Tag: بفرزون

کراچی: جرائم پیشہ عناصر کی بے حسی کی ایک ایسی واردات سامنے آئی ہے جسے دیکھ کر درد مند دل تڑپ اٹھے۔

اے آر وائی نیوز کے مطابق کراچی شہر کی ایک ایسی گلی کو آپ سی سی ٹی وی فوٹیج میں دیکھ سکتے ہیں جہاں موٹر سائیکل لفٹنگ کی واردات کے بعد ایک بزرگ شہری کو لوٹنے کی بے حسی پر مبنی واردات بھی کی گئی۔

جرائم پیشہ عناصر نے بزرگ شہری کو بھی نہ بخشا، کراچی کے علاقے بفرزون بلاک اے میں موٹر سائیکل سوار مسلح ملزمان نے ایک معمر شہری کو لوٹ لیا۔

موٹر سائیکل چوری کی واردات اتنی آسان کیوں؟ فوٹیج سامنے آ گئی

تین ملزمان نے گلی سے گزرنے والے معمر شہری کو گن پوائنٹ پر لوٹا، فوٹیج میں ایک موٹر سائیکل پر 3 ملزمان کو دیکھا جا سکتا ہے، اسلحہ تھامے ایک ملزم واردات کے دوران ہی ماسک لگانے لگا۔

دوسری طرف ٹھیک طرح چل بھی نہ پانے والے بزرگ نے مزاحمت کی کوشش کی، ملزم نے شہری کی پینٹ کی اگلی پاکٹ سے موبائل اور پیچھے سے والٹ نکالا، لٹنے کے بعد بھی بزرگ شہری دھیرے دھیرے مزاحمت کرتے رہے لیکن ایک ملزم نے ہاتھ کے اشارے سے انھیں باز رہنے کی تنبیہ کر دی۔

اس دوران گلی میں موجود کار کی دھلائی کرنے والا سارا منظر دیکھتا رہا، گزشتہ روز اسی گلی سے 2 ملزمان موٹر سائیکل بھی لے اڑے تھے۔

کراچی: شہر قائد میں موٹر سائیکل لفٹنگ کی وارداتیں کم نہ ہو سکیں، اے آر وائی نیوز کو موصول ہونے والی ایک واردات کی فوٹیج میں دیکھا جا سکتا ہے کہ موٹر سائیکل لفٹنگ کی واردات کتنی آسانی سے کی جاتی ہے۔

تفصیلات کے مطابق کراچی کے علاقے بفرزون بلاک 15 اے میں ایک ہی علاقے میں موٹر سائیکل لفٹنگ کی ہیٹرک ہو گئی ہے، گزشتہ روز ہونے والی واردات ایک ماہ کے اندر اسی علاقے میں موٹر سائیکل چوری کی تیسری واردات ہے۔

واردات کے لیے دو افراد موٹر سائیکل پر آئے، ایک نے آسانی سے کچھ ہی دیر میں موٹر سائیکل کا تالا کھولا، بائیک اسٹارٹ کی اور چلتا بنا۔

اے آر وائی نیوز کو موصول ہونے والی واردات کی سی سی ٹی وی فوٹیج میں پینٹ شرٹ پہنے ایک ملزم کو دیکھا جا سکتا ہے، ملزم اپنے ساتھی کی موٹر سائیکل سے اتر کر آیا اور پہلے گلی کا جائزہ لیا۔

اس کے بعد ملزم نے بہ آسانی موٹر سائیکل کا لاک توڑا اور پھر تاریں جوڑ دیں، جب کہ واردات کے دوران موٹر سائیکل سوار ساتھی بیک اپ پر موجود رہا۔

پریشان کن بات یہ ہے کہ ملزم نے سیکنڈوں کے اندر واردات کی اور موٹر سائیکل لے اڑا۔