Tag: بلوچستان

کوئٹہ:گھر کے اندر ڈکیتی کی کوشش کے دوران چھریوں کے وار سے لیڈی ڈاکٹر شدید زخمی ہوگئی،ڈاکو لیڈی ڈاکٹر کو زخمی کرنے کے بعد کچھ چھینے بغیر فرار ہوگئے.

تفصیلات کے مطابق کوئٹہ شہر کے نواحی علاقے ارباب کرم خان روڈ پر رہائش پذیر سابق مجسٹریٹ علی نواز مگسی کے گھر رات کے آخری پہر دو ڈاکو گھر کی عقبی جانب سے دیوار پھلانگ کر آئے.

علی نواز مگسی کی صاحبزادی لیڈی ڈاکٹر فردوس مگسی نے ڈاکوؤں سے مزاحمت کی جس پر ڈاکوؤں نے چھریوں کے وار کرکے ڈاکٹر فردووس کو شدید زخمی کردیا،جنہیں تشویشناک حالت میں بولان میڈیکل کمپلیکس اسپتال منتقل کردیا گیا.

لیڈی ڈاکٹر کو زخمی کرنے کے بعد ڈاکو کچھ چھینے بغیر فرار ہوگئے،علی نواز مگسی کے مطابق ان کی صاحبزادی نے ڈاکوؤں کے خلاف مزاحمت کی ،ڈاکوؤں نے فرار ہوتے ہوئے ہوائی فائرنگ بھی کی جس سے علاقے میں خوف وہراس پھیل گیا.

کوئٹہ: سریاب روڈ پر نامعلوم افراد کی فائرنگ سے پولیس اہلکار زخمی ہو گیا،پولیس اہلکار کو تشویش ناک حالت میں سی ایم ایچ اسپتال منتقل کر دیا گیا.

تفصیلات کے مطابق کوئٹہ کے علاقے سریاب روڈ پر پولیس اہلکار پر نامعلوم موٹر سائیکل سوار حملہ آوروں نےفائرنگ کردی،فائرنگ کے نتیجے میں پولیس اہلکار شدید زخمی ہوگیا.

پولیس کے مطابق واقعے کے بعد ملزمان جائے وقوعہ سےفرار ہونے میں کامیاب ہو گئے تاہم علاقے کی ناکہ بندی کر دی گئی ہے.

واضح رہے کہ گذشتہ روز کوئٹہ کے علاقے ڈبل روڈ پر دہشت گردوں نے ایف سی کی گاڑی پر فائرنگ کی تھی،جس میں چارجوان شہید ہوگئے جبکہ منگل کو ہزارگنجی اور سریاب روڈ پر چار پولیس اہلکاروں کو نشانہ بنایا گیا تھا.

کوئٹہ : صوبہ بلوچستان کے ضلع خضدار میں ٹریفک حادثے میں بارہ افراد جاں بحق اور بیس افراد زخمی ہوگئے.

تفصیلات کے مطابق لیویز حکام کے مطابق حادثہ ضلع کے علاقے پیر عمر کے علاقے میں پیش آیا،حکام کے مطابق مسافر بس کوئٹہ سے کراچی کی جانب جا رہی تھی، بس پیر عمر کے علاقے میں پہنچی تو بے قابو ہوکر ایک پل سے نیچے جا گری.

حادثے میں زخمیوں کو طبی امداد کے لیے قریبی اسپتال منتقل کردیا گیا جہاں بعض کی حالت تشویشناک بتائی جاتی ہے.

یاد رہے کہ کوئٹہ اور کراچی کے درمیان آر سی ڈی ہائی وے نہ صرف دونوں شہروں بلکہ بلوچستان کے سندھ سے رابطے کا ایک اہم زمینی راستہ ہے،روزانہ اس شاہراہ پر بلوچستان کے مخلتف شہروں اور کراچی کے درمیان مسافر بسوں کی ایک بڑی تعداد کی آمدو رفت ہوتی ہے.

واضح رہے کہ احتیاطی تدابیر اختیار نہ کرنے کی وجہ سے کوئٹہ کراچی ہائی وے پر ٹریفک حادثات ایک معمول بن گئے ہیں.

کوئٹہ : معروف قوال امجد صابری کو خراج عقیدت پیش کرنے کے لیے اسمبلی چوک پر دوسرے روز بھی شمعیں روشن کی گئیں.

