سری نگر: مقبوضہ کشمیر میں بھارتی فوج نے کشمیری عوام میں آزادی کی تحریک کو نئی جلا بخشنے والے شہید برہان مظفر وانی کے ساتھی ذاکر موسیٰ کو شہید کردیا۔
کشمیر میڈیا سروس کی رپورٹ کے مطابق بھارتی فورسز نے ضلع پلواما میں شہید برہانی مظفر وانی کے ساتھی اور مجاہد رہنما ذاکر موسیٰ کو شہید کردیا، شہادت کے بعد احتجاج روکنے کے لیے وادی بھر میں کرفیو نافذ کردیا گیا۔
ضلع پلواما کے علاقے ترال میں ذاکر موسیٰ کی نماز جنازہ ادا کردی گئی جس میں سخت پابندیوں کے باوجود ہزاروں کی تعداد میں لوگوں نے شرکت کی۔
واضح رہے کہ گزشتہ روز ضلع کلگام کے علاقے گوپال پورہ میں قابض بھارتی فوج نے فائرنگ کرکے دو کشمیریوں کو شہید کردیا تھا جبکہ قابض انتظامیہ نے کلگام میں انٹرنیٹ سروس بھی معطل کردی تھی۔
مزید پڑھیں: مقبوضہ کشمیر میں بھارت کی ریاستی دہشت گردی، مزید 2 نوجوان شہید
یاد رہے کہ 19 مئی کو کشمیر میں تعینات بھارتی فوجی افسر نے انکشاف کیا تھا کہ رمضان المبارک کے آغاز کے بعد سے فورسز نے 2 ہفتوں کے دوران مختلف علاقوں میں کارروائی کرتے ہوئے 12 کشمیریوں کو ریاستی دہشت گردی کا نشانہ بنایا، ماہِ مبارک کے آغاز سے اب تک 15 کے قریب بے گناہ نوجوانوں کو شہید کیا گیا۔
بھارتی فوج نے بھی کشمیر کے جنوبی اور شمالی علاقوں میں کیے جانے والے سرچ آپریشن اور نوجوانوں کی شہادت کی تصدیق کی۔ سرکاری اعداد وشمارکے مطابق ان نوجوانوں کو10 سے 18 مئی کے دوران محاصرے اور سرچ آپریشن کے نام پر 6 نام نہاد کارروائاں کر کے شہید کیا گیا۔