Tag: بلال یاسین

لاہور: پاکستان مسلم لیگ ن کے ایم پی اے بلال یاسین پر قاتلانہ حملے کے معاملے میں دبئی اور برطانیہ سے گینگز آپریٹ کرنے والا انڈر ورلڈ مافیا کا کردار سامنے آ گیا ہے۔

تفصیلات کے مطابق رکن پنجاب اسمبلی بلال یاسین حملے کا معاملہ الجھتا جا رہا ہے، پولیس تفتیش میں اہم پیش رفت ہوئی ہے، ابتدائی تحقیقات میں انڈر ورلڈ مافیا کا کردار بھی سامنے آ گیا ہے۔

اسلحے کے امپورٹر کا انڈر ورلڈ مافیا کے ساتھ رابطے ہیں، پولیس نے اس سے متعلق ثبوت حاصل کر لیے، زیر حراست ملزمان کے بیانات میں اس سلسلے میں بڑے انکشافات ہوئے ہیں۔

پولیس حکام کا کہنا ہے کہ انڈر ورلڈ مافیا دبئی اور انگلینڈ سے مختلف گینگز کو آپریٹ کر رہا ہے، گینگ کے ارکان مختلف شوٹرز کی مدد سے لوگوں پر قاتلانہ حملے کرتے ہیں۔

بلال یاسین حملہ: پولیس کا ملزمان کے قریب پہنچنے کا دعویٰ

پولیس حکام کے مطابق انٹرنیٹ کے ذریعے گینگ کے شوٹرز کو ٹاسک دیا جاتا ہے، ایم پی اے بلال یاسین پر بھی گینگ کے شوٹرز نے حملہ کیا۔

تاہم اس کیس میں پولیس تاحال شوٹرز کو گرفتار کرنے میں ناکام رہی ہے۔

گزشتہ روز پولیس حکام نے شوٹرز کے قریب پہنچنے کا دعویٰ کیا تھا، اس سلسلے میں جیو فینسنگ کی مدد سے ڈیڑھ لاکھ موبائل نمبرز کا ڈیٹا اکٹھا کیا جا چکا ہے، اور انویسٹیگیشن پولیس نے 520 مشتبہ نمبرز شارٹ لسٹ کیے ہیں۔

یاد رہے کہ بلال یاسین پر 31 دسمبر کو قاتلانہ حملہ کیا گیا تھا، جس میں وہ شدید زخمی ہو گئے تھے، انھیں کئی گولیاں لگی تھیں، اس معاملے میں شوٹرز کو اسلحہ فراہم کرنے والے افضل پٹھان کی گرفتاری عمل میں آئی تھی، دوران تفتیش افضل کے انکشاف پر 2 اہم کرداروں ساجد گرمااور محسن کے نام سامنے آ چکے ہیں۔

لاہور: پولیس نے دعویٰ کیا ہے کہ وہ پاکستان مسلم لیگ ن کے رکن صوبائی اسمبلی بلال یاسین پر قاتلانہ حملہ کرنے والے ملزمان کے قریب پہنچ گئی ہے، اور جلد ہی پورے نیٹ ورک کو توڑ دیا جائے گا۔

تفصیلات کے مطابق ایم پی اے بلال یاسین پر قاتلانہ حملہ کیس کی تفتیش کا دائرہ کار وسیع کر دیا گیا ہے، پولیس حکام کا کہنا ہے کہ اب تک جیو فینسنگ کی مدد سے ڈیڑھ لاکھ موبائل نمبرز کا ڈیٹا اکٹھا کیا گیا ہے۔

پولیس کے مطابق انویسٹیگیشن پولیس نے 520 مشتبہ نمبرز شارٹ لسٹ کر لیے، موہنی روڈ اور گرد و نواح سے 50 سی سی ٹی وی فوٹیجز بھی حاصل کی گئی ہیں، پولیس نے کیمروں کے ڈی وی آرز فرانزک آڈٹ کے لیے بھجوا دیے۔

بلال یاسین معاملہ: سابق انکاؤنٹر اسپیشلسٹ عابد باکسر کا کیا تعلق ہے؟

پولیس حکام کا کہنا ہے کہ حملہ آوروں کا جانے اور وہاں سے فرار ہونے کا ڈیجیٹل میپ تیار کر لیا گیا ہے، اور اب تک 6 مشتبہ افراد کو حراست میں لے کر تحقیقات کی جا رہی ہیں۔

شوٹرز کو اسلحہ فراہم کرنے والے افضل پٹھان کا بیان بھی قلم بند کر لیا گیا، پولیس حکام کا کہنا ہے کہ ملزمان کے قریب ہیں اور جلد پورا نیٹ ورک بریک کر لیا جائے گا۔

لاہور: بلال یاسین پر فائرنگ کے واقعے میں پولیس تفتیش میں ایک نیا موڑ آ گیا ہے، سابق انکاؤنٹر اسپیشلسٹ عابد باکسر کا نام بھی درمیان میں آ گیا ہے۔

