ARYNews.tv | Urdu – Har Lamha Bakhabar

Tag: بلی کے بچے

  • مسافر کے سامان سے بلی کے بچے برآمد

    مسافر کے سامان سے بلی کے بچے برآمد

    جرمنی میں پولیس حکام نے ایک بس میں مسافر کے سامان سے 18 بلی کے بچے برآمد کیے جنہیں مبینہ طور پر غیر قانونی طریقے سے جرمنی لایا گیا ہے۔

    غیر ملکی میڈیا رپورٹ کے مطابق جرمن ریاست باویریا کے شہر وائڈ ہاؤس کے قریب ہائی وے پر تعینات افسران کو ایک بس میں موجود سامان سے بلی کے بچوں کی رونے کی آوازیں آئی جس کے بعد کارروائی کی گئی۔

    پولیس حکام نے بتایا کہ کارروائی کے دوران چیک ریپبلک کی سرحد کے ذریعے اٹھارہ بلونگڑوں کو مبینہ طور پر غیر قانونی طریقے سے جرمنی میں لایا گیا، ان افسران نے جب بس کی تلاشی لی تو انہیں 6 ڈبوں میں 18 بلی کے بچے ملے، جن کی عمر 12 ہفتے ہے۔

    پولیس حکام نے بتایا ان بلی کے بچوں کو جرمنی لانے والے شخص کی عمر 37 سال ہے جس کے خلاف فراڈ اور جانوروں کی صحت سے متعلق قانون کی خلاف ورزی کا مقدمہ درج کیا گیا ہے۔

    پولیس نے مزید بتایا ہے کہ ان بلی کے بچوں کو جانوروں کو پناہ فراہم کرنے والے ایک ادارے کے حوالے کر دیا گیا ہے۔

    واضح رہے کہ جرمن قانون کے تحت کم عمر جانوروں کو ملک میں لانے پر پابندی عائد ہے اور یہاں لائے جانے والے جانوروں کی ویکسینیشن کرانا بھی لازمی ہے۔

  • بلی کے بچوں کا پوسٹ مارٹم کرایا جائے، شہری تھانے پہنچ گیا

    بلی کے بچوں کا پوسٹ مارٹم کرایا جائے، شہری تھانے پہنچ گیا

    حیدرآباد : بھارت میں ایک شخص اپنے گھر میں پلی بلی کے مرے ہوئے بچے لے کر پولیس اسٹیشن پہنچ گیا، اس کا کہنا تھا کہ ان کا پوسٹ مارٹم کروایا جائے تاکہ مارنے والوں کا پتہ چل سکے۔

    بھارتی شہر حیدرآباد کے بھولک پور علاقہ میں ایک انوکھا واقعہ پیش آیا۔ جہاں ایک شخص نے تھانے جاکر پولیس سے شکایت کی کہ کسی نے اس کی پالتو بلی کے بچوں کو زہر دے کر مار ڈالا ہے، یہ شخص اپنی پالتو بلی کے مردہ بچوں کو گاندھی اسپتال لے گیا جہاں اس نے ڈاکٹروں پر زور دیا کہ ان مردہ بچوں کا پوسٹ مارٹم کروایا جائے۔

    بھارتی میڈیا رپورٹس کے مطابق اس شخص نے اپنے مکان میں بلی کے دس بچوں کو پالا ہوا تھا، جس سے اس کے محلے والوں کو شکایات تھیں۔ انہوں نے مذکورہ شخص سے شکایات کرتے ہوئے اسے متنبہ بھی کیا تھا۔

    اسی دوران بلی کے دس بچوں میں سے 6بچوں کی مشتبہ موت واقع ہوگئی، اس شخص نے الزام لگایا کہ بلی کے 6بچوں کو جان بوچھ کر زہر دے کر ہلاک کیا گیا ہے، وہ ان مردہ بچوں کو لے کر گاندھی اسپتال پہنچ گیا اور ان کے پوسٹ مارٹم کیلئے ڈاکٹروں سے پرزور اصرار کیا۔

    جس پر ڈاکٹروں نے کہا کہ قانون کے مطابق پولیس سے شکایت اور پھر مقدمہ درج ہونے کے بعد ہی ان بچوں کا پوسٹ مارٹم کیا جاسکتا ہے۔ جس پر اس شخص نے بلی کے بچوں کی موت پر شبہ ظاہر کرتے ہوئے مشیرآباد پولیس سے مقدمہ درج کرنے کی درخواست دی ہے۔

