اسلام آباد : سپریم کورٹ نے پی ٹی آئی کی بلے کے نشان کی بحالی کیلئے درخواست کو دس جنوری کو مقرر کرنے کا حکم دے دیا۔
تفصیلات کے مطابق سپریم کورٹ میں لیول پلیئنگ فیلڈ کیس کی سماعت ہوئی، چیف جسٹس قاضی فائز عیسیٰ کی سربراہی میں بینج نے سماعت کی۔
دوران سماعت وکیل شعیب شاہین نے کہا کہ استدعا ہے آج ہی بلے کے نشان کا کیس سماعت کیلئےمقرر کرکے سنا جائے، بلےکے نشان سے متعلق کل پشاورہائیکورٹ میں سماعت ہے، آج کسی بھی وقت کیس کو سماعت کر کے سن لیں۔
سپریم کورٹ نے بلے کے نشان کیس میں حامد خان کو بلا لیا، چیف جسٹس پاکستان نے کہا کہ حامد خان کہاں ہیں؟ بلائیں ان کو، آپ اٹھ کر کمرہ عدالت آنےکی زحمت نہیں کرینگےتوہم کیاکریں؟ سب سے زیادہ درخواستیں پی ٹی آئی کی آ رہی ہیں اورسنی بھی جا رہی ہیں، کیس بھی لگوانا ہے اور اٹھ کر عدالت بھی نہیں آنا۔
چیف جسٹس نے استفسار کیا کیا شعیب شاہین کی طرف سے کوئی جواب آیا ہے ، حامد خان ایڈووکیٹ سپریم کورٹ کے بلانے پر روسٹرم پرآئے۔
چیف جسٹس نے حامد خان سے استفسار کیا کیا آپکی درخواست کل مقرر کر دیں؟ حامد خان نے استدعا کی آج ہی سماعت کے لیے مقرر کر دیں تو چیف جسٹس کا کہنا تھا کہ آج 9ممبربینچ کاکیس بھی ہے اورایک خصوصی بینچ کاکیس بھی ، جس پر وکیل حامد خان نے کہا کہ ہماری ترجیح آج ہے ، نہیں تو پھر پرسوں لگا دیں۔
چیف جسٹس پاکستان نے استفسار کیا آپ فیصلے کیخلاف آئےیا184 تھری کی درخواست ہے؟ وکیل حامد خان نے جواب دیا کہ پشاور ہائیکورٹ کےحکم کیخلاف 185تھری میں سپریم کورٹ آئے تو چیف جسٹس کا کہنا تھا کہ بس پھر معاملہ ججزکمیٹی کے پاس نہیں جاناتوپرسوں کیس مقررہوگیا۔
سپریم کورٹ نےپی ٹی آئی کی بلے کےنشان کی بحالی کیلئےد رخواست 10 جنوری کیلئے مقرر کردی۔
