اسلام آباد: وزیر اعظم نے لاپتا صحافی اور بلاگر مدثر نارو کے اہل خانہ کو مدثر کی بازیابی کی یقین دہانی کرا دی۔
تفصیلات کے مطابق آج وزیر اعظم عمران خان نے گم شدہ صحافی و بلاگر مدثر نارو کے والدین اور ان کے بیٹے سے وزیر اعظم ہاؤس میں ملاقات کی۔
وزارت داخلہ کے اہل کار بھی مدثر نارو کی فیملی کے ہمراہ وزیر اعظم ہاؤس پہنچے تھے، اسلام آباد ہائی کورٹ نے وزیر اعظم کو مدثر نارو کے اہل خانہ سے ملنے کی ہدایت کی تھی۔
ملاقات میں وزیر اعظم عمران خان نے مدثر نارو کے والدین کو بازیابی کے لیے ہر ممکن اقدامات کی یقین دہانی کرائی، اور کہا کہ ہم نے جبری گمشدگیوں کی روک تھام کے لیے باقاعدہ قانون سازی کی ہے۔
اس ملاقات میں وزیر انسانی حقوق شیریں مزاری بھی موجود تھیں، انھوں نے بتایا کہ وزیر اعظم نے مدثر نارو کے اہل خانہ کی بات تفصیل سے سنی، جس کے بعد انھوں نے وزیر اعظم آفس اور سیکریٹری داخلہ کو ہدایات جاری کر دیں۔
ڈاکٹر شیریں مزاری کا کہنا تھا کہ وزیر اعظم کی یقین دہانی پر مدثر نارو کے اہل خانہ مطمئن تھے، وزیر اعظم نے مدثر نارو کے بچے کی دیکھ بھال کی بھی یقین دہانی کرائی۔
یاد رہے کہ اپنی اہلیہ صدف اور اس وقت 6 ماہ کے بیٹے سچل کے ہمراہ ملک کے شمالی علاقوں میں گھومنے کی غرض سے گئے مدثر نارو اگست 2018 میں لاپتا ہو گئے تھے، اور اس کے بعد سے ان کی موجودگی کے بارے میں کوئی اطلاع نہیں ملی ہے۔
عدالت میں جمع کروائی گئی پٹیشن کے مطابق 2018 کے انتخابات کے چند روز بعد مدثر کو فون پر کہا گیا تھا کہ وہ انتخابات میں ہونے والی مبینہ بدعنوانی کے بارے میں سوشل میڈیا پر تبصرہ کرنے سے گریز کریں۔ گمشدگی سے چند ماہ قبل ان کی نوکری بھی اچانک ختم کر دی گئی تھی۔ رواں سال مئی میں ان کی اہلیہ صدف کا بھی انتقال ہوا۔
واضح رہے کہ گزشتہ روز لاپتا صحافی مدثر نارو کے خاندان کی وزیر اعظم اور وفاقی کابینہ سے ملاقات کے معاملے پر وفاقی کابینہ نے عدالتی حکم کے خلاف اپیل دائر کرنے کا فیصلہ کیا تھا، کابینہ نے عدالتی فیصلے کو آئین میں دیے اختیارات سے متصادم قرار دیا تھا۔
4 دسمبر کو اسلام آباد ہائی کورٹ نے وفاقی حکومت کو حکم دیا تھا کہ وہ جبری طور پر لاپتا ہونے والے صحافی اور بلاگر مدثر نارو کو 13 دسمبر کو عدالت میں پیش کریں۔
