گجرانوالہ : بلائنڈ کرکٹ ورلڈ کپ میں پاکستان نے نیپال کو باآسانی نو وکٹوں سے شکست دے دی، پاکستان ٹیم نے259 رنز کا ہدف صرف ایک وکٹ پرحاصل کرلیا، شاہینوں کا اگلا ٹاکرا بھارت کے ساتھ دبئی میں ہوگا۔
تفصیلات کے مطابق یو اے ای اور پاکستان میں مشترکہ طور پر کھیلے جانے والے پانچویں بلائنڈ کرکٹ ورلڈ کپ کے دوسرے میچ میں نیپال کو نو وکٹوں سے ہرا دیا۔
جناح اسٹیڈیم گجرانوالہ میں کھیلے جانے والے میچ میں نیپال نے پہلے بیٹنگ کرتے ہوئے مقررہ چالیس اوورز میں پانچ وکٹوں پر دو سو اٹھاون رنزبنائے، جواب میں پاکستان نے مطلوبہ ہدف ایک وکٹ کے نقصان پر باآسانی حاصل کرلیا۔
بدرمنیر نے مسلسل دوسرے میچ میں بھی سنچری بنائی جبکہ محسن خان نے پچاس رنز اسکور کئے، میچ کو دیکھنے کے لیے شہریوں کے علاوہ اسکول کے بچوں کی بڑی تعداد بھی اسٹیڈیم میں موجود تھی۔
واضح رہے کہ بلائنڈ کرکٹ ورلڈ کپ میں پاکستان نے لگاتار دو میچوں میں کامیابی سمیٹی ہے، گزشتہ روز پہلے میچ میں بنگلہ دیش کو شکست دینے کے بعد آج نیپال کو بھی ہرا دیا۔
دونوں میچوں کی خاص بات یہ ہے کہ پاکستان ٹیم نے یہ میچ بھی نو وکٹوں سے جیتا، اور کل کی طرح آج بھی بدرمنیر نے جارحانہ اننگز کھیلتے ہوئے سنچری اسکور کی اور126رنز بنائے، پاکستان ٹیم کا اگلا میچ 12جنوری کو بھارت کے ساتھ دبئی کے میدان میں ہوگا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