تفصیلات کے مطابق ن لیگی ایم پی اے بلال یاسین پر قاتلانہ حملے میں سامنے آنے والے دو ناموں میں سے ایک مرکزی ملزم ساجد گرما کی عابد باکسر کے ساتھ تصویر منظر عام پر آ گئی ہے۔

سابق پولیس انسپکٹر عابد باکسر انکاؤنٹر اسپیشلسٹ کے نام سے مشہور رہے ہیں، پولیس کا کہنا ہے کہ عابد باکسر کے ساتھ ملزم کی تصویر منظر عام پر آنے کے بعد تفتیش میں نیا موڑ آ گیا ہے۔

پولیس کی جانب سے عابد باکسر سے بھی پوچھ گچھ کرنے کا فیصلہ کیا گیا ہے۔

پولیس حکام نے انکشاف کیا ہے کہ ساجد گرما ڈیوٹی فری شاپ میں غیر ملکی کرنسی ایکسچینج کرنے کا کام کرتا ہے، اور اس کے بلال یاسین کے ساتھ دوستانہ تعلقات تھے۔

بلال یاسین پر قاتلانہ حملہ، شوٹر کو اسلحہ فراہم کرنے والا مرکزی ملزم ٖگرفتار

واضح رہے کہ سی آئی اے پولیس نے بلال یاسین پر قاتلانہ حملے میں شوٹر کو اسلحہ فراہم کرنے والے مرکزی ملزم افضل کو آج گرفتار کیا تھا، دوران تفتیش افضل کے انکشاف پر 2 اہم کرداروں ساجد گرمااور محسن کے نام سامنے آئے تھے، افضل نے تحقیقات میں بتایا کہ شوٹرز کو وہ نہیں جانتا، تاہم اسلحہ ساجد گرما کے کہنے پر دیا تھا۔

پولیس کا کہنا ہے کہ تحقیقات میں سامنے آنے والا محسن جرائم پیشہ سرگرمیوں میں ملوث ہے، جب کہ ساجد گرما کو تفتیش کے لیے فون کیا گیا تو وہ فرار ہو گیا، اس سلسلے میں پولیس نے ملزمان کی گرفتاری کے لیے ٹیمیں تشکیل دے دی ہیں۔

لاہور: ایم پی اے بلال یاسین پر قاتلانہ حملے کے سلسلے میں لاہور کے ٹاپ شوٹرز کی گرفتاریوں کے لیے چھاپے شروع ہو گئے ہیں۔

تفصیلات کے مطابق مسلم لیگ ن کے ایم پی اے بلال یاسین پر فائرنگ کے معاملے میں پولیس کی تفتیشی ٹیموں نے سر جوڑ لیے ہیں، پولیس ذرائع کا کہنا ہے کہ یہ حملہ کس نے اور کیوں کروایا، تفتیشی ٹیمیں تاحال اس کا سراغ نہیں لگا سکی ہیں۔

ذرائع کے مطابق تفتیش میں انکشاف ہوا ہے کہ حملہ آور اجرتی قاتل تھے، تاہم حملہ آوروں کو کس نے اور کیوں ہائر کیا، ابھی اس سلسلے میں پولیس کی تفتیش جاری ہے۔

حملہ آوروں کی گرفتاری کے لیے پولیس نے شہر بھر میں مخبروں کا جال بھی بچھا دیا ہے، تفتیشی ٹیموں نے لاہور کے ٹاپ شوٹرز کی فہرستیں بھی مرتب کر لیں، ذرائع کا کہنا ہے کہ لاہور کے ٹاپ شوٹرز کی گرفتاریوں کے لیے چھاپے جاری ہیں۔

بلال یاسین پر قاتلانہ حملہ، حملہ آوروں کی شناخت ہوگئی

علاقے کی تلاشی کے دوران پولیس کو ایک مشکوک پستول مل گیا ہے، یہ پستول علاقے کے ایک رہائشی کو ملا تھا جو اس نے پولیس کے حوالے کیا، پولیس حکام کا کہنا ہے کہ پستول واقعے میں استعمال ہوا یا نہیں فرانزک سے پتا چلے گا، اس لیے پستول کو پنجاب فرانزک لیبارٹری بھجوا دیا گیا ہے، رپورٹ میں تعین ہو گا کہ پستول حملے میں استعمال ہوا یا نہیں۔

یاد رہے کہ گزشتہ روز شام کو بلال یاسین پر بلال گنج کے علاقے میں نقاب پوش افراد نے فائرنگ ‏کی تھی، ایک گولی ان کے پیٹ اور دوسری پاؤں پر لگی تھی، پیٹ کی گولی آج صبح آپریشن کے ذریعے نکال لی گئی۔

سیف سٹی ڈپارٹمنٹ کا کہنا تھا کہ کیمروں کی مدد سے 2 موٹر سائیکل سوار حملہ آوروں کی شناخت کی گئی ہے، بلال یاسین نے شبہ ظاہر کیا کہ ایک حملہ آور نے ڈولفن پولیس جیسی وردی پہن رکھی تھی۔

پولیس نے ایم پی اے بلال یاسین پر حملے کا مقدمہ آج تھانہ داتا دربار میں درج کر لیا ہے۔