مائیکرو بلاگنگ پلیٹ فارم ’بلیو اسکائی‘ نے چند ہفتوں میں ہی انٹرنیٹ صارفین میں بے پناہ مقبولیت حاصل کرلی ہے، استعمال کرنیوالوں کی تعداد کروڑ تک جا پہنچی۔
عالمگیر مقبولیت کی وجہ سے اس بات کے قوی امکانات ہیں کہ ڈی سینٹرلائزڈ مائیکرو بلاگنگ پلیٹ فارم ’بلیو اسکائی‘ دیگر ایپس جیسے فیس بک، انسٹاگرام اور تھریٹز کی طرح مقبولیت حاصل کرلے گا، لانچ کے بعد سے اب تک اسے استعمال کرنے والے صارفین کی تعداد 2 کروڑ تک پہنچ گئی ہے۔
21 نومبر تک سامنے وٓنے والے اعداد و شمار کے مطابق ’بلیو اسکائی‘ کے صارفین کی مجموعی تعداد 2 کروڑ تک پہنچ چکی تھی جو یقیناً اس وقت مزید بڑھ چکی ہوگی، مائیکرو بلاگنگ پلیٹ فارم کی مقبولیت سے پتا چلتا ہے کہ صارفین اسے استعمال کرنا پسند کررہے ہیں۔
نومنتخب امریکی صدر ڈونلڈ ٹرمپ نے اپنی حکومت میں ’ایکس‘ کے مالک ایلون مسک کو شامل کرنے کا اعلان کیا تھا، اس کے بعد سے ویب سائٹ بلیو اسکائی کی مقبولیت میں نمایاں اضافہ دیکھنے میں آیا ہے۔
اکثر سوشل میڈیا پلیٹ فارم استعمال کرنے والے نیٹیزنز کا ماننا ہے کہ دنیا کی امیر ترین شخصیت میں سے ایک ایلون مسک کے امریکی حکومت کا حصہ بننے کے بعد سے ایکس متنازع حیثیت کا حامل ہوگا۔
اس صورتحال کے پیش نظر دنیا بھر کے مختلف بڑے میڈیا آؤٹ لیٹس، انسانی حقوق کے رہنماؤں اور صحافیوں نے ایکس کو چھوڑنے کا اعلان کیام گزشتہ دنوں مشہور اخبار دی گارڈین نے بھی ایکس کو چھوڑنے کا اعلان کیا تھا۔
صحافیوں اور میڈیا آؤٹ لیٹس نے جیسے ہی سوشل میڈیا پلیٹ فارم ایکس سے کنارہ کشی اختیار کی، بلیو اسکائی کی مقبولیت میں بے پناہ اضافہ ہوا اور لوگوں کی بڑی تعداد اس کی طرف متوجہ ہوئی۔
بلیو اسکائی کمپنی کے مطابق گزشتہ دو ہفتوں سے یومیہ لاکھوں افراد ہمارے پلیٹ فارم پر اکاؤنٹ بنا رہے ہیں، 21 کو کمپنی نے اعلان کیا کہ بلیو اسکائی کے صارفین کی تعداد 2 کروڑ ہوگئی ہے۔
