Tag: بزنس کی خبریں

اسلام آباد: وزارتِ خزانہ کے ترجمان نے کہا ہے کہ ملک کے معاشی معاملات گھمبیر ہیں، جس کی وجہ سے مقرر کیے گئے معاشی اہداف کے حصول میں کمی بیشی ہو سکتی ہے۔

تفصیلات کے مطابق ترجمان وزارتِ خزانہ نے اپنے بیان میں کہا ہے کہ پاکستان اور آئی ایم ایف میں پہلا جائزہ کام یابی کے ساتھ مکمل ہو گیا ہے، دو طرفہ بات چیت انتہائی خوش گوار انداز میں ہوئی۔

ترجمان عمر حمید خان نے کہا کہ آئی ایم ایف نے پاکستان کے اصلاحات پورا کرنے کے عزم اور کوششوں کو سراہا، پاکستان بھی معاشی معاملات حل کرنے کے لیے پُر عزم ہے، معاشی معاملات کافی گھمبیر ہیں، اہداف کے حصول میں کمی بیشی ممکن ہے، تاہم اس سے اصلاحاتی پروگرام پر کوئی منفی اثر نہیں پڑے گا۔

وزارت خزانہ کے ترجمان نے کہا کہ آئی ایم ایف نے فنانس منسٹری، اسٹیٹ بینک اور ایف بی آر کی بھی تعریف کی ہے۔

یہ بھی پڑھیں:  آئی ایم ایف نے پاکستان میں مہنگائی کم ہونے کی نوید سنادی، جائزہ رپورٹ جاری

گزشتہ روز مشیرِ خزانہ عبد الحفیظ شیخ نے ٹویٹ کر کے کہا تھا کہ آئی ایم ایف نے پاکستانی معیشت کے درست سمت میں گام زن ہونے کا اعتراف کیا، اس کام یابی پر وزیر اعظم عمران خان اور ان کی ٹیم مبارک باد کی مستحق ہے۔

خیال رہے کہ گزشتہ روز انٹر نیشنل مانیٹرنگ فنڈ (آئی ایم ایف) کی جائزہ رپورٹ میں کہا گیا تھا کہ اسٹیٹ بینک کے زرِ مبادلہ کے ذخائر بہتر ہوئے ہیں، پاکستان کا بیرونی اور مالیاتی خسارہ بھی کم ہو رہا ہے، پاکستان میں مہنگائی شرح کم ہونے کا قوی امکان ہے۔

اسلام آباد: آل پاکستان انجمن تاجران نے وزیر اعظم عمران خان سے مطالبہ کیا ہے کہ ٹیکس ریٹرنز فارم کو اردو میں بنایا جائے تاکہ تاجروں کو پریشانی نہ ہو۔

تفصیلات کے مطابق صدر آل پاکستان انجمن تاجران اجمل بلوچ نے تاجروں کو درپیش مسائل کے پیش نظر وزیر اعظم عمران سے التجا کی ہے کہ فیڈرل بورڈ آف ریونیو کو ٹھیک کیا جائے۔

انھوں نے کہا وزیر اعظم سے التجا ہے ایف بی آر کو ٹھیک کریں، ٹیکس ریٹرنز ٹیم نے پیچیدہ فارم بنایا ہے، اسے اردو میں بنایا جائے، فکسڈ ٹیکس سے متعلق بھی تاجر پریشانی میں مبتلا ہیں۔

صدر آل پاکستان انجمن تاجران اجمل بلوچ کا کہنا تھا کہ آئی ایم ایف تاجروں سے بات کرے، آئی ایم ایف جو کہتا ہے ایف بی آر اسے مان لیتا ہے۔ انھوں نے مزید کہا کہ پورے ملک میں 29 اور 30 اکتوبر کو احتجاجاً شٹر ڈاؤن کیا جائے گا۔

یہ بھی پڑھیں:  ناراض تاجروں کا 28 اور 29 اکتوبر کو ملک بھر میں شٹر ڈاؤن کا اعلان

خیال رہے کہ وزیر اعظم عمران خان نے تاجروں کے لیے ایک اور سہولت فراہم کر دی ہے، ایف ڈبلیو او نے ایم 9 موٹر وے پر ایکسل لوڈ کی عمل داری ایک سال کے لیے مؤخر کر دی ہے، یہ فیصلہ تاجر برادری کی درخواست پر کیا گیا۔

یاد رہے کہ نیب نے تاجر برادری کے تحفظات اور جائز شکایات کے ازالے کے لیے نیب آرڈیننس کے تحت ایگزیکٹو بورڈ کے فیصلے کی روشنی میں کمیٹی قائم کر دی ہے، جو 6 ارکان پر مشتمل ہے، صدر پاکستان فیڈریشن آف چیمبر اینڈ انڈسٹری دارو اچکزئی کمیٹی میں شامل ہیں، جب کہ نائب صدر سارک چیمبر آف کامرس افتخار علی ملک بھی کمیٹی کا حصہ ہیں۔