Tag: بلاول بھٹو

کراچی: چیئرمین پیپلزپارٹی بلاول بھٹو زرداری نے دہشت گردوں کے حملے کو ناکام بنانے پر سندھ پولیس کو شاباش دی۔

تفصیلات کے مطابق پیپلزپارٹی کے سربراہ بلاول بھٹو زرداری نے سندھ کے آئی جی سندھ پولیس مشتاق مہر کو فون کیا۔آئی جی سندھ نے پاکستان اسٹاک ایکس چینج پر حملے کےحوالے سے بلاول بھٹو کو بریفنگ دی۔

چیئرمین پیپلزپارٹی نے دہشت گردوں کے حملے کو ناکام بنانے پرسندھ پولیس کو شاباش دیتے ہوئے کہا کہ سندھ پولیس آج اپنی بہترین پیشہ وارانہ مہارت کی وجہ سے کامیاب ہوئی۔

بلاول بھٹو نے کہا کہ شہید اہلکاروں نے قوم کے خاطر جانیں قربان کیں، شہید جوانوں کے اہل خانہ کی ہر ممکن سپورٹ کی جائے۔

پاکستان اسٹاک ایکسچینج پر دہشت گردوں کا حملہ ناکام ، چاروں حملہ آور ہلاک

واضح رہے کہ ملک دشمن عناصر کی امن خراب کرنے کی کوشش ناکام بنا دی گئی، پاکستان اسٹاک ایکسچینج پر دستی بم حملے اور فائرنگ سے سب انسپکٹر سمیت 7 افراد شہید ہو گئے جبکہ 4 دہشت گرد مارے گئے۔

پولیس کا کہنا تھا کہ دہشت گردوں کے قبضے سے جدید ہتھیار، دستی بم اور دھماکا خیز مواد برآمد ہوا جبکہ سیکیورٹی فورسز نے اسٹاک ایکسچینج کے باہر موجود مشتبہ کار کا بھی معائنہ کیا۔

کراچی: چیئرمین پیپلزپارٹی بلاول بھٹو زرداری نے سردار اختر مینگل کو ٹیلی فون کر کے این ایف سی ایوارڈ سمیت دیگر امور پر بات چیت کی۔

تفصیلات کے مطابق بلاول بھٹو زرداری اور بلوچستان نیشنل پارٹی کے سربراہ سردار اختر مینگل کے درمیان ٹیلی فونک رابطہ ہوا، دونوں رہنماؤں نے بجٹ امور پر مشترکہ حکمت عملی پر اتفاق کیا۔

بلاول بھٹو اور سردار اختر مینگل کے درمیان 18ویں آئینی ترمیم اور این ایف سی ایوارڈ سے متعلق حکومتی اقدامات پر بھی گفتگو ہوئی۔دونوں رہنماؤں نے اگلے ہفتے اے پی سی کے حوالے سے بھی مشاورت کی۔

چیئرمین پیپلزپارٹی بلاول بھٹو زرداری اور بلوچستان نیشنل پارٹی کے سربراہ سردار اختر مینگل نےملک میں کرونا وائرس کے پھیلاؤ پر شدید تشویش کا اظہار کیا۔

واضح رہے کہ سربراہ بی این پی سردار اختر مینگل نے چند روز قبل پاکستان تحریک انصاف کی حکومت سے اتحاد ختم کرنے کا اعلان کیا تھا۔

سردار اختر مینگل کی جانب سے اتحاد ختم کرنے کے اعلان کے بعد حکومت کی جانب سے انہیں منانے کی بھی کوشش کی جا رہی ہے تاہم حکومت اب تک اس میں کامیاب نہیں ہوسکی ہے۔

کراچی: چیئرمین پیپلزپارٹی بلاول بھٹو کا کہنا ہے کہ سندھ میں ایک روپے کی کرپشن بھی برداشت نہیں، جو بھی کرپشن کرے اس کے خلاف سخت کارروائی کی جائے۔

اے آر وائی نیوز کی رپورٹ کے مطابق چیئرمین پیپلزپارٹی بلاول بھٹو سے جام اکرام اللہ دھاریجو، سردار محمد بخش مہر نے ملاقات کی جس میں گھوٹکی کے سیاسی امور سے متعلق گفتگو کی گئی، رہنماؤں نے بلاول بھٹو کو اینٹی کرپشن، محکمہ صنعت سے متعلق بریفنگ دی۔

