Tag: بمباری

غزہ پر اسرائیلی فوج کی بربریت کا سلسلہ شروع ہوئے 2ماہ مکمل ہوچکے ہیں، جبکہ دیرالبلاح، خان یونس، نصیرات اور بریج کیمپ پر اسرائیلی بمباری میں مزید 110 سے زائد فلسطینی جام شہادت نوش کرگئے۔

بین الاقوامی خبر رساں ادارے کی رپورٹ کے مطابق اسرائیل کی بلاتفریق بمباری کے نتیجے میں تباہ ہونے والی عمارتوں کے ملبے تلے 7 ہزار 600 سے زائد افراد اب بھی دبے ہیں۔ جن کی لاشیں تاحال نہیں نکالی جاسکی ہیں۔

اسرائیلی فوج نے 7 اکتوبر سے اب تک غزہ میں 7 ہزار سے زائد بچوں سمیت 16ہزار سے زائد بے گناہ فلسطینیوں کو موت کی نیند سلادیا ہے۔ فلسطینی شہدا کی مجموعی تعداد 16 ہزار 248 جبکہ زخمی ہونے والوں کی تعداد بھی 43 ہزار 600 سے بھی بڑھ چکی ہے۔

فلسطینی حکام کا کہنا ہے کہ اسرائیلی فوج کی جانب سے ایک بار پھر فاسفورس بموں کا استعمال کیا جا رہا ہے۔اسرائیل افواج کی شہر اور رہائشی علاقوں اور پناہ گزین کیمپوں پر بمباری جاری رہی جبکہ اسرائیلی ٹینکوں نے ایمبولینسوں پر بھی حملے کئے۔

دوسری جانب اسرائیلی فوج نے جنوبی غزہ پر وحشیانہ حملے کے بعد انٹرنیٹ سروس پھر بند کر دی ہے۔

فلسطینی ٹیلی کام کمپنی کا کہنا ہے کہ غزہ کی پٹی پر مکمل مواصلاتی بلیک آؤٹ ہے جب کہ مصر نے رومنگ سروس فراہم کرنے سے انکار کر دیا ہے۔

اسرائیلی فوج مسجد اقصیٰ کے امام کا گھر مسمار کرنے پہنچ گئی

غزہ میں ہنگامی امداد کی سرگرمیاں بند ہونے کا خدشہ ہے۔ ہلال احمر کے مطابق ٹیلی کام بلیک آؤٹ کی وجہ سے ٹیموں سے رابطہ منقطع ہو گیا۔جانی نقصان اور حملوں سے ہونے والی تباہی سے متعلق تفصیلات نہیں مل سکیں گی۔

یروشلم: قابض اسرائیلی فوج نے ایک بار پھر غزہ پر زمینی اور فضائی حملے شروع کردیئے ہیں، جس کے باعث بڑے پیمانے پر شہادتوں اور تباہی کا خدشہ ظاہر کیا جارہا ہے، شدید بمباری کے باعث مواصلاتی نظام تباہ ہوچکا ہے، جس کے باعث غزہ کا دنیا بھر سے رابطہ مکمل طور پر منقطع ہوچکا ہے۔

غیر ملکی ذرائع ابلاغ کے مطابق اسرائیلی فورسز نے غزہ میں بھرپور طاقت کے ساتھ آپریشن اور وحشیانہ بمباری کا آغاز کردیا ہے، جس کے باعث غزہ کی پٹی میں مواصلاتی نظام مکمل تباہ ہوگیا ہے۔

عرب میڈیا کا اس حوالے سے کہنا ہے کہ غزہ میں 100 سے زائد فضائی طیاروں کی جانب سے بمباری کی جارہی ہے، جبکہ ٹینکس اور توپوں کے ذریعے بھی بمباری کا سلسلہ جاری ہے۔

الجزیزہ کے مطابق فلسطینی ٹیلی کمیونیکیشن کمپنی جوال کا کہنا ہے کہ اسرائیلی بمباری سے آخری بچنے والی انٹرنیشنل کیبل بھی تباہ ہوگئی ہے، جس کے باعث غزہ کا رابطہ دنیا سے کٹ گیا ہے۔

