Tag: بشریٰ بی بی

راولپنڈی : بانی پی ٹی آئی، بشریٰ بی بی، علیمہ خان اورعلی امین گنڈاپور کے خلاف ایک اورمقدمہ درج کرلیا گیا، جس میں 200 افراد کو بھی نامزد کیا ہے۔

تفصیلات کے مطابق بانی پی ٹی آئی، بشریٰ بی بی، علیمہ خان اورعلی امین گنڈاپور کے خلاف ایک اورمقدمہ درج کرلیا گیا۔

مقدمہ تھانہ دھمیال پولیس نےدہشت گردی اوردیگردفعات کے تحت درج کیا گیا، مقدمےمیں عارف علوی، اسد قیصر، عمر ایوب،حماد اظہر سمیت 200 افراد کو بھی نامزد کیا ہے۔

ایف آئی آر مجموعی طور پر14 دفعات کےتحت درج کی گئی ہے اور متن میں لکھا گیا کہ ملزمان نے چکری روڈ پر ٹائر جلا کر سڑک بلاک کردی اور ملزمان نے اشتعال انگیز نعرے بازی کرکے خوف و ہراس پھیلایا۔

مزید پڑھیں : بانی پی ٹی آئی کی ہمشیرہ علیمہ خان پر تھانہ ٹیکسلا میں مقدمہ درج

مقدمے میں کہا گیا کہ ملزمان نے پولیس پر پتھراؤ کیا،آتشی اسلحے سے فائرنگ کی اور علیمہ خان نے بانی پی ٹی آئی کی طرف سے24 نومبر کے احتجاج کا پیغام دیا۔

متن میں کہنا تھا کہ بشریٰ بی بی کی ایما پر لوگ مشتعل ہوئےاورسڑکوں پرنکلے اور ملزمان نےدفعہ 144 کے نفاذکےباوجود امن و امان میں خلل ڈالا۔

اس سے قبل بانی پی ٹی آئی کی بہن علیمہ خان کے خلاف انسداد دہشت گردی ایکٹ کے تحت تھانہ ٹیکسلا میں مقدمہ درج کیا گیا تھا، ایف آئی آر میں سابق صدر مملکت عارف علوی، وزیر اعلیٰ خیبر پختونخوا، شہریار ریاض، حماد اظہر، اور اسد قیصر کو بھی نامزد کیا گیا ہے۔

مقدمے میں ڈکیتی، اقدام قتل اور تعزیرات پاکستان کی دیگر دفعات شامل کی گئی ہیں، ایف آئی آر کے متن میں لکھا گیا تھا کہ بانی پی ٹی آئی نے علیمہ خان کے ذریعے عوام کو 24 نومبر کے احتجاج کا پیغام دیا تھا۔

گوجرانوالہ میں بانی پی ٹی آئی کی اہلیہ بشریٰ بی بی کے خلاف تیسرامقدمہ درج کیا گیا، ایف آئی آر کا اندراج پیکا ایکٹ کے تحت کیا گیا۔

پولیس نے بتایا کہ تھانہ گگھڑ منڈی میں شہری سعید بٹ کی مدعیت میں مقدمہ درج کیا گیا، مقدمہ پیکا ایکٹ کی دفعات کے تحت درج کیا گیا، بشریٰ بی بی نے پاکستان اور سعودی عرب کی جذباتی وابستگی کو ٹھیس پہنچائی۔

بانی پی ٹی آئی کی اہلیہ کے خلاف درج کی جانے والی ایف آئی آر کے متن میں کہا گیا کہ بشریٰ بی بی نے اشتعال انگیزبیان دیکر 2 ممالک کے تعلقات پر ضرب لگائی۔

متن میں کہا گیا کہ بشری ٰبی بی کے بیان سے مذہبی منافرت کو ہوا ملی، پولیس کا کہنا ہے کہ گرفتاری کیلئے چھاپے ماررہے ہیں، جلد گرفتار کرلیا جائےگا۔

ملتان : سعودی حکومت کے حوالے سے ویڈیو بیان پر پنجاب میں بانی پی ٹی آئی کی اہلیہ بشریٰ بی بی کیخلاف ایک ساتھ تین مقدمات درج کرلئے گئے۔

تفصیلات کے مطابق بانی پی ٹی آئی کی اہلیہ بشریٰ بی بی کے ویڈیو بیان پر لیہ، گوجرانوالہ اور ملتان میں بھی مقدمات درج کرلئے گئے، جس کے بعد مقدمات کی تعداد 5 ہوگئی۔

مقدمات میں ٹیلی گراف ایکٹ اٹھارہ سو پچاسی،پیکا ایکٹ دوہزار سولہ، مسلمانوں کےجذبات مجروح کرنےکی دفعات شامل کی گئی ہیں۔

لیہ میں مقدمہ محلہ عید گاہ کےرہائشی اشفاق سہیل کی مدعیت میں درج کیا گیا جبکہ گوجرانوالہ میں تھانہ صدر اور تھانہ قطب پور ملتان میں مقدمہ درج ہوا, مقدمات بشریٰ بی بی کے سعودی حکومت کے حوالےسے بیان پر درج کئے گئے ہیں۔

ایف آئی آر کے مطابق بشریٰ بی بی نے مدینہ منورہ کانام استعمال کرکے سیاسی فائدہ لینےکی کوشش کی، افراتفری پھیلانےکیلئے ویڈیو بیان جاری کیا۔

