Tag: بزنس

اسلام آباد: یونائیٹڈ بزنس گروپ کے رہنما اورایف پی سی سی آئی کے صدراتی امیدوار انجینئر دارو خان اچکزئی کا کہنا ہے کہ دستکاری کی زوال پزیر صنعت کی سرپرستی کی جائے۔

ان خیالات کا اظہار انہوں نے اپنے ایک بیان میں کیا، دارو خان اچکزئی کا کہنا تھا کہ اگر اس صنعت کی سرپرستی کی جائے تو اس شعبے سے وابستہ لاکھوں خواتین کو با عزت روزگار فراہم کیا جا سکتا ہے۔

انہوں نے کہا کہ اس شعبہ کو ترقی دینے سے دیہی عوام کا معیار زندگی بہتر ہوگا، ملک زرمبادلہ کما ئے گا اور دیہات سے شہروں کی جانب نقل مکانی میں بھی کمی آئے گی۔

دارو خان اچکزئی کا کہنا تھا کہ خواتین کے با اختیار ہونے سے معاشرے اور خاندان پر مثبت اثرات مرتب ہوتے ہیں، ایک زمانہ میں دستکاری کا شعبہ تیزی سے ترقی کر رہا تھا۔

رہنما یونائیٹڈ بزنس گروپ کا کہنا تھا کہ اب یہ شعبہ زوال کا شکار ہوچکا ہے جس کی وجوہات میں مداخل کی بڑھتی ہوئی قیمت، قرضوں کی عدم فراہمی، آڑھتیوں کی لوٹ مار اور ارباب اختیار کی حوصلہ شکنی ہے ، جس نے اسے ناقابل تلاقی نقصان پہنچایا ہے۔

انہوں نے زور دیا کہ دستکارے کے شعبے کو نقصان پہنچانے کی سب سے زیادہ ذمہ داری مڈل مین پر عائد ہوتی ہے جبکہ غریب دستکاروں کو انکے ظلم سے بچانے کیلئے کبھی سنجیدہ کوشش نہیں کی گئی ہے، اس شعبہ میں پاکستان اور چین کے اشتراک سے نہ صرف بھاری زرمبادلہ کمایا جا سکتا ہے بلکہ عالمی منڈی پر اجارہ داری بھی قائم کی جا سکتی ہے۔

کراچی: فیڈریشن آف پاکستان چیمبرز آف کامرس اینڈ انڈ سٹری(ایف پی سی سی آئی) کے نائب صدر عاطف اکرام شیخ کا کہنا ہے کہ فرسودہ نظام بدلنے کے لیے کاروباری برادری حکومت سے بھرپور تعاون کرے۔

ان خیالات کا اظہار انہوں نے ایک تقریب سے خطاب کرتے ہوئے کیا، عاطف اکرام شیخ کا کہنا تھاکہ وزیر اعظم عمران خان ملک کی معاشی حالت میں انقلاب لانے کی مخلصانہ کوششیں کر رہے ہیں، جس میں انھیں کاروباری برادری کا بھرپور تعاون حاصل ہو گا۔

انہوں نے کہا کہ ملکی معیشت کو ترقی دینے کے لیے ان کے خیالات اور عزم سے کاروباری برادری کا اعتماد بحال ہو رہا ہے۔

نائب صدر ایف پی سی سی آئی کا کہنا تھا کہ وزیر اعظم نے کاروبار کی لاگت کم کرنے، ٹیکس کے نظام کو بدلنے اور کاروبار کی راہ میں حائل رکاوٹیں جلد از جلد دور کرنے کی یقین دہانی خوش آئند ہے۔

انھوں نے کہا کہ چھوٹے کاروبار اور ایس ایم ایز کے بارے میں ان کے خیالات قابل قدر ہیں اورکاروبار کے تمام شعبوں کو بہتر ماحول فراہم کرنا ان کی ترجیحات میں شامل ہے کیونکہ جب تک کاروبار ترقی نہیں کریں گے، ملک سے غربت دور ہو ہی نہیں سکتی۔

عاطف اکرام شیخ کا مزید کہنا تھا کہ وزیر اعظم نے ملک کو خوشحال بنانے کا عزم کیا ہے، جس کے لیے بیوروکریسی کی ذہنیت تبدیل کرنا ضروری ہے، اس میں کامیابی کے بعد پاکستان کو ایک ترقی یافتہ ملک بننے سے کوئی نہیں روک سکتا۔