لاہور: حکومت نے ملک بھر کی پاور ڈسٹری بیوشن کمپنیوں کے بورڈ آف ڈائریکٹرز تحلیل کرنے کا فیصلہ کر لیا ہے۔
ذرائع وزارت توانائی کے مطابق پاور ڈسٹری بیوشن کمپنیوں کے بورڈز میں سیاسی افراد کو شامل کیا گیا ہے، جانچ کرنے پر اکثر بورڈ ممبران نان ٹیکنیکل اور سیاسی گھرانوں کے نکلے ہیں۔
ذرائع کا کہنا ہے کہ پاور کمپنیوں میں نئے ممبران ٹیکنیکل، اہل اور غیر سیاسی لگانے کا فیصلہ کیا گیا ہے، اب ان کمپنیوں اور این ٹی ڈی سی کے نئے بورڈز تشکیل دیے جائیں گے، اس وقت اصلاحات کا عمل جاری ہے اس لیے پاور کمپنیوں میں نئے بورڈز ضروری ہیں۔
یہ انکشاف بھی ہوا ہے کہ حالیہ بورڈز ممبران ایک دن اجلاس کا یومیہ 60 ہزار روپے معاوضہ لیتے ہیں، بورڈ اجلاس میں شرکت کا موجودہ طریقہ کار کو ختم کرنے کا فیصلہ بھی کر لیا گیا ہے اور کمپنیوں کے بورڈ ممبران اب اعزازی ہوں گے۔
