لاہور : وزیراعظم عمران خان کی ہدایت پروزیراعلیٰ پنجاب عثمان بزدار صوبے میں 5 نئے اسپتال بنانے کی منظوری دے دی، تمام اسپتال200 بیڈز پر مشتمل ہوں گے ، مرحلہ وار 2 سے 3 سال میں اسپتال مکمل کرنے کا ہدف مقرر کیاگیا ہے۔
تفصیلات کے مطابق پنجاب حکومت نے صوبے میں پانچ نئے اسپتال بنانے کا فیصلہ کرلیا ہے ، وزیراعظم عمران خان کی ہدایت پر وزیراعلیٰ پنجاب عثمان بزدار نے منظوری دے دی ہے۔
نئےاسپتال میانوالی،اٹک،لیہ ،مظفرگڑھ،راجن پور میں بنائےجائیں گے، لیہ اور میانوالی میں اسپتال کے لئے جگہ حاصل کرلی گئی ہے، تمام اسپتال 200 بیڈز پر مشتمل ہوں گے ۔
نئےاسپتالوں کےساتھ پیرامیڈیکل اور نر سنگ کالج بھی ہوں گے جبکہ مرحلہ وار 2 سے 3 سال میں اسپتال مکمل کرنے کا ہدف مقرر کیاگیا تھا۔
یاد رہے گذشتہ ماہ حکومت پنجاب نے شعبہ صحت میں انقلابی اقدام اٹھاتے ہوئے ہیلتھ کارڈ تقسیم کرنے کا اعلان کیا تھا، جس کے تحت 9 بڑی بیماریوں کا علاج کراویا جاسکے گا۔
مزید پڑھیں: پنجاب حکومت کا انقلابی اقدام، 9 بڑی بیماریوں کے علاج کا 70 فیصد خرچہ حکومت اٹھائے گی
ہیلتھ کارڈ جن بیماریوں اور سرجریز پر کے لیے قابلِ استعمال ہوگا، ان میں ایکسڈینٹ (ٹریفک حادثات)، ہیڈ انجری، نیورو سائنسس، عارضہ قلب اور اسٹنٹ ڈالنے کی سہولت شامل ہیں۔
خیال رہے وزیراعلیٰ پنجاب عثمان بزدار کا کہنا تھا کہ پائی پائی امانت سمجھ کر دیانت کےساتھ عوام پرخرچ کر رہے ہیں، نئے پاکستان میں ہر علاقے کو یکساں ترقی دیں گے، تحریک انصاف ترقی کےسفرکو پسماندہ علاقوں تک لےجائے گی۔
ان کا کہنا تھا کہ سابق دورمیں قومی وسائل کابےدریغ ضیاع کیاگیا، ماضی کی حکومتوں نےعوام کی بنیادی ضرورتوں کونظرانداز کیا گیا۔
