کوئٹہ: کمانڈر سدرن کمانڈ لیفٹننٹ جنرل نصر خان جنجوعہ کا کہنا ہے کہ کوئٹہ میں خالد اور سمنگلی ایئر بیس پر ہونے والی دہشت گردی مہران اور کامرہ بیس طرز کی تھی جسے ناکام بنادیا گیا ہے۔
کوئٹہ میں خالد ایوی ایشن بیس پر صحافیوں سے بات چیت کرتے ہوئے انہوں نے بتایا کہ خالد ایو ی ایشن بیس اور سمنگلی ایئر بیس پر چھ چھ دہشت گرد وں نے حملہ کرنے کی کوشش کی تاہم سیکورٹی فورسز کی بروقت کارروائی سے دونوں حملے بیسز کی بیرونی دیواروں پر ہی ناکام بنادیئے،انہوں نے کہا کہ دونوں جگہوں خودکش دھماکوں اور فائرنگ کے تبادلے میں بارہ دہشت گرد ہلاک ہوئے، سیکورٹی فورسز کے اہلکاروں سمیت چودہ افراد زخمی ہوئے ہیں۔ ان کا کہنا تھا کہ وزیرستان میں جاری ضرب عضب آپریشن کا ردعمل آنا یقینی عمل ہے۔
