اسلام آباد : وزیراعظم عمران خان نے کہا ہے کہ عام آدمی کی زندگی بہتر بنانے کیلئے اقدامات کر رہے ہیں، غریب عوام پر نئے ٹیکسوں کا کم سے کم بوجھ ہو گا،بہت جلد حالات کو بہتری کی جانب لے جائیں گے۔
ان خیالات کا اظہار انہوں نے ملکی مالیاتی معاملات پر بریفنگ اجلاس سے خطاب کرتے ہوئے کیا۔ وزیراعظم نے کہا کہ حکومت کو غریب عوام کی پریشانی کا احساس ہے۔
ہماری پوری کوشش ہے کہ مہنگائی سے غریب طبقہ متاثر نہ ہو، تاہم مشکل معاشی حالات کے باعث وقتی طور پر ملکی معیشت کو مشکلات کا سامنا ہے۔
وزیراعظم نے مزید کہا کہ مشکل فیصلے ملک و قوم کے وسیع تر مفاد میں کر رہے ہیں، غریب عوام پر نئے ٹیکسوں کا کم سے کم بوجھ ہو گا۔
اسلام آباد میں وزیراعظم کی زیرصدارت ملکی مالیاتی معاملات پر بریفنگ اجلاس میں مشیر خزانہ اور معاشی ٹیم نے آئی ایم ایف پروگرام اور ایمنسٹی اسکیم کے حوالے سے بریفنگ دی۔
معاشی ٹیم نے ارکان قومی اسمبلی کے سوالات کے جوابات بھی دئیے، ارکان نے سوال کیا کہ آئی ایم ایف پروگرام عام آدمی کی زندگی متاثر تو نہیں کرے گا؟
جس پر معاشی ٹیم نے کہا کہ انکم سپورٹ پروگرام کیلئے بجٹ100سے بڑھا کر180ارب روپے کیا جارہا ہے، گیس اور بجلی کے لئے دو سو ارب روپے کی سبسڈی دی جائے گی، جس کی وجہ سے75فیصدصارفین پر قیمتوں میں اضافے کا اثر نہیں پڑے گا۔
مزید پڑھیں: آئی ایم ایف سے معاہدہ طے، پاکستان کو 6 ارب ڈالر قرض ملے گا، مشیر خزانہ کی تصدیق
بریفنگ میں مزید بتایا گیا کہ ایمنسٹی اسکیم میں چار فیصد ٹیکس کی ادائیگی سے اثاثے ظاہر کئےجا سکیں گے، ریونیو نہ دینے والے اداروں سے سبسڈی واپس لی جائے گی۔
