لاہور : مسلم لیگ ن کے رہنما بلال یاسین پر قاتلانہ حملے میں شوٹر کو اسلحہ فراہم کرنے والے مرکزی ملزم اٖفضل کو گرفتار کرلیا، افضل نے تحقیقات میں بتایاکہ شوٹرزکو نہیں جانتا۔
تفصیلات کے مطابق مسلم لیگ ن کے رہنما بلال یاسین پر قاتلانہ حملے کی تحقیقات جاری ہے ، لاہور سی آئی اے پولیس نے کارروائی کرتے ہوئے شوٹر کو اسلحہ فراہم کرنے والے مرکزی ملزم اٖفضل کو گرفتار کرلیا۔
دوران تفتیش افضل کے انکشاف پر دو اہم کردار ساجدگرمااورمحسن سامنے آئے ہیں ، افضل نے تحقیقات میں بتایاکہ شوٹرزکو نہیں جانتا، اسلحہ ساجد کے کہنے پر دیا۔
پولیس کا کہنا ہے کہ تحقیقات میں سامنے آنے والا محسن جرائم پیشہ سرگرمیوں میں ملوث ہے جب ساجد گرما کو تفتیش کے لیے فون کیا تو فرار ہوگیا، اس سلسلے میں پولیس نے ملزمان کی گرفتاری کے لیے ٹیمیں تشکیل دے دی ہے۔
اس سے قبل پولیس کا کہنا تھا کہ بلال یاسین پر حملے میں ملوث دو اہم کرداروں کی شناخت کی گئی تھی ، دونوں ملزمان نے شوٹرز کو فائرنگ کے لیے بھیجا تھا، گرفتاری کے بعد واقعے کے محرکات کا علم ہوگا۔
دوسری جانب کیمروں کی مدد سے فائرنگ کرنے والے ملزمان کی تصویر پولیس کی جانب سے جاری کی جاچکی ہے اور شوٹرز کی گرفتاری کے لیے کوششیں جاری ہیں۔
ایک حملہ آور نے سبز اور ایک نے سیاہ جیکٹ پہن رکھی تھی جبکہ حملہ آوروں نے منہ پر رومال لپیٹ رکھے تھے اور کچھ دور جاکر حملہ آوروں نے چہروں سے رومال ہٹائے۔