بلاول بھٹو نے کہا کہ کرپٹ شخص کتنا ہی بااثر کیوں نہ ہو اس کے خلاف گھیرا تنگ کریں، سندھ میں کرپشن کرنے والوں کی کوئی جگہ نہیں ہے، کرپٹ افراد کو کیفر کردار تک پہنچایا جائے۔

انہوں نے کہا کہ کرپٹ افراد کو ان کے انجام تک پہنچا کر عبرت کی مثال بنایا جائے، ایسی مثال بنایا جائے کہ کوئی کرپشن کا سوچ بھی نہ سکے۔

بلاول بھٹو نے پارٹی رہنماؤں کو ہدایت کی کہ صنعت کاروں سے ملاقات کریں اور ان کے مسائل کو حل کریں، ان کا کہنا تھا کہ سندھ بھر کے صنعتی زونز کے انفرا اسٹرکچر کو مزید بہتر بنایا جائے۔

واضح رہے کہ گزشتہ روز بلاول بھٹو نے قومی اسمبلی میں اظہار خیال کرتے ہوئے کہا تھا کہ وفاقی حکومت نے جو بجٹ پیش کیا ہے وہ کسان اور مزدور دوست نہیں ہے، حکومت کا بجٹ کرونا سے نمٹنے کا بجٹ ہے اور نہ ہی کسی چیلنج سے نمٹنے کے لیے ہے۔

ان کا کہنا تھا کہ ہم نے کبھی نہیں کہا کہ پاکستان کو ہمیشہ کے لیے لاک ڈاؤن کردیں، ہم نے یہی کہا تھا کہ عالمی ادارہ صحت کی ہدایات پر عمل کریں۔

اسلام آباد: چیئرمین پیپلزپارٹی بلاول بھٹو زرداری کا کہنا ہے کہ ہر پاکستانی کی صحت اور معاشی صورتحال خطرے میں ہے، آج کے جیسے حالات کا صدی میں ایک بار سامنا کرنا پڑتا ہے۔

تفصیلات کے مطابق چیئرمین پیپلزپارٹی بلاول بھٹو زرداری نے قومی اسمبلی میں اظہار خیال کرتے ہوئے کہا کہ وفاقی حکومت نے جو بجٹ پیش کیا ہے وہ کسان اور مزدور دوست نہیں ہے، حکومت کا بجٹ کرونا سے نمٹنے کا بجٹ ہے اور نہ ہی کسی چیلنج سے نمٹنے کے لیے ہے۔

بلاول بھٹو نے سوال کیا کہ کس نے کہا تھا کرونا وائرس زکام ہے، کون لاک ڈاؤن کے خلاف تھا اور وہ آج بھی ہے، کس نے کہا تھا کرونا وائرس پاکستان میں وبائی نہیں ہے؟ اپنی مجرمانہ غفلت کا ملبہ آپ پاکستان کے عوام پر کس طرح ڈال سکتے ہیں؟

چیئرمین پیپلزپارٹی نے کہا کہ طبی عملے کے 40 ارکان کرونا سے جاں بحق ہوچکے ہیں، جب ہمیں پتا تھا ملک میں زیادہ کیسز اور اموات ہونگی توکیا تیاری تھی؟ بجٹ میں کیا ڈاکٹرز اور طبی عملے کو کوئی رسک الاؤنس دیا ہے؟ بجٹ ایسا ہے جیسے کرونا ماضی میں ہے۔

انہوں نے کہا کہ ہر 15 منٹ بعد ایک پاکستانی کی کرونا سے موت ہورہی ہے، کیا حکومت نے بجٹ میں کرونا سے نمٹنے کے لیے کوئی پیسہ رکھا؟ کرونا کا پھیلاؤ حکومت کی ناکامی اور نااہلی ہے۔

بلاول بھٹو نے کہا کہ ہم نے کبھی نہیں کہا کہ پاکستان کو ہمیشہ کے لیے لاک ڈاؤن کردیں، ہم نے یہی کہا تھا کہ عالمی ادارہ صحت کی ہدایات پر عمل کریں۔

چیئرمین پیپلزپارٹی نے کہا کہ گزشتہ سال آصف زرداری نے ٹڈی دل کا مسئلہ اٹھایا تھا، کیا حکومت چاہتی ہے پاکستان میں ساری فصلیں تباہ ہوجائیں تب یہ ایکشن لیں گے، حکومت کیا کھانے کی اشیا ختم ہوجائیں گی تب ایکشن لے گی۔