  • ماں کے نظر انداز کرنے پر بندر نے بلی کے بچے کو گود لے لیا، ویڈیو وائرل

    ماں کے نظر انداز کرنے پر بندر نے بلی کے بچے کو گود لے لیا، ویڈیو وائرل

    کولالمپور: ملائشیا کے شہر کوالا کانگسر میں ماں کے نظر انداز کرنے پر بندر نے بلی کے بچے کو گود لے لیا، انوکھی ویڈیو سوشل میڈیا پر وائرل ہوگئی۔

    سماجی رابطے کی ویب سائٹ پر صارف ’رومی شاہ‘ نے ایک ویڈیو اپ لوڈ کی جس میں دیکھا جاسکتا ہے کہ بندر بلی کے بچے کو ہاتھ میں اٹھائے ایک اونچے مقام کی طرف جارہا ہے۔

    انوکھے واقعے کی ویڈیو کو اب تک 30 لاکھ سے زائد لوگ دیکھ چکے ، اکثر صارفین بندر کی اس حرکت پر حیران بھی ہیں۔

    رومی کی طرف سے شیئر ہونے والی ویڈیو میں دیکھا جاسکتا ہے کہ بندر ایک بلی کے بچے کو ماں کی غیر موجودگی میں اٹھا کر فرار ہوا اور پھر وہ اونچے مقام پر اُسے پکڑ کر بیٹھ گیا۔

    https://www.facebook.com/romy.shah.5/videos/1849739268476394/

    حیران کُن طور پر ویڈیو میں دیکھا جاسکتا ہے کہ بلی کے بچے کی جانب سے کوئی مزاحمت نہیں ہوئی بلکہ وہ بھی خاموشی سے بندر کے پاس بیٹھا رہا جبکہ اس دوران اُس کی ماں نیچے سے پکارتی رہی۔

    رومی کا کہنا تھا کہ ’بندر کی بلی کے بچے سے محبت بہت ہی عجیب تھی کیونکہ اُس نے ماں کی غیر موجودگی کا فائدہ اٹھایا اور پھر اُسے لے کر اوپر بیٹھ گیا، اس دوران بندر نے بھی بچے پر کوئی تشدد نہیں کیا بلکہ اُس کا خیال رکھا‘۔

    https://www.facebook.com/romy.shah.5/videos/1849739488476372/

    صارف کا کہنا تھا کہ ’بچے کی ماں جب دوسری بلی کے قریب گئی تو بندر نے اسی دوران اُسے گود میں اٹھایا اور بھاگ گیا‘۔ صارفین نے بندر کی اس حرکت کو اغوا جبکہ کچھ لوگ اسے بندر کی رحم دلی کا نام دیا۔

  • بہادر کتے نے بلی کے نومولود بچوں کی جان بچالی

    بہادر کتے نے بلی کے نومولود بچوں کی جان بچالی

    یورپ اور ایشیا کے سنگم پر واقع ملک جارجیا میں ایک بہادر کتے نے بلی کے 7 نومولود بچوں کی جان بچا لی۔

    کتے کی مالکہ وٹنی بارلے کا کہنا ہے کہ کتا صبح سے ہی بے چین تھا اور باہر جانا چاہتا تھا۔ بالآخر اس سے رہا نہ گیا تو اس نے ان کے کپڑے کھینچنا شروع کردیے اور باہر جانے کے لیے مچلنے لگا۔

    باہر نکل کر وہ تیزی سے گھر کے قریب پڑے ایک ڈبے کے پاس گیا اور اس کے اندر سے بلی کا ایک ننھا سا بچہ نکلا کر باہر رکھ دیا۔

    بارلے کا کہنا ہے کہ وہ اسے دیکھ کر حیران رہ گئیں اور جب انہوں نے ڈبے کے اندر جھانکا تو اس کے اندر مزید 6 بچے رکھے ہوئے تھے۔

    بچے بالکل بے حس و حرکت تھے اور انہیں خیال گزرا کہ کہیں مردہ نہ ہوں، لیکن وہ زندہ تھے۔

    بارلے ان ننھے بچوں کو اپنے گھر لے آئیں۔ اس دوران کتا مسلسل بچوں کے پاس ہی رہا اور ایک منٹ کے لیے بھی وہاں سے نہیں ہٹا۔

    بارلے کا کہنا ہے کہ جب بچے محفوظ مقام پر پہنچ گئے تب جا کر کتے کو سکون آیا اور وہ سکون سے بچوں کے پاس ہی سوگیا۔

    کتے کا یہ عمل جلد ہی پورے علاقے میں مشہور ہوگیا اور لوگوں نے اسے ہیرو قرار دیا جس نے ننھے بچوں کی جان بچائی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