ڈھاکا (22 جولائی 2025): دوسرے ٹی 20 میچ میں بنگلہ دیش نے سنسنی خیز مقابلے کے بعد پاکستان کو 8 ہرا کر سیریز میں فیصلہ کن برتری حاصل کر لی۔
ڈھاکا کے شیر بنگلہ اسٹیڈیم میں کھیلے گئے دوسرے ٹی 20 میچ میں بنگلہ دیش کی جانب سے دیے گئے 134 رنز کے ہدف کے تعاقب میں گرین شرٹس کی بیٹنگ لائن ابتدا میں ہی دھوکا دے کر آدھی ٹیم صرف 15 رنز پر پویلین لوٹ چکی تھی۔ پاکستان کے ابتدائی 6 کھلاڑی ڈبل فیگر میں بھی داخل نہ ہو سکے۔
محمد حارث، محمد نواز اور حسن نواز کو تو کھاتہ کھولنے کا موقع بھی نہ ملا۔ صائم ایوب دوسرے میچ میں بھی ناکام ثابت ہوئے اور صرف ایک رن ہی بنا سکے۔ فخر زمان کا بلا نہ چلا تو وہ خود 8 رنز بنا کر چلتے بنے۔ کپتان سلمان علی آغا نے 9 رنز بنائے جب کہ خوشدل شاہ 13 رنز بنا کر آؤٹ ہوئے۔
صرف 47 رنز پر 7 وکٹیں گرنے کے بعد پاکستان ٹیم کی جیت کی امیدیں دم توڑنے لگیں اور بنگلہ دیش سے پہلی بار ٹی 20 سیریز میں شکست کا خطرہ ہو چکا تھا۔
تاہم اس موقع پر آل راؤنڈر فہیم اشرف اور عباس آفریدی کریز پر آئے اور آٹھویں وکٹ کے لیے قیمتی 41 رنز بنائے۔ 88 کے مجموعی اسکور پر عباس 19 رنز بنا کر آؤٹ ہو گئے۔
تاہم فہیم اشرف اور اپنا پہلا ٹی 20 انٹرنیشنل میچ کھیلنے والے احمد دانیال نے جیت کی امیدیں برقرار رکھتے ہوئے آخری لمحات اچھے شاٹس کھیل بنگلہ دیشی شائقین میں ہلچل مچائی۔
جیت کی منزل جب صرف 13 رنز دور تھی تو فہیم اشرف 51 رنز بنا کر آؤٹ ہو گئے۔ 125 کے مجموعی اسکور پر احمد دانیال 17 رنز پر حوصلہ ہار بیٹھے۔
بنگلہ دیش کی جانب سے سب سے کامیاب بولر شوریف الاسلام رہے، جنہوں نے تین وکٹیں حاصل کیں۔ تنظیم حسن اور مہدی حسن نے دو، دو جب کہ مستفیض الرحمان اور رشاد حسین نے ایک ایک کھلاڑی کو آؤٹ کیا۔
اس سے قبل بنگلہ دیش کی ٹیم مقررہ 20 اوورز میں 133 رنز بنا کر آؤٹ ہوئی۔ جاکر علی نے نصف سنچری بنائی اور 55 رنز بنا کر ٹاپ اسکورر رہے۔ مہدی حسن 33 رنز کے ساتھ دوسرے نمایاں بلے باز رہے۔ بنگلہ دیش کے بھی 8 کھلاڑی ڈبل فیگرز میں داخل نہ ہو سکے تھے۔
اس سے قبل بنگلہ دیش کی ٹیم مقررہ 20 اوورز میں 133 رنز بنا کر آؤٹ ہوئی۔ جاکر علی نے نصف سنچری بنائی اور 55 رنز بنا کر ٹاپ اسکورر رہے۔ مہدی حسن 33 رنز کے ساتھ دوسرے نمایاں بلے باز رہے۔ بنگلہ دیش کے بھی 8 کھلاڑی ڈبل فیگرز میں داخل نہ ہو سکے تھے۔
آج کے میچ میں پاکستان ٹیم میں احمد دانیال کو ڈیبیو کرایا گیا تھا۔ دانیال نے دو اہم وکٹیں لینے کے ساتھ پاکستانی بیٹنگ کے آخری لمحات میں 11 گیندوں پر 17 رنز کی اننگ کھیل کر نہ صرف اپنا انتخاب درست ثابت کیا بلکہ ڈیبیو بھی یادگار بنایا۔
بنگلہ دیش نے 8 رنز سے دوسرا ٹی 20 میچ اپنے نام کر کے تین میچوں کی سیریز میں نا قابل شکست برتری حاصل کر لی ہے۔ جاکر علی کو 55 رنز کی فتح گر اننگ کھیلنے پر میچ کا بہترین کھلاڑی قرار دیا گیا۔
دونوں ٹیموں کے درمیان تیسرا اور آخری میچ جمعرات 24 جولائی کو کھیلا جائے گا۔
