Tag: بلاول بھٹو

اسلام آباد: وزیر انسانی حقوق شیریں مزاری کا کہنا ہے کہ وہ پی پی چیئرمین بلاول بھٹو کے بیان پر حیران ہیں جن میں انھوں نے بھارتی مؤقف کو دہرایا۔

تفصیلات کے مطابق شیرین مزاری نے بلاول بھٹو کی اسلام آباد میں تقریر پر تنقید کرتے ہوئے کہا ہے کہ پیپلز پارٹی نے کیوں نیشنل ایکشن پلان پر عمل نہیں کیا، بلاول بھٹو نے بھارتی مؤقف بیان کر دیا ہے۔

وفاقی وزیر کا اے آر وائی نیوز کے پروگرام پاور پلےمیں کہنا تھا کہ بلاول بھٹو عدالتوں میں پیشیوں پر غصے میں ہیں، وہ سمجھتے تھے کہ جعلی اکاؤنٹس غلط ہیں تو کیوں پیچھے نہیں ہٹے، جعلی اکاؤنٹس کا پیسا کیوں استعمال کرتے رہے انھوں نے کمپنی کے دستاویز پر دستخط کیے۔

شیریں مزاری نے کہا کہ پی ٹی آئی حکومت نیشنل ایکشن پلان کے تحت جتنا ایکشن لے رہی ہے ماضی میں نہیں لیا گیا۔

پی ٹی آئی رہنما کا کہنا تھا کہ ماضی میں معاشی حالات تباہ کیے گئے اور ملک کو قرضوں کے دل دل میں پھنسایا گیا، احتساب ہم نہیں کر رہے، یہ مقدمات بہت پہلے سے چلتے آ رہے ہیں، پی ٹی آئی حکومت نے ن لیگ اور پی پی کے خلاف مقدمات نہیں بنائے۔

یہ بھی پڑھیں:  کیا حکومت نے کالعدم تنظیموں سے منسلک وفاقی وزرا کو ہٹا دیا؟ نہیں: بلاول بھٹو

شیریں مزاری نے بھارت کے حوالے سے کہا کہ بھارت میں سکھوں اور مسلمانوں پر مظالم ہو رہے ہیں، پلوامہ کا بہانہ بنا کر بھارت میں طالب علموں پر تشدد کیا جا رہا ہے، بھارتی عدالتوں نے مجرموں کو کھلی چھٹی دے رکھی ہے

انھوں نے کہا کہ گجرات میں مسلمانوں کے قتل عام کرنے والوں کو رہا کیا گیا، اعتراف کے باجود بابو بجرانی نامی بڑا ملزم ضمانت پر باہر ہے، مقبوضہ کشمیر مظالم پر بھارت کے خلاف یوگوسلاویا طرز کے ٹریبونل بنوائے جا سکتے ہیں۔

اسلام آباد: وفاقی وزیر مواصلات مراد سعید نے چیئرمین پیپلزپارٹی بلاول بھٹو پر تنقید کرتے ہوئے کہا ہے کہ اپنے ملک کا چور ہوں تو کیا، دشمن کا تو ہیرو ہوں ناں۔

تفصیلات کے مطابق گزشتہ روز بلاول بھٹو نے بھارتی ایئر اسٹرائیک اور کالعدم تنظیموں کے خلاف کارروائی نہ کرنے کا بیان دیا تھا جس کے جواب میں ٹویٹر پر مراد سعید نے بلاول بھٹو پر تنقید کرتے ہوئے کہا ہے کہ والد صاحب کی کرپشن بچانے کے لیے ملک کی عزت داؤ پر لگا سکتا ہوں۔

مراد سعید نے مزید لکھا کہ ایک پرچی کو بنیاد بنا کر پارٹی چیئرمین بن سکتا ہوں، سیاسی مفاد کے لیے نام بدل سکتا ہوں، ایک سال کی عمر میں کمپنی کا ڈائریکٹر لگ سکتا ہوں۔

ایک پرچی کو بنیاد بنا کے پارٹی چئیرمین بن سکتا ہوں، سیاسی مفاد کیلئے نام بدل سکتا ہوں،ایک سال کی عمر میں کمپنی کا ڈائریکٹر لگ سکتا ہوں، مگر احتساب کی بات مت کرنا، والد صاحب کی کرپشن بچانے کیلئے ملک کی عزت داؤ پہ لگا سکتا ہوں۔ اپنے ملک میں چور ہوں تو کیا،دشمن کا تو آج ہیرو ہوں ناں pic.twitter.com/vaFU6aICIa

