نام نہاد جمہوری ملک ہونے کے دعویدار بھارت کا پہلگام فالس فلیگ میں بدترین ناکامی کے بعد بلوچستان میں بڑی دہشت گردی کا منصوبہ بےنقاب ہوگیا۔
اس حوالے سے مصدقہ انٹیلی جنس ذرائع کا کہنا ہے کہ بھارتی ایجنسی ’’را‘‘ نے بلوچستان میں پراکسیز کو سرگرم کردیا ہے۔
ذرائع کے مطابق کالعدم بلوچستان لبریشن آرمی (بی ایل اے)، فتنہ الخوارج اور پاکستان میں غیرقانونی طور پر مقیم افغانیوں کو دہشت گردی کی ہدایات دی گئی ہیں۔
مصدقہ انٹیلی جنس ذرائع کا کہنا ہے کہ بھارتی ایجنسی’’را‘‘نے دہشت گردوں کو افغانستان سے متعلقہ علاقوں میں بھجوا دیا اور چند خودکش بمباروں کو علاقوں کی ریکی بھی کروا دی گئی ہے۔
اطلاعات کے مطابق خودکش بمبار دہشت گردی کی واردات میں گاڑی، موٹر سائیکل کا استعمال کرسکتے ہیں، گوادر، کوئٹہ اور خضدار میں دہشت گردی کی ہدایات دی گئی ہیں۔
بھارتی سرپرستی میں دہشت گردی منصوبے کو ناکام بنانے کیلئے قانون نافذ کرنے والے ادارے متحرک ہوگئے۔
یاد رہے کہ بھارت کی جانب سے بلوچستان میں کی جانے والی دہشت گردی کی وارداتوں کے واضح اور ناقابل تردید ثبوت پہلے ہی منظر عام پر آچکے ہیں۔
بھارت گزشتہ کئی سال سے بلوچستان میں دہشت گردی کروا کر پاکستان میں بدامنی پھیلانے کے ناپاک منصوبوں پر عمل درآمد کررہا ہے۔