مزید پڑھیں : ویڈیو بیان : بشریٰ بی بی کے خلاف دو مقدمات درج

بانی پی ٹی آئی کی اہلیہ نےلوگوں کو ورغلانے کیلئے سوچی سمجھی سازش کےتحت نفرت انگیز بیان دیا، سعودی عرب کے خلاف بیان دےکر عوام کے جذبات کو مجروح کیاگیا۔

ویڈیوبیان میں خارجہ پالیسی اور مفاد عامہ کےخلاف بات کی گئی، ان کا بیان پاکستان اور سعودی عرب کے باہمی مفادات کےخلاف ہے۔

گزشتہ روز پاکستان تحریک انصاف کے بانی کی اہلیہ کے ویڈیو بیان کے بعد ڈیرہ غازی خان اور راجن پور میں مقدمات درج کئے گئے تھے۔

ان کیخلاف ٹیلی گراف ایکٹ1885 کے تحت مقدمہ درج کیا گیا ہے، پولیس کا کہنا ہے کہ ملزمہ کیخلاف دفعہ126 ٹیلی گراف ایکٹ و دیگر قوانین کے تحت کارروائی کی جارہی ہے۔

مذکورہ مقدمے کے متن میں کہا گیا تھا کہ بانی پی ٹی آئی کی اہلیہ نے لوگوں کو ورغلانے کے لئے نفرت انگیز بیان دیا اور سوچی سمجھی سازش کے تحت ویڈیو بیان دیا، سعودی عرب کیخلاف بیان دے کرعوام کے جذبات سے کھیلا گیا۔

ڈیرہ غازی خان میں مذکورہ مقدمہ غلام یاسین نامی شہری کی مدعیت میں درج کیا گیا تھا جبکہ دوسرا مقدمہ راجن پور میں حاکم نامی شہری کی مدعیت میں مقدمہ درج یوا تھا۔

واضح رہے کہ بشریٰ بی بی نے گزشتہ روز اپنے ویڈیو بیان میں کہا تھا کہ بانی پی ٹی آئی جب مدینہ ننگے پاؤں گئے اور واپس آئے تو سابق آرمی چیف قمر جاوید باجوہ کو کالز آنا شروع ہوگئیں کہ یہ آپ کس شخص کو لے کر آئے ہیں، ہمیں ایسے لوگ نہیں چاہئیں۔

ان کا کہنا تھا کہ تب سے ہمارے خلاف گند ڈالنا شروع کردیا گیا اور بانی پی ٹی آئی کو یہودی ایجنٹ کہنا شروع کردیا گیا۔

اسلام آباد : پاکستان تحریک اںصاف کے سابق رہنماؤں کا کہنا ہے کہ بشریٰ بی بی کے بیان سے بانی پی ٹی آئی کوبہت نقصان پہنچے گا۔

تفصیلات کے مطابق سابق وزیر فواد چوہدری نے بانی پی ٹی آئی اہلیہ کے بیان پر ردعمل دیتے ہوئے کہا کہ سعودی عرب کے دورے میں بانی کے ساتھ تھا، ان کے سعودی عرب میں ننگے پیر چلنے کے عمل کوعقیدت سے دیکھا گیا تھا۔

فواد چوہدری کا کہنا تھا کہ سعودی عرب نے تو بانی پی ٹی آئی کابھی ہرمشکل میں ساتھ دیا، محمدبن سلمان پاکستان آئےتھےتوبانی پی ٹی آئی کواپنابھائی کہا تھا۔

انھوں نے کہا کہ بشریٰ بی بی کے بیان سے بہت نقصان ہوا ہے دیکھتے ہیں پی ٹی آئی کیا ردعمل دیتی ہے، ماضی میں چین سے متعلق بھی غلط گفتگو کی گئی تھی جس کا نقصان ہوا تھا۔

سابق وزیر کا مزید کہنا تھا کہ اہم مقام پر موجود لوگوں کو گفتگو میں احتیاط برتنی چاہیے، ریاست کے دوسری ریاست کیساتھ معاملات مختلف ہوتے ہیں ، یہ کہنا کہ سعودی عرب نے بانی پی ٹی آئی کو بھیجنے میں کردار ادا کیا غلط ہے۔

یہ پڑھیں: بشریٰ بی بی کا 24نومبر کے احتجاج سے متعلق ویڈیو پیغام جاری

فواد چوہدری نے کہا کہ اسلام آباد میں خدانخواستہ کوئی نقصان ہوگیا تو پاکستان کا نقصان ہوگا، میری نظر میں پاکستان مزید تلخیوں کا متحمل نہیں ہوسکتا، بانی پی ٹی آئی کوسہولت نہ ملی تو یہ ظاہر ہے پی ٹی آئی دھرنا تو دے گی۔

دوسری جانب سابق رہنما پی ٹی آئی عمران اسماعیل نے ردعمل دیتے ہوئے کہا کہ ہمارا سعودی عرب میں زبردست طریقے سے استقبال کیا گیا تھا، گورنرمکہ نے ہمارا پرتپاک استقبال کیا اور محبت کا اظہار کیا تھا۔

انھوں نے بتایا کہ سعودی عرب میں دورے کےدوران ناراضی کی بات نہیں کی گئی تھی، سعودی قیادت نےبانی پی ٹی آئی کیساتھ بہت محبت کا اظہار کیا تھا، بشریٰ بی بی کےبیان سےبانی پی ٹی آئی کو بہت نقصان پہنچے گا۔