تفصیلات کے مطابق بلوچستان کے دارالحکومت کوئٹہ سےتعلق رکھنے والے ٹی وی فنکاروں نے اسمبلی چوک پر جمع ہوکر امجد صابری کی یاد میں شمعیں روشن کیں اور انہیں خراج عقیدت پیش کیا.

فنکاروں نے امجد صابری کے قاتلوں کی گرفتاری اور دیگر مطالبات پر مبنی پلے کارڈز اٹھارکھے تھے جبکہ فنکاروں کے بچوں نے بھی شمعیں روشن کرنے میں حصہ لیا.

اس موقع پر امجد صا بری کی روح کے ایصال ثواب کے لیے فاتحہ خوانی بھی کی گئی،شمعیں روش کرنے والے فنکاروں کا کہنا تھا کہ امجد صابری کا قتل کاری ضرب ہے معروف قوال کی شہادت سے جو خلاء پید ا ہوا ہے وہ کبھی پر نہیں ہوسکے گا،انہوں نے کہا کہ امجد صابری کے قتل نے فنکاروں کو تنہا کردیا ہے.

کوئٹہ : وزیر اعلیٰ بلوچستان نواب ثناء اللہ زہری نے کہا ہے کہ دہشت گردی کے خاتمے کےلیے اربوں روپے خرچ کررہے ہیں ہماری خواہش ہے کہ کھیل کے میدان آباد ہو ں تاکہ دہشت گردی کا جلد از جلد خاتمہ ہوسکے.

تفصیلات کے مطابق کوئٹہ کے نواب بگٹی اسٹیڈیم میں چیف منسٹر ڈے اینڈ نائٹ رمضان کرکٹ چیمپئن شپ کی افتتاحی تقریب سے خطاب میں نواب ثناء اللہ زہری کا کہنا تھا کہ دہشت گرد بزدل ہیں وہ پیچھے سے وار کرتے ہیں لیکن بلوچستان کے عوام بہادر ہیں اوردہشت گردوں سے نہیں ڈرتے.

انہوں نے کہا کہ ہم عوام کو پڑھا لکھا اور ترقی یافتہ بلوچستان دےکر جائیں گے،اس موقع پر وزیراعلیٰ بلوچستان نے شاٹ لگاکر چیمپئن شپ کا افتتاح کیا.

چیمپئن شپ میں کوئٹہ کی تئیس ٹیمیں حصہ لیں رہی ہیں نواب ثناء اللہ زہری نے اس موقع پر کوئٹہ گلیڈیٹرز اکیڈمی کے قیام کے لیے اراضی فراہم کرنے کی حامی بھرلی.

کوئٹہ: ہزارہ ڈیموکریٹک پارٹی کے چیئرمین عبدالخالق ہزارہ کے بڑے بھائی کو اغوا کرلیاگیا.

تفصیلات کے مطابق ہزارہ ڈیموکریٹک پارٹی کے چیئرمین عبدالخالق ہزارہ کے بڑے بھائی عبدالعلی ہزارہ معروف کول ایجنٹ ہیں جو گزشتہ روز کوئٹہ کے وسطی علاقے ریگل پلازہ میں واقع اپنے دفتر پہنچے تو آٹھ مسلح افراد نے انہیں ملازم اور ڈرائیور سمیت اغواکرلیا.

اغواکاروں نے بعد میں ڈرائیور اور ملازم کو مستونگ کے علاقے دشت کے قریب چھوڑ دیا اور عبدالعلی ہزارہ کو اپنے ہمراہ لے گئے.

عبدالخالق ہزارہ کے رشتہ داروں کا کہنا ہے کہ ان کی کسی سے کوئی دشمنی نہیں تھی.

یاد رہے گذشتہ ماہ پشتونخوا ملی عوامی پارٹی کے مرکزی رہنما اور بلوچستان کے وزیر بلدیات سردارمصطفی خان ترین کے صاحبزادے سردار اسدخان ترین کو نامعلوم افراد نے پشین سے اغوا کرلیا تھا.

سردار اسد خان ترین کو اس وقت اغوا کیا گیا جب وہ کیڈٹ کالج پشین میں اپنی ڈیوٹی کرنے کے بعد واپس گھر جارہے تھے،اغوا کار اسد خان ترین کا موبائل فون بھی ساتھ لے گئے،جبکہ ان کی گاڑی سرخاب روڈ سے برآمد کرلی گئی تھی.