نزلہ یا زکام وہ بیماریاں ہیں جو کسی کو کسی بھی وقت ہوسکتی ہیں تاہم موسم سرما میں لوگ اس کا زیادہ شکار ہوتے ہیں۔
یہ بیماریاں تکلیف دہ تو نہیں ہوتیں لیکن ان کی وجہ سے طبعیت میں بے چینی اور ذہنی پریشانی میں اضافہ ممکن ہے اور روز مرہ کی سرگرمیاں بھی متاثر ہوسکتی ہیں۔
نزلہ یا زکام کے باعث ناک بند ہونا واقعی پریشان کن ہو سکتا ہے۔ اکثر لوگ نزلہ زکام میں زور لگا کر ناک سنکتے ہیں جس سے وقتی آرام تو مل جاتا ہے مگر ایسا کرنا آپ کو خطرے میں ڈال سکتا ہے۔
غیر ملکی طبی رسالے میں شائع ایک رپورٹ کے مطابق ناک سنکنا صرف اس وقت مفید ہے جب اسے صحیح طریقے سے انجام دیا جائے بصورت دیگر سنگین نتائج بھگتنا پڑیں گے۔
ماہرین صحت نے لوگوں کو خبردار کیا ہے کہ نزلہ زکام کی کیفیت میں بنیادی گھریلو علاج بھی کار آمد ہوتا ہے تاہم اگر طبیعت چند ہفتوں تک بہتر محسوس نہ ہو تو ڈاکٹر سے ضرور رجوع کرنا چاہیے۔
ناک کے امراض کے ماہرین کا کہنا ہے کہ ہماری ناک روزانہ تقریباً ایک سے دو لیٹر بلغم بناتی ہے۔ جب ہم بیمار ہوتے ہیں تو ناک خراب وائرس کو پکڑنے کے لیے موٹا بلغم بناتی ہے۔ ناک سنکنے سے ہمیں تھوڑی دیر کے لیے بہتر محسوس ہوسکتا ہے۔
جب آپ اپنی ناک سنکتے ہیں تو کچھ بلغم باہر آتا ہے لیکن اس میں سے کچھ واپس آپ کے سائنوس میں بھی جاسکتا ہے جو کہ انفیکشن کو مزید خراب کر سکتا ہے۔ ناک سنکنے سے آپ کو جلد آرام مل سکتا ہے، لیکن اس کے منفی اثرات بھی ہو سکتے ہیں۔
ان کا کہنا تھا کہ بار بار ناک سنکنے سے جن نقصانات کو سامنا کرنا پڑسکتا ہے ان میں ناک سے خون آنا، کان میں درد اور سر میں سر میں درد جیسی کیفیت ہوسکتی ہے۔
دن میں کئی بار ناک سنکنے سے ناک کے اندر کا حصہ سوجن کا شکار ہوسکتا ہے جس سے ناک سے خون بہنے کا خدشہ بڑھ جاتا ہے۔
سونے سے قبل کچھ مقدار میں وکس کا استعمال بند ناک کو کھولنے میں مدد فراہم کرتا ہے، کھانسی کی شدت کم ہوتی ہے اور نیند بھی بہتر ہوتی ہے۔