— Murad Saeed (@MuradSaeedPTI) March 21, 2019

واضح رہے کہ گزشتہ روز بلاول بھٹو نے حکومت پر تنقید کرتے ہوئے ملک مخالف بیان دیا تھا جس پر بھارتی میڈیا نے واویلا مچایا اور بلاول بھٹو کے بیان کو بنیاد بنا کر پاکستان پر تنقید کی۔

دوسری جانب اے آر وائی نیوز سے خصوصی گفتگو کرتے ہوئے کرنل (ر) امجد شعیب نے بلاول بھٹو کے بیان پر ان کے خلاف کارروائی کا مطالبہ کیا تھا۔

مزید پڑھیں: بلاول والد کی کرپشن یا اپنے سیاسی مستقبل میں سے ایک کا انتخاب کریں، مراد سعید

یاد رہے کہ گزشتہ روز وفاقی وزیر نے کہا تھا کہ بلاول بھٹو والد آصف زرداری کی کرپشن یا اپنے سیاسی مستقبل میں سے ایک کا انتخاب کریں، انہوں نے بھی آج وہی کیا جو نواز شریف کیا کرتے تھے۔

ان کا مزید کہنا تھا کہ بلاول زرداری کو اپنی چوری بچانے کیلئے سیاست کے استعمال کا مشورہ جس نے بھی دیا وہ ان کا خیرخواہ نہیں ہے، بلاول سمجھ لیں کہ سیاست کی آڑ میں سنگین جرائم کے تحفظ کا نسخہ اب کارگر نہیں رہا۔

اسلام آباد: وفاقی وزیر اطلاعات نے پیپلزپارٹی کے کارکنان کی رہائی کا اعلان کرتے ہوئے کہا ہے کہ پولیس پر حملہ میں ملوث افراد کے علاوہ دیگر کو فوری رہا کردیا جائے۔

سماجی رابطے کی ویب سائٹ پر اپنے ٹویٹ کے ذریعے انہوں نے آگاہ کیا کہ وزارتِ داخلہ کو نیب دفتر کے باہر سے گرفتار ہونے والے پیپلزپارٹی کے کارکنان کو رہا کرنے کی ہدایت جاری کردی۔

فواد چوہدری کا کہنا تھا کہ پولیس پر حملہ کرنے والوں کے علاوہ دیگر کو رہا کرنے کی ہدایت دی گئی ہے، پیپلزپارٹی کے رہنما تفتیش سے بچنے کے لیے ایسے اقدامات کررہے ہیں جس کی جتنی مذمت کی جائے وہ کم ہے۔

مزید پڑھیں: بلاول کی نواز شریف سےملاقات کے حقیقی رنگ سامنے آگئے ، مراد سعید

خیال رہے جعلی اکاؤنٹس کیس کی تفتیش میں سابق صدرآصف زرداری اور پیپلزپارٹی کےچیئرمین بلاول بھٹو زرداری کو نیب راولپنڈی نے طلب کیا تھا، رہنماؤں کی پیشی کے موقع پر  پی پی کے کارکنان کی ہنگامہ آرائی اورکارکنان کے پتھراو سے پانچ اہلکار زخمی ہوگئے تھے۔پولیس نے ہنگامہ آرائی کرنے والے کارکنان کو گرفتار کر کے تھانے منتقل کیا تھا۔

وزات داخلہ کو ہدائیت دی گئ ہے کہ ماسوائے ان عناصر کے جنہوں نے پولیس کے جوانوں پر جتھوں میں حملہ کیا تمام دیگر گرفتار شدگان کو رہا کر دیا جائے، تفتیش سے بچنے کیلئے ایسے اقدامات کی جتنی مذمت کی جائے کم ہے

— Ch Fawad Hussain (@fawadchaudhry) March 20, 2019

پی پی کے کارکنان کی ہنگامہ آرائی پر فواد چوہدری نے بیان جاری کیا تھا کہ اگر کسی نے حد عبور کرنے کی کوشش کی تو ریاست اپنی ذمہ داری پوری کرے گی۔

یہ بھی پڑھیں: کارکنوں کو رہا نہ کیا گیا تو پیپلز پارٹی انتہائی قدم اٹھائے گی: بلاول

دوسری جانب پیپلزپارٹی کے چیئرمین نے کارکنان کو رہا نہ کرنے پر انتہائی قدم اٹھانے کا عندیہ دیا تھا۔ بلاول بھٹو زرداری نے پیشی کے بعد میڈیا سے گفتگو کرتے ہوئے نیب پر تنقید کی اور کہا تھا کہ ہم نے اپنے دورِ حکومت میں احتساب قانون میں تبدیلی نہیں کی جو ہماری بہت بڑی غلطی ہے۔