اسلام آباد: قومی اسمبلی میں خطاب کرتے ہوئے پاکستان پیپلز پارٹی کے چیئرمین بلاول بھٹو زرداری نے بھارتی وزیر اعظم کو نریندر مودی کو خطے میں نیتن یاہو کی سستی کاپی قرار دیا۔
تفصیلات کے مطابق قومی اسمبلی میں تقریر کرتے ہوئے سابق وزیر خارجہ بلاول نے کہا ’’ہمارے خطے میں بھی نیتن یاہو کی ایک سستی کاپی ہے، فخر ہے ہم نے نیتن یاہو کی سستی کاپی کو جنگ، سفارت کاری اور بیانیہ کی سطح پر ہرا دیا۔‘‘
ایک اور جنگ لڑنی پڑے گی!
انھوں نے کہا ’’ہم جہاں جہاں گئے پاکستان کا مؤقف پیش کیا، جہاں جہاں ہم گئے پیچھے پیچھے سستی کاپی کے نمائندے بھی پہنچے، جب تک خطے میں مستقل امن نہیں ہوگا یہ پاکستان اور بھارتی عوام کے مفاد میں نہیں۔‘‘
بلاول بھٹو نے کہا اقوام متحدہ میں بھی پاکستان جیت چکا ہے، ہم واشنگٹن پہنچے وہاں اسرائیل کے بعد بھارت کی لابی ہے، ان لابیز نے پوری کوشش کی کہ پاکستان کے بیانیے کو نقصان پہنچائیں، لیکن وہاں بھی بھارت ہارا، امریکی افواج کے رہنما نے کانگریس کمیٹی سے خطاب میں بھارتی بیانیے کو مسترد کیا۔
پی پی چیئرمین بلاول بھٹو نے کہا بھارت نے پانی روکنے کی دھمکی دی، خدانخواستہ اس نے پانی روکا تو ہمیں ایک اور جنگ لڑنا پڑے گی، بھارت ہمارے دریاؤں پر ڈیم بنانے کی کوشش کرتا ہے تو جنگ لڑنا پڑے گی، نیشنل سیکیورٹی کمیٹی نے پہلے ہی کہہ دیا ہے کہ اگر ایسا ہوا تو جنگ ہوگی، اگر یہ جنگ ہوئی تو اس میں بھی بھارت کو شکست دیں گے، اورتمام دریاؤں سے پاکستان کے عوام کو پانی دلائیں گے۔
بجٹ کو سپورٹ کا اعلان
انھوں نے کہا حکومتی پالیسیوں سے ملکی معیشت میں بہتری آئی ہے، مہنگائی کی شرح میں نمایاں بہتری آئی، بجٹ صرف اعداد و شمار کا نام نہیں ہے، پیپلز پارٹی وفاقی بجٹ کو سپورٹ کرے گی۔
بلاول نے کہا پاکستان نے دفاع کے ساتھ تخفیف غربت کے لیے بھی بجٹ بڑھایا، پاکستان نے جنگ کی تیاری کرنی ہے اس لیے دفاعی بجٹ میں اضافہ ہوا، دوسری طرف بینظیر انکم سپورٹ پروگرام میں بھی 20 فی صد اضافہ ہوا، ہم دفاعی بجٹ میں اضافہ تو کر رہے ہیں غریبوں کو بھی یاد رکھا ہے۔
بانی پی ٹی آئی پر تنقید
انھوں نے بانی پی ٹی آئی پر تنقید کرتے ہوئے کہا ’’جب کشمیر پر حملہ ہوا تو اُس وقت کے وزیر اعظم نے کہا میں کیا کروں، آپ کیا چاہتے ہیں بھارت پر حملہ کر دوں، اس بار جب کشمیر پر حملہ ہوا تو ہم نے بھارت کو منہ توڑ جواب دیا، بھارت مقبوضہ کشمیر کو اندرونی معاملہ کہہ رہا تھا آج عالمی معاملہ بن گیا ہے، اب بھارت نہیں کہہ رہا کہ کشمیر ہمارا اندرونی مسئلہ ہے۔‘‘
فلور پر موجود پی ٹی آئی رہنماؤں پر تنقید کرتے ہوئے بلاول بھٹو نے کہا ’’تنقید کرنا اپوزیشن کا حق ہے آپ کر سکتے ہیں، لیکن ہر چیز پر اپوزیشن کا ایک ہی مطالبہ ہوتا ہے قیدی کو رہا کرو، ہم کہتے ہیں دہشت گردوں کا مقابلہ کرنا ہے یہ کہتے ہیں قیدی کو رہا کرو، ہم کہتے ہیں بھارت کے ساتھ جنگ کا ماحول ہے یہ کہتے ہیں قیدی کو رہا کرو، آپ اور آپ کے ووٹرز کا یہ مطالبہ ہوگا لیکن باقیوں کا نہیں، باقیوں کا مطالبہ ہے کہ قیدی جہاں ہے وہیں رکھیں۔‘‘
ایران پر امریکی حملے کی مذمت
انھوں نے کہا ہم ایران پر حملے کی مذمت کرتے ہیں، ایرانی جوہری تنصیبات پر حملہ عالمی قوانین کی خلاف ورزی ہے، جوہری تنصیبات پر بغیر کسی ثبوت مہنگا ترین حملہ کیا گیا اور ایرانی عوام کی زندگی کو داؤ پر لگایا گیا، اس سے خطے کی مشکلات بڑھی ہیں، اسرائیل امریکا کو جنگ میں دھکیل رہا ہے، امریکی عوام بھی اس چیز کے حامی نہیں۔ اس سے پہلے اسرائیل نے بھی جھوٹ کی بنیاد پر ایران پر حملہ کیا تھا، ایران کی خودمختاری کو کسی صورت چیلنج نہیں کرنا چاہیے۔
