونے کا امکان ہے، شمال مغرب کی جانب ہوا کا دباؤ زیادہ ہے جو اچھی سردیوں کے لیے موزوں ہے۔

  • اسلام آباد، پنڈی، گرد و نواح میں موسلا دھار بارش، مانسرہ میں طوفان، چلاس میں برف باری

    اسلام آباد، پنڈی، گرد و نواح میں موسلا دھار بارش، مانسرہ میں طوفان، چلاس میں برف باری

    اسلام آباد: ملک کے مختلف علاقوں میں بارشوں کا سلسلہ شروع ہو گیا ہے، اسلام آباد، راولپنڈی اور گرد و نواح میں موسلا دھار بارش برسی، ادھر مانسہرہ اور گرد و نواح میں بھی تیز آندھی اور طوفان آیا۔

    تفصیلات کے مطابق ایک طرف ملک میں بجٹ کا شور برپا ہے، دوسری طرف کئی علاقوں میں موسلا دار بارشیں اور آندھیاں شروع ہو گئی ہیں۔

    ترجمان آئیسکو کا کہنا ہے کہ آئیسکو ریجن کے بیش تر علاقوں میں شدید آندھی اور طوفان آیا، ٹرپنگ فالٹ اور سیفٹی کے پیش نظر 130 سے زائد فیڈرز کو بجلی سپلائی روک دی گئی ہے۔

    پنڈوریاں، جاپان روڈ، خیابان سرسید، چکلالہ، فقیر آباد، پیر ودھائی کو بجلی متاثر ہو گئی ہے، ترجمان آئیسکو نے کہا کہ عملہ طوفان رکتے ہی بجلی بحالی کا کام شروع کر دے گا۔

    ادھر مانسہرہ اور گرد و نواح میں بھی تیز آندھی اور طوفان آیا، وادیٔ کاغان اور ناران میں ژالہ باری اور بارش ہوئی۔

    چلاس میں دیامر کے پہاڑی علاقوں میں موسلا دھار بارش شروع ہو گئی ہے،جب کہ ہلکی ہلکی برف باری بھی ہو رہی ہے، دیامر میں بارشوں کے باعث طغیانی کا خدشہ پیدا ہو گیا ہے، بجلی کا نظام معطل ہو گیا۔

    شاہراہ قراقرم اور پہاڑی علاقوں میں لینڈ سلائیڈنگ کے واقعات رو نما ہوئے، تودے گرنے کے خدشے کا بھی اظہار کیا گیا ہے، شاہراہ قراقرم مرتضیٰ آباد کے قریب لینڈ سلائیڈنگ سے جزوی بلاک ہو گئی ہے۔

    چلاس میں بٹو گاہ اور تھک پاور ہاؤسز کی بندش سے کئی گھنٹوں سے بجلی بند ہے۔