پولیس کا منشیات فروشوں کے خلاف کریک ڈاؤن جاری ہے اور لاہور میں ایک برقع پوش مرد منشیات ڈیلر کو رنگے ہاتھوں گرفتار کر لیا گیا ہے۔
ملک بھر میں منشیات کی روک تھام کے لیے اس کی خرید وفروخت کرنے والے سماج دشمن عناصر کے خلاف کریک ڈاؤن جاری ہے۔ لاہور میں پولیس نے ایک منشیات ڈیلر کو گرفتار کیا ہے جو برقعہ پہن کر منشیات سپلائی کرنے کی کوشش کر رہا تھا۔
پولیس کے مطابق ملزم عطا الرحمان بچنے کے لیے برقعہ پہن کر منشیات سپلائی کرنے جا رہا تھا جس کو پٹرولنگ کے دوران صوفیا آباد سے گرفتار کیا گیا ہے۔
پولیس نے ملزم کے قبضے سے 10 کلو منشیات برآمد کرکے اس کے خلاف مقدمہ درج کر لیا ہے جب کہ اس کے زیر استعمال کار بھی تحویل میں لے لی گئی ہے۔
ملزم عطا الرحمان نے دوران تفتیش اپنے جرم کا اعتراف کرتے ہوئے بتایا کہ وہ پشاور سے لاہور منشیات سپلائی کرنے آیا تھا۔
