لاہور : بغاوت کا قانون سپریم کورٹ لاہور رجسٹری میں چیلنج کر دیا گیا، جس میں کہا ہے کہ اس قانون کے ذریعے شہریوں کا استحصال کیا جارہا ہے۔
تفصیلات کے مطابق بغاوت کے قانون کو کالعدم قرار دلوانے کیلئے درخواست دائر کردی گئی، مقامی وکیل شاہد رانا ایڈووکیٹ نے سپریم کورٹ لاہور رجسٹری میں درخواست دائر کی۔
جس میں بغاوت کے قانون کو چیلنج کیا گیا ہے ، درخواست میں بتایا گیا کہ بغاوت کا قانون انگریز دور کی نشانی ہے جو غلاموں کےلئے استعمال کیا جاتا تھا اور اب بھی اس قانون کو سیاسی مقاصد کیلئے استعمال کیا جارہا ہے۔
درخواست گزار کا کہنا تھا کہ اس قانون کے ذریعے شہریوں کا استحصال کیا جارہا ہے، بھارتی سپریم کورٹ نے بھی بغاوت کے قانون پر عمل درآمد روکتے ہوئے اسے انگریز دور کی پیداوار قراردیا اور بغاوت کے مقدمے و ٹرائل روک دیئے ہیں۔
درخواست میں استدعا کی گئی کہ انگریز دور کے بغاوت کے قانون کو ماورائے آئین قرار دیتے ہوئے کالعدم کیا جائے۔
