Tag: بقیہ میچز

پاک بھارت جنگ بندی کے بعد پاکستان سپر لیگ 10 کے ملتوی کیے جانے والے میچز کہاں کرائے جائیں گے اس حوالے سے اہم خبر سامنے آئی ہے۔

پاکستان میں پی ایس ایل 10 اور بھارت میں آئی پی ایل جاری تھیں۔ تاہم مودی سرکار کا جنگی جنون کرکٹ کو لے ڈوبا اور دونوں لیگز کو ملتوی کر دیا گیا تھا۔ تاہم پاک بھارت جنگ بندی کے بعد اب پی ایس ایل 10 کے بقیہ میچز پاکستان میں کرانے پر غور کیا جا رہا ہے۔

اس حوالے سے ذرائع نے بتایا کہ پی ایس ایل 10 کے بقیہ میچز لاہور اور راولپنڈی میں ہی کرائے جائیں گے۔ جب کہ کا فائنل قذافی اسٹیڈیم میں کھیلا جائے گا۔

غیر ملکی کھلاڑیوں کے لیگ کے بقیہ میچز کھیلنے کے لیے نہ آنے کی صورت میں یہ میچز غیر ملکی کھلاڑیوں کے بغیر کھیلے جانے کا امکان ہے۔

ذرائع نے کہا کہ پی ایس ایل ٹیموں کا باقی 8 میچز میں مکمل انحصار ملکی کھلاڑیوں پر ہوگا۔

ذرائع نے یہ بھی بتایا کہ پی ایس ایل کے بقیہ میچز کرائے جانے کا حتمی فیصلہ آئندہ 24 گھنٹے میں متوقع ہے۔

واضح رہے کہ پاکستان سپر لیگ اختتامی مراحل میں جاری ہے۔ پی ایس ایل کے فائنل اور پلے آف مرحلے کے تین میچز سمیت مجموعی طور پر 8 میچز کھیلے جانے ہیں۔

پاک بھارت کشیدگی کے باعث دو روز قبل پی ایس ایل کے بقیہ میچز ابتدائی طور پر دبئی منتقل کر دیے گئے تھے۔ بعد ازاں اسے غیر معینہ مدت تک ملتوی کر دیا گیا تھا۔