اسلام آباد : وزیراعظم عمران خان نے سوشل میڈیا پر وائرل ہونے والی بوڑھی خاتون کی ویڈیو کا نوٹس لے لیا اور خاتون کی فوری مدد کے احکامات جاری کردیئے اور یقین دہانی کرائی آپ کو گھر اور بنیادی سہولیات فراہم کریں گے۔
تفصیلات کے مطابق وزیراعظم عمران خان نے بے سہارا بوڑھی خاتون کی فریاد سنتے ہوئے فوری طور پر مدد دینے کے احکامات جاری کیے۔
وزیراعظم کی ہدایت پر ڈپٹی کمشنر، ایم ڈی بیت المال اور حلقے کے ایم این اے علی اعوان نے خاتون سے ملاقات کی۔
وزیر اعظم نے ویڈیو کال کے ذریعے بزرگ خاتون سے خود بات بھی کی۔ وزیراعظم نے بزرگ خاتون کو یقین دہانی کرائی کہ آپ کو کوئی تکلیف نہیں ہونے دیں گے اور آپکی ہر ضرورت پوری کی جائے گی۔
وزیراعظم کا کہنا تھا کہ سوشل میڈیا پر آپ کی ویڈیو دیکھی جس پر بہت دکھ ہوا، ہم سب آپ کے ساتھ ہیں، آپ کو گھر اور بنیادی سہولیات فراہم کریں گے۔
ویڈیو کال کے بعد بوڑھی خاتون نے وزیراعظم سے اظہار تشکر کرتے ہوئے تھینک یو میسج بھی ریکارڈ کروایا۔
بوڑھی خاتون نے ویڈیو میں وزیراعظم سے مدد نہ ملنے کا شکوہ کیا تھا۔ انہوں نے شکایت کی تھی کہ عمران خان کو ووٹ دیا، مگر وہ ہماراخیال نہیں کرتا۔ ساتھ ہی جنگل میں بھوکی پیاسی رہنے کا بھی ذکر کیا تھا۔
خاتون نے آتے جاتے راہ گیروں کو جھونپڑی دکھا کر حالات سے وزیراعظم کو آگاہ کرنے کی التجائیں کی تھیں۔
دوسری جانب نسیم بی بی نے پناہ گاہ منتقل ہونے سے انکار کر دیا ہے، بزرگ خاتون کی جانب سے مطالبہ کیا گیا ہے کہ خاوند کی قبر اسی جگہ ہے رہنے کی چھت بھی یہیں دی جائے۔
جس کے بعد وزیراعظم عمران خان نے انتظامیہ کو نسیم بی بی کی خواہش کے مطابق سہولت دینے کی ہدایت جاری کر دی ہے۔
دوسری جانب ضلعی انتظامیہ نے بوڑھی خاتون کے لواحقین کو تلاش کر لیا اور بزرگ خاتون کو ان کے حوالے کر دیا گیا ہے، حوالگی سے قبل بہتر دیکھ بھال کی تحریر ی ضمانت لی گئی، داماد کا کہنا تھاساس لا پتہ ہو گئی تھیں انہیں تلاش کر رہے تھے، د ساس گھر پررہتی ہیں لیکن مرضی سے قبرستان چلی جاتی ہیں۔
داماد نے تحریری ضمانت دی کہ ساس کی بہتر دیکھ بھال کروں گا۔
