Tag: بلااشتعال فائرنگ

راولپنڈی: لائن آف کنٹرول پر جنگ بندی معاہدے کی ایک بار پھر خلاف ورزی کرتے ہوئے بھارتی فوج نے بلا اشتعال فائرنگ میں ایک پاکستانی شہری کو شہید کر دیا، جب کہ خواتین سمیت 3 افراد زخمی ہو گئے۔

آئی ایس پی آر کے مطابق بھارتی فوج نے ایل او سی پر جنگ بندی معاہدے کی پھر خلاف ورزی کر دی ہے، بھارتی فوج نے خنجر اور رکھ چکری سیکٹرز میں شہری آبادی کو نشانہ بنایا۔

آئی ایس پی آر کا کہنا ہے کہ گاؤں تری بنڈ اور سماہنی میں راکٹ اور مارٹر گولے فائر کیے گئے، بھارتی فوج کی فائرنگ سے ایک شہری شہید، اور 2 خواتین سمیت 3ا فراد زخمی ہوئے۔

آئی ایس پی آر کے مطابق پاک فوج کی جانب سے بھرپور جوابی کارروائی کی گئی، فوج نے فائرنگ کرنے والی بھارتی چیک پوسٹوں کو نشانہ بنایا۔

پاک فوج ایل او سی پر عوام کا تحفظ یقینی بنائے گی، آرمی چیف

یاد رہے کہ گزشتہ روز بھی بلا اشتعال فائرنگ کرتے ہوئے بھارتی افواج نے 4 پاکستانی شہریوں کو زخمی کر دیا تھا، آزاد کشمیر، سماہنی میں ایل او سی کے باگسر سیکٹر پر شہری آبادی کو نشانہ بنایا گیا تھا، زخمیوں میں 2 خواتین بھی شامل تھیں۔

اس سے قبل بھی لائن آف کنٹرول پر بھارت کی جانب سے ایل او سی پر جندروٹ سیکٹر پر شہری آبادی کو نشانہ بنایا گیا تھا، جس کے نتیجے میں کٹھارگاؤں کی 65 سالہ خاتون زخمی ہوگئی تھیں۔

رواں ماہ کور ہیڈ کوارٹرز راولپنڈی کے دورے کے موقع پر آرمی چیف جنرل قمر جاوید باجوہ نے کہا تھا کہ بھارتی فوج ایل او سی پر شہری آبادی کو جان بوجھ کر نشانہ بنا رہی ہے، پاک فوج ایل او سی کے عوام کا تحفظ یقینی بنائے گی۔

اسلام آباد: وزیر خارجہ شاہ محمود قریشی نے ایل او سی پر بھارتی بلا اشتعال فائرنگ کی مذمت کرتے ہوئے کہا ہے کہ بھارت دنیا کی توجہ ہٹانے کے لیے لائن آف کنٹرول کی خلاف ورزیاں کر رہا ہے۔

تفصیلات کے مطابق وزیر خارجہ شاہ محمود نے بھارتی فورسز کی جانب سے ایل او سی پر ایک بار پھر بلا اشتعال فائرنگ پر رد عمل ظاہر کرتے ہوئے کہا ہے کہ بھارت متنازع شہریت کے ایکٹ پر شدید رد عمل سے توجہ ہٹانا چاہتا ہے۔ بھارت کسی بھول میں نہ رہے، پاکستانی قوم سیسہ پلائی دیوار کی طرح ہے۔

انھوں نے کہا کہ بھارتی عوام نے مودی سرکار کی انتہا پسند سوچ کو مسترد کر دیا ہے، مودی حکومت خطے میں امن کو تہہ و بالا کرنے پر تلی ہے، دنیا جنگی جنون میں مبتلا بھارت سرکار کی شر انگیزیوں کا نوٹس لے۔

تازہ ترین:  ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

دریں اثنا، وزیر خارجہ شاہ محمود نے پاک فوج کے شہید دونوں جوانوں کو خراج عقیدت پیش کرتے ہوئے کہا مسلح افواج کی جرأت اور بہادری کو ہم سلام پیش کرتے ہیں، مسلح افواج کی قربانیوں پر پوری قوم کو فخر ہے ، بھارت کسی بھول میں نہ رہے، قوم سیسہ پلائی دیوار کی طرح مسلح افواج کے شانہ بشانہ ہے۔

خیال رہے کہ بھارتی فورسز نے ایک بار ایل او سی کی خلاف ورزی کرتے ہوئے حاجی پیر سیکٹر اور دیوا سیکٹر پر بلا اشتعال فائرنگ کی، دیوا سیکٹر میں فائرنگ سے پاک فوج کے دو جوانوں نے جام شہادت نوش کیا، جب کہ حاجی پیر سیکٹر نے پاک فوج کے منھ توڑ جواب سے تین بھارتی فوجی مارے گئے اور چیک پوسٹ تباہ ہو گئی۔