اسرائیلی فوج کے ترجمان ڈینیل ہگری کا کہنا ہے کہ آج کی رات ہماری فورسز غزہ میں زمینی آپریشن کا دائرہ بڑھا دیں گی، جس کے تحت مختلف علاقوں میں شدید بمباری بھی کی جائے گی۔

ڈینیل ہگری کا کہنا تھا کہ غزہ شہر کے لوگ اپنے گھروں سے جنوبی علاقوں کی طرف نقل مکانی کرلیں کیونکہ اسرائیل کی جانب سے فضائی کارروائیاں بھی کی جائیں گی۔

اسرائیل کی توپوں نے غزہ میں قائم الشفا اسپتال کے قریب بھی شدید بمباری کی ہے، جس کے باعث بڑے پیمانے پر جانی نقصان کا اندیشہ ہے۔

دوسری جانب اقوام متحدہ کی جنرل اسمبلی میں بھاری اکثریت سے غزہ میں فوری طور پر انسانی بنیادوں پر جنگ بندی کی قرارداد کو منظور کرلیا گیا ہے۔

اقوام متحدہ کی جانب سے غزہ میں جنگ بندی کی قرارداد منظور کرتے ہوئے محصور غزہ تک امدادی رسائی اور اس کے شہریوں کے تحفظ کا مطالبہ بھی کیا گیا ہے۔

اقوام متحدہ کی جنرل اسمبلی میں قرارداد کے حق میں 120 ووٹوں پڑے، جب کہ 45 غیر حاضر رہے اور 14 بشمول اسرائیل اور امریکہ نے قرارداد کیخلاف ووٹ دیا۔

واضح رہے کہ عرب ریاستوں کی طرف سے تیار کردہ قرارداد کا مسودہ اگرچہ قانون کے نفاذ کا پابند نہیں ہے تاہم یہ سیاسی وزن ضرور رکھتا ہے۔

اسرائیلی فوج کی جانب سے غزہ پر وحشیانہ بمباری کا سلسلہ جاری ہے، تازہ حملوں میں مزید 425 فلسطینی شہید ہوگئے، صرف ایک گھنٹے کے دوران 50 شہری اپنی زندگیوں سے ہاتھ دھو بیٹھے۔

بین الاقوامی خبر رساں ادارے کی رپورٹ کے مطابق فلسطینی شہداء کی تعداد 5 ہزار 8 سے بھی تجاوز کرگئی ہے، جس میں 23 سو سے زیادہ بچے اور 13 سو کے قریب خواتین شامل ہیں، 18 ہزار زخمی ہوئے ہیں۔

اسرائیلی جارحیت کے نتیجے میں ڈاکٹروں سمیت طبی عملے کے 65 ارکان شہید ہوچکے ہیں، غزہ کے 35 میں سے 12 اسپتالوں نے کام بند کردیا ہے، 72 میں سے 46 طبی مراکز غیر فعال ہوچکے ہیں۔

گزشتہ روز رفح کراسنگ سے امدادی سامان کے 20 ٹرکوں کی غزہ میں منتقلی نہیں ہوسکی، امکان ظاہر کیا جارہا ہے کہ اب امدادی سامان کے ٹرک آج داخل ہوسکیں گے۔

اقوام متحدہ کے ادارہ برائے مہاجرین نے خبردار کرتے ہوئے کہا ہے کہ اگر ایندھن نہ ملا تو آج غزہ کے اسپتال بند ہوجائیں گے، صاف پانی کی فراہمی بھی بند ہوجائے گی۔

دوسری جانب فلسطینیوں کی حمایت میں بیان دینے پر اسرائیل نے سیکریٹری جنرل یواین سے مستعفی ہونے کا مطالبہ کر دیا۔ اقوام متحدہ میں اسرائیلی سفیر گیلاد اردن نے سلامتی کونسل میں انتونیوگوتریس کے تبصرے پر برہمی کا اظہار کیا ہے۔

انہوں نے کہا کہ ان لوگوں سے بات کرنے کا کوئی جواز یا فائدہ نہیں ہے جو اسرائیل کے شہریوں اور یہودیوں کے خلاف ہونے والے بدترین مظالم پر ہمدردی کا اظہار کرتے ہیں بس کوئی الفاظ نہیں ہیں۔ سیکریٹری جنرل اقوام متحدہ نے اپنے خطاب میں فلسطینیوں کی 56سالہ گھٹن کا ذکر کیا تھا۔