Tag: بنگلور

بنگلور میں خاتون نے دھوکا دہی سے رکشہ ڈرائیور سے بڑی رقم ہتھیا لی، موبائل پر ’جعلی ادائیگی کی رسید‘ دکھا کر ڈرائیور کو لوٹ لیا۔

غیرملکی میڈیا رپورٹس کے مطابق بھارتی شہر بنگلور میں 58 سالہ ڈرائیور کے رکشے میں سفر کرنے والی خاتون نے کالج کی فیس دینے کے نام پر اس سے رقم لی اور موبائل کی اسکرین پر لین دین کی جعلی رسید دکھا کر 23 ہزار چار سو روپے لے اڑی۔

ہوا یوں کہ دھوکے باز خاتون نے سفر کے دران شیو کمار اور اس کے دوست کے درمیان ہونے والی گفتگو سن لی، جس میں شیو کمار رقم لینے کا ذکر کررہا تھا، خاتون نے اسے بتایا کہ وہ جہاں اپنے دوست سے ملنے جارہا ہے اسے بھی ہنومنتھ نگر میں پی ای ایس کالج جانا ہے جس پر رکشا ڈرائیور راضی ہوگیا۔

ڈرائیور نے جب اپنے دوست سے رقم لے لی تو خاتون نے اس سے کچھ نقد رقم مانگی کہ اسے اپنی کالج کی فیس ادا کرنی ہے اور وہ فون پی (ادائیگی کی ایپ) کے ذریعے رقم واپس کر دے گی۔

لڑکی نے بہانا بنایا کہ کالج والے ڈیجیٹل ادائیگی قبول نہیں کر رہے، فی الحال اس کے پاس کوئی نقد رقم یا ڈیبٹ کارڈ نہیں ہے اور اسے پیسوں کی سخت ضرورت ہے۔

ڈرائیور نے بتایا کہ اس نے خاتون سے پہلے رقم منتقل کرنے کا کہا، خاتون نے 23,400 روپے مانگے تھے، اسی دوران لڑکی نے اپنے موبائل کی اسکرین دکھائی جس میں ظاہر ہورہا تھا کہ اس نے رکشے کے کرائے سمیت 23,500 روپے ٹرانسفر کیے ہیں جبکہ خاتون نے رکشہ ڈرائیور سے مذکورہ رقم نقد لے لی تھی۔

ڈرائیور کے میسج چیک کرنے سے قبل ہی لڑکی کالج میں گھس گئی جب ڈرائیور کے پاس رقم نہیں آئی تو اس نے کالج میں جانے کی کوشش کی مگر اسے داخل نہیں ہونے دیا گیا۔

رکشہ ڈرائیور نے مذکورہ خاتون کے خلاف پولیس میں شکایت درج کرا دی ہے اور پولیس اس حوالے سے تحقیقات کررہی ہے۔

کرناٹک: بھارتی شہر بنگلور میں ایک جگہ پانی کا ٹینک بھرے جانے میں غفلت کے باعث ایک بچی ٹینک میں گر گئی، اس واقعے کی دل دہلا دینے والی ویڈیو منظر عام پر آ گئی ہے۔

اکثر ایسا ہوتا ہے کہ بڑوں کی غفلت کا خمیازہ بچوں کو بھگتنا پڑ جاتا ہے، ایسا ہی ایک واقعہ کرناٹک کے شہر بنگلور میں پیش آیا، اس واقعے کی ویڈیو بھی سامنے آئی ہے جس میں بچی کو ٹینک کے کھلے دہانے میں گرتے دیکھا جا سکتا ہے۔

ویڈیو کے مطابق ایک عمارت کے زیر زمین ٹینک میں ٹینکر سے پائپ کے ذریعے پانی بھرا جا رہا ہے، ٹینک کا دہانہ کھلا ہوا تھا اور آس پاس کوئی نہیں تھا، ایسے میں وہاں کھڑی ایک بچی ٹینک کے کھلے ڈھکن کے پاس آئی اور اس میں نیچے گر کر غائب ہو گئی۔

یہ واقعہ سی سی ٹی وی کیمرے میں قید ہو گیا، فوٹیج میں دیکھا جا سکتا ہے کہ کچھ دیر تک کسی کو کچھ پتا نہیں چلتا، پھر تقریباً 42 سیکنڈ کے بعد ٹینک بھرنے والا شخص اندر سے آ کر وہاں کھڑا ہوتا ہے، اور تب اس کو ٹینک میں سے آوازیں سنائی دیتی ہیں۔

بچی کی آوازیں سن کر مذکورہ شخص کی گھبراہٹ کو بھی دیکھا جا سکتا ہے، وہ جلدی سے جوتے اتار کر ٹینک میں اترتا ہے، اس دوران عمارت کے اندر سے ایک خاتون بھی باہر آتی ہیں اور جیسے ہی ان کو بچی کا پتا چلتا وہ بھی گھبرا کر ٹینک کے پاس چلی جاتی ہیں۔

تاہم، خوش قسمتی سے بچی ایک منٹ اور 10 سیکنڈز تک ٹینک میں رہنے کے بعد بھی زندہ رہی، ٹینک بھرنے والے شخص نے اسے بہ حفاظت نکال کر خاتون کے حوالے کیا، فوٹیج میں خاتون کو بچی کے چہرے پر پانی کے چھینٹے بھی مارتے دیکھا جا سکتا ہے